ភ្នំពេញ៖ ព្រះសង្ឃ និងសិស្សនិស្សិត មួយចំនួន ដែលគង់/ស្នាក់នៅកុដិមួយនៃ វត្តសារាវ័នតេជោ ធ្វើតេស្តរកឃើញមាន វិជ្ជមានកូវីដ១៩ និងត្រូវបាននិមន្ត/នាំយកទៅព្យាបាល។
សូមអំពាវនាវដល់ប្រជាពលរដ្ឋ ដែលចេញចូល និងមានទំនាក់ទំនងជាមួយព្រះសង្ឃ និងសិស្សនិស្សិតនៅ វត្តសារាវ័នតេជោ ដាក់ខ្លួនឲ្យនៅដាច់ដោយឡែក និង តាមដានសុខភាព រយៈ ១៤ ថ្ងៃ បន្ទាប់ពីបានប៉ះពាល់ ឬទៅកាន់តំបន់ហានិភ័យនេះ។
ព្រះមង្គលសត្ថា កង ណាម៉ានី បានគូសបញ្ជាក់លើហ្វេសប៊ុកថា នៅរសៀលថ្ងៃទី២៣ ខែ ឧសភា ឆ្នាំ២០២១ គ្រូពេទ្យបានទៅយកសំណាកពីព្រះសង្ឃ និងសិស្សនិស្សិតដែលគង់ និងស្នាក់នៅកុដិមួយនែវត្តសារាវ័នតេជោ យកសំណាក ២០អង្គ/នាក់ ឃើញមានវិជ្ជមានកូវីដ១៩ ចំនួនប្រហែល១០អង្គ/នាក់ ហេតុដូចនេះសូមព្រះសង្ឃគ្រប់ព្រះអង្គគ្រប់វត្ត ញាតិញោមទាំងអស់ដែលអញ្ជើញទៅវត្តសូមប្រកាន់ខ្ជាប់នូវវិធានការ ៣ការពារ៣កុំ ឲ្យបានខ្ពស់ និងមានស្មារតីគ្រប់ពេល ជាពិសេសរក្សាគម្លាត ។
សព្វេ សត្តា អវេរា ហោន្តុ សុខិតា ហោន្តុ និទ្ទុក្ខា ហោន្តុ អព្យាបជ្ឈា ហោន្តុ អនិឃា ហោន្តុ ទិឃាយុកា ហោន្តុ អរោគា ហោន្តុ សម្បត្តីហិ សមិជ្ឈន្តុ សុខី អត្តានំ បរិហរន្តុ ។
សូមឲ្យមនុស្ស សត្វទាំងអស់ កុំមានពៀរនឹងគ្នា សូមឲ្យបានតែសេចក្តីសុខ ឲ្យប្រាសចាកទុក្ខ កុំព្យាបាទគ្នា កុំមានសេចក្តីព្រួយចំបែង សូមឲ្យមានអាយុវែង កុំឲ្យមានរោគ សូមឲ្យបាន សម្រេចដោយសម្បត្តិទាំងឡាយ សូមរក្សានូវខ្លួនឲ្យជាសុខរៀងទៅ ៕ រក្សាសិទ្ធិដោយ៖បញ្ញាស័ក្តិ
