ខេត្តស្វាយរៀង ៖ រកឃើញកម្មកររោងចក្រយូលី (international cambodia ហ្គាមែន) ស្ថិតនៅតំបន់សេដ្ឋកិច្ចពិសេសសានតុងសានសែល ឆ្លងជំងឺកូវីដ19 ជាបឋមចំនួន ៩៦នាក់ នៅក្រុងបាវិត ខេត្តស្វាយរៀង។
ក្រុមគ្រូពេទ្យនៃមន្ទីរសុខាភិបាលខេត្តស្វាយរៀងនៅរសៀលថ្ងៃទី ២២ ខែឧសភាឆ្នាំ ២០២១បានបន្តរកឃើញករណីឆ្លងជំងឺ covid-19 ទៅលើកម្មករកម្មកានីរោងចក្រយូលី (international ខេមបូឌាហ្គាមែន)ស្ថិតនៅភូមិជ្រៃធំ សង្កាត់ព្រៃអង្គុញ ក្រុងបាវិត ក្នុងតំបន់សេដ្ឋកិច្ចពិសេសសានតុងសាន់សែលជាបឋមចំនួន ៩៦នាក់ ចាប់គិតពីល្ងាចថ្ងៃទី ២១ ខែឧសភា ឆ្នាំ ២០២១ រហូតដល់រសៀលនេះ។
លោកបណ្ឌិត កែរ រដ្ឋា ប្រធានមន្ទីរសុខាភិបាលខេត្តស្វាយរៀងបានមានប្រសាសន៍បន្តឲ្យដឹងទៀតថា៖បច្ចុប្បន្ននេះក្រុមការងារគ្រូពេទ្យកំពុងបន្តធ្វើសំណាកទៅលើកម្មករកម្មការនីចំនួនជាង ៨០០នាក់ និងអ្នកដែលមានការពាក់ព័ន្ធជាបន្តទៀត។
សូមបញ្ជាក់ផងដែរថា៖ នៅរសៀលថ្ងៃទី២២ ខែឧសភា ឆ្នាំ២០២១នេះ ខេត្តស្វាយរៀង បានបន្តរកឃើញអ្នកដែលឆ្លងជំងឺកូវីដ១៩ កើនឡើងជាបឋមចំនួននាក់ក្នុងចំណោមកម្មករកម្មការិនីដែលបានធ្វើតេស្តចំនួន៨៧១នាក់ ដែលមានការពាក់ព័ន្ធជាមួយបុរសម្នាក់ជាអ្នករកស៊ីដឹកបន្លែ ពីខេត្តស្វាយរៀង ទៅផ្សារដើមគរ រាជធានីភ្នំពេញ ហើយបានឆ្លងជំងឺកូវីដ១៩ ដល់ប្រពន្ធធ្វើការរោងចក្រក្នុងតំបន់សេដ្ឋកិច្ចពិសេសសានតុង ក្រុងបាវិត។ នេះបើយោងតាមការបញ្ជាក់ពីលោកបណ្ឌិត កែរ រដ្ឋា ប្រធានមន្ទីរសុខាភិបាលខេត្តស្វាយរៀង បានបញ្ជាក់ប្រាប់ក្រុមអ្នកសារព័ត៌មាន នៅរសៀលនេះ។
លោកបណ្ឌិត កែរ រដ្ឋា បានបន្តថា មូលហេតុដែលរកឃើញអ្នកជំងឺកូវីដ១៩នេះ ខណៈពេលដែលបុរសជាប្តីកម្មករនោះគាត់មានបញ្ហាសុខភាព បានទៅពិនិត្យនៅមន្ទីរពេទ្យ «ជីភូ» ហើយបានទៅយកសំណាកនៅមណ្ឌលចត្តាឡីស័ក «មីស្ទ័រសូ»។ លុះដល់រកឃើញមានវិជ្ជមានទើបក្រុមការងារ បានយកប្រពន្ធគាត់ជាកម្មករធ្វើការនៅរោងចក្រ «យូលី» ទៅធ្វើតេស្តក៏មានវិជ្ជមានដូចគ្នា ហើយក្រុមការងារក៏បានបន្តស្រាវជ្រាវដល់រោងចក្រតែម្តង ដោយមានអ្នកពាក់ព័ន្ធជាង ៨០០នាក់ កំពុងធ្វើតេស្តរកជំងឺកូវីដ១៩ ផងដែរ។
លោកបណ្ឌិត កែរ រដ្ឋា បានអំពាវនាវដល់អ្នកពាក់ព័ន្ធជាមួយបុរសដែលជាអ្នករកស៊ីដឹកបន្លែ និងប្រពន្ធដែលជាកម្មកររោងចក្រ ត្រូវប្រញាប់រួសរាន់មកធ្វើតេស្តរកជំងឺកូវីដ១៩ ឱ្យបានទាន់ពេលវេលា និងរួមគ្នាអនុវត្តវិធានការ របស់ក្រសួងសុខាភិបាល៕ រក្សាសិទ្ធិដោយ ៖ វ៉ៃកូ
