ភ្នំពេញ÷ក្មេងប្រុសម្នាក់ទើបតែអាយុ ១ខួប បានបាត់បង់ជីវិត ក្រោយពេលបញ្ជូនដល់មន្ទីពេទ្យ បន្ទាប់ពីមានរថយន្តស៊េរីទំនើបមួយគ្រឿង បើកថយក្រោយមិនប្រយ័ត្ន រួចកឹនចំពីលើចំហៀងក្បាលក្មេងឈាមស្រោចពេញមុខស្លាប់យ៉ាងអណោចអាធ័ម។ ចំណែកឯម្ចាស់រថយន្តបង្កត្រូវសមត្តកិច្ចឃាត់បានឲ្យនៅដោះស្រាយជាមួយម្តាយសពក្មេងរងគ្រោះ។
ហេតុការណ៍ភ្ញាក់ផ្អើលនេះបានកើតឡើងនៅវេលាម៉ោង ៦និង៣០នាទីយប់ ថ្ងៃទី២៣ ខែឧសភា ឆ្នាំ២០២១ ស្ថិតនៅតាមបណ្តោយផ្លូវបេតុង ចំណុចក្នុងបុរីលឹមឈាងហាក់ ក្នុងភូមិគ្រាំងដូនតី សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ។
សពក្មេងមានឈ្មោះ ឡាយគឹម ហេង ភេទប្រុស អាយុ១ខួប បច្ចុប្បន្ននៅជាមួយម្តាយក្នុងបុរីលឹមឈាងហាក់ សង្កាត់ចោមចៅទី២ ខណ្ឌពោធិ៍សែនជ័យ មានស្រុកកំណើតនៅខេត្តត្បូងឃ្មុំ។
ប្រភពព័ត៍មានពីឪពុកក្មេងរងគ្រោះបានរៀបរាប់ឲ្យដឹងថា នៅមុនពេលកើតហេតុដោយរូបគាត់បានយកក្មេងរងគ្រោះត្រូវជាកូនទៅងូតទឹក ពេលដែលងូតទឹកឲ្យរួច គាត់ក៏បានប្តូរសំលៀកបំពាក់ឲ្យ បន្ទាប់មកស្រាប់តែក្មេងរងគ្រោះខាងលើបានដើរចេញពីក្នុងបន្ទប់មករត់លេងនៅខាងក្រៅជិតនឹងកន្លែងកើតហេតុ ខណៈភ្លាមនោះដែរ ស្រាប់តែបុរសជាម្ចាស់ផ្ទះបានឡើងទៅលើរថយន្តស៊េរីទំនើបមួយគ្រឿងដែលមិនចាំស្លាកលេខបានបើកអាយ៉ែថយក្រោយ ដោយមិនបានមើលឆ្វេងស្តាំក៏កិនចំពីលើចំហៀងក្បាលក្មេងឈាមស្រោចពេញមុខដំបូងនៅមានដង្ហើម ដោយម្តាយឪពុកក្មេងបានហៅកង់បីមកដឹកយកទៅមន្ទីរពេទ្យដើម្បីជួយសង្គ្រោះដែរ តែអកុសលដោយសភាពធ្ងន់ធ្ងរពេកក៏ស្លាប់បាត់បង់ជីវិតតែម្តងទៅ បន្ទាប់ មកពួកគាត់ក៏បានរាយការណ៍ទៅខាងសមត្ថកិច្ចមូលដ្ឋានឱ្យចុះមកជួយអន្តរាគមន៍ភ្លាម។
ក្រោយពេលកើតហេតុសមត្ថកិច្ចមូលដ្ឋានសហការជាមួយនិងខាងជំនាញចរាចរណ៍ចុះមកដល់ រួចក៏បានឃាត់បុរសជាម្ចាស់រថយន្តបង្កខាងលើទៅប៉ុស្តិ៍នគរបាលរដ្ឋបាលសង្កាត់ចោមចៅទី ២ ដើម្បីធ្វើការសាកសួរបន្ទាប់មកដោយភាគីខាងរថយន្តបង្កសុំឪពុកម្តាយក្មេងរងគ្រោះសុំសងជាសំណង៤៥០០ដុល្លារ បញ្ចប់រឿងដោយមិនមានការប្ដឹងផ្ដល់នោះទេ បន្ទាប់មកឪពុកម្ដាយក្មេងរងគ្រោះក៏ព្រមទទួលសំណង ៤៥០០ដុល្លាបញ្ចប់រឿងតែម្ដងទៅ៕ ដោយ ៖ សាមេត
