ភ្នំពេញ៖ បើយោងតាមក្រសួងរ៉ែនិងថាមពល ប្រភពថាមពល ដែលផ្គត់ផ្គង់ នៅកម្ពុជា រួមមាន៖ ប្រភពវារីអគ្គីសនី, ប្រភពថាមពលពន្លឺព្រះអាទិត្យ, ប្រភពថាមពលជីវម៉ាស់, ប្រភពដុតធ្យូងថ្ម, ប្រភពដុតប្រេង, និងប្រភពថាមពល ដែលនាំចូលពីក្រៅប្រទេស។
ទាក់ទងនិងប្រភពថាមពលនេះ ត្រូវថបានអ្នកជំនាញលើកឡើងថា ថាមពលពន្លឺព្រះអាទិត្យ គឺជាបច្ចេកវិទ្យាថាមពលអគ្គីសនី ដែលមានគុណសម្បត្តិច្រើនជាងគេ។ ថាមពលពន្លឺព្រះអាទិត្យ ជាបច្ចេកវិទ្យាផលិតថាមពលអគ្គីសនី ដើរដោយពន្លឺព្រះអាទិត្យ។ ព្រះអាទិត្យបានបញ្ចេញថាមពល តាមទម្រង់ ២ជាចម្បង រួមមាន ៖ កំដៅ និងពន្លឺ។ បើតាមការឲ្យដឹងពីមន្ត្រីអគ្គនាយកដ្ឋានថាមពល នៃក្រសួងរ៉ែ និងថាមពល បានឱ្យដឹងថា ថាមពលពន្លឺព្រះអាទិត្យ មានទាំងគុណសម្បត្តិ និងគុណវិបត្តិ។ គុណសម្បត្តិ នៃថាមពលពន្លឺព្រះអាទិត្យ មានចំនួន៦ចំណុច រួមមាន ៖
១.ថាមពលព្រះអាទិត្យ គឺឥតគិតថ្លៃ ជាប្រភពថាមពលស្អាត។
២.ថាមពលព្រះអាទិត្យ ជាប្រភពថាមពលមិនបញ្ចេញឧស្ម័នផ្ទះកញ្ចក់ និងមិនបង្កើតសំឡេងរំខាន។
៣.ថាមពលព្រះអាទិត្យ មានបរិមាណច្រើនក្រៃលែង ព្រោះព្រះអាទិត្យ នឹងនៅជានិច្ចក្នុងមួយជីវិតរបស់យើង (មានជានិរន្តរភាព) និងកាត់បន្ថយការប្រើប្រាស់ប្រេងឥន្ធនៈមានតម្លៃខ្ពស់។
៤.ការចំណាយលើការថែទាំ និងការជួសជុល លើបន្ទះស្រូបពន្លឺព្រះអាទិត្យ មានតម្លៃសមរម្យ ធៀបនឹងប្រព័ន្ធថាមពលផ្សេងៗ។
៥.ថាមពលពន្លឺព្រះអាទិត្យ ជាថាមពលអាចប្រើប្រាស់បានគ្រប់ទីកន្លែង មានពន្លឺព្រះអាទិត្យគ្រប់គ្រាន់ និងចូលរួមបន្ថែមបរិមាណផលិតអគ្គីសនី ដែលធានាបាននូវ សន្តិសុខថាមពល ក្នុងការផ្គត់ផ្គង់អគ្គីសនី។
៦.ថាមពលពន្លឺព្រះអាទិត្យ បាននាំមកនូវបច្ចេកវិទ្យាទំនើប និងបង្កើនសមត្ថភាពជំនាញ របស់កម្មករនយោជិត និងផ្តល់ការងារ ជូនប្រជាពលរដ្ឋ នៅក្នុងដំណាក់កាលសាងសង់ និងដំណើរការ។
ដោយឡែក ចំពោះគុណវិបត្តិវិញ មានចំនួន២ចំណុច៖
១.ការផលិតអគ្គីសនី ដោយថាមពលពន្លឺព្រះអាទិត្យ ត្រូវការតំបន់ធំមួយសម្រាប់តម្លើង ដើម្បីទទួលបាននូវប្រសិទ្ធភាពល្អ។
២.ថាមពលពន្លឺព្រះអាទិត្យ ត្រូវបានកាត់បន្ថយដោយសារអាកាសធាតុ មានពពក និងពេលយប់ ដែលធ្វើឲ្យការទទួលបានពន្លឺ មិនបានគ្រប់គ្រាន់សម្រាប់ការផលិតអគ្គីសនី៕ រក្សាសិទ្ធិដោយ ៖ CEN
