គួររម្លឹកបន្តិចថា កាលពីរសៀលថ្ងៃទី១៩ ខែឧសភា ឆ្នាំ២០២១ មានគណនីហ្វេសប៊ុកឈ្មោះ Heng Sokha បានបង្ហោះនូវរូបភាព១សន្លឹកដ៏ខ្លោចចិត្ត បង្ហាញក្មេងស្រីម្នាក់ ដែលគាត់បានបញ្ចាក់ថា ត្រូវបានសណ្តាប់ផ្សារកំពង់ស្ពឺ ទាត់ថាសលក់ព្រីង ខ្ចុរ របស់នាងឲ្យកំពប់ខ្ចាយពាសពេញលើដី គួរឲ្យអាណិតជាខ្លាំង។
ស្របពេលដែលករណីខាងលើ ត្រូវបានមហាជនប្រតិកម្មខឹងសម្បារយ៉ាងខ្លាំងនោះ នៅព្រឹកថ្ងៃទី២០ ខែឧសភា ឆ្នាំ២០២១ ឯកឧត្ដម វី សំណាង អភិបាលខេត្តកំពង់ស្ពឺ បានចេញមុខធ្វើការសុំទោសជំនួស ចំពោះទង្វើដ៏អសីលធម៌បែបនេះ និងបានឧបត្ថម្ភជាអំណោយសម្ភារៈមួយចំនួន ដើម្បីលើកទឹកចិត្ត និងក៏ដូចរួមចំណែកសម្រួលដល់ការលំបាករបស់គ្រួសារក្មេងស្រី ហើយលោកក៏បានបញ្ជាក់ថា នឹងមិនអត់ឱនឲ្យបុគ្គលរូបនោះដាច់ខាត។
តែអ្វីដែលគួរឲ្យភ្ញាក់ផ្អើល និងស្ទើរតែមិនគួរឲ្យជឿនោះ គឺរឿងហេតុនេះ មិនមែនបង្កឡើងដោយសន្តិសុខសណ្តាប់ធ្នាប់នោះទេ តែសកម្មភាពទាត់ថាសព្រីង ខ្នុរ របស់ក្មេងស្រីនោះ ត្រូវបានគេបញ្ជាក់ និងបង្ហោះរូបភាពថ្មីមួយ បង្ហាញថាជាទង្វើរបស់លោក ឡាត់ ប៊ុនធីម នាយករងរដ្ឋបាលក្រុងច្បារមន តែម្តង។
ជាមួយគ្នានេះផងដែរ ក៏បានធ្វើឲ្យឯកឧត្តម ទីចំរើន កុសល សម្តែងការហួសចិត្តថា៖ «ថាម៉េចនាយករងរដ្ឋបាលក្រុងច្បារមន ខេត្តកំពង់ស្ពឺឈ្មោះ ឡាត់ ប៊ុនធីម ជាអ្នកទាត់ថាសព្រីងរបស់ក្មេងស្រីរូបនេះឲ្យកម្ពប់ពេញដីទេ? ខ្ញុំស្មានតែជាទង្វើរបស់សន្តិសុខរៀបចំសណ្តាប់ធ្នាប់ផ្សារ។»។
ក្រោយពីបានដឹងថាជាទង្វើរបស់មន្ត្រីរូបនេះ បានធ្វើឲ្យមហាជនកាន់តែហួសចិត្ត និងស្ទើររកពាក្យថ្លែងពុំតែម្តង ព្រោះតែមិននឹកស្មានថា ជាមន្ត្រីមានការចេះដឹងធ្វេីការងារល្អម្នាក់ដែរ តែចរិកថោកជាងសំរាមបែបនេះ ថាលួចគេទៅមានទោសទណ្ឌ សុំទានគេទៅថាមានដៃមានជើងមិនចេះរកស៊ី ដល់ពេលគ្នាខំរកស៊ីលក់ដូរមានកំហុសសណ្តាប់ធ្នាប់តិចតួច បែរគ្មានចិត្តយោគយល់ និងក្តីមេត្តាសោះអុីចឹង។
ជាមួយនិងទង្វើរបស់មន្ត្រីដ៏គ្មានសីលធ៌ម សុជីវធ៌ម និងគុណធ៌ម នៅក្នុងខ្លួនបែបនេះ គេក៏បានលើក យកប្រសាសន៍ដ៏ខ្ពង់ខ្ពស់របស់សម្តេចតេជោ ហ៊ុន សែន ដោយសម្តេចបានសង្កត់ធ្ងន់ថា «មន្ត្រីជាអ្នកបំរើរាស្ត្រដ៏ស្មោះត្រង់ មិនមែនជាចៅហ្វាយនាយទេ»៕ រក្សាសិទ្ធិដោយ៖ លឹម ហុង
