ភ្នំពេញ ៖ ករណីមន្រ្តីកងរាជអាវុធហត្ថខេត្តកំពង់ធំម្នាក់ ចាក់អតីតប្រពន្ធ បណ្ដាលឲ្យរបួសធ្ងន់ ហើយរត់គេចខ្លួនបាត់នោះ នៅរសៀលថ្ងៃទី២៤ ខែឧសភា ឆ្នាំ២០២១នេះ ឯកឧត្តមនាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស បានថ្លែងថា កម្លាំងកងរាជអាវុធហត្ថជំនាញកំពុងស្រាវជ្រាវ តាមចាប់ខ្លួនបុគ្គលអាវុធហត្ថខេត្តកំពង់ធំម្នាក់ ដែលចាក់អតីតភរិយាបណ្ដាលឲ្យរងរបួសធ្ងន់។
មន្រ្តីកងរាជអាវុធហត្ថខេត្តកំពង់ធំ ស្រ៊ុន ពេជ្យរស្មី តែងតែប្រើអំពើហិង្សាជាញឹកញាប់ មកលើប្រពន្ធ រហូតកើតជម្លោះ ឈានដល់ការលែងលះតាមផ្លូវតុលាការ។
នាយឧត្តមសេនីយ៍ សៅ សុខា បានបញ្ជាក់ទៀតថា បុគ្គលដែលប្រព្រឹត្តខុសច្បាប់ គឺមិនអាចអត់ឱនឲ្យបាននោះទេ ត្រូវតែស្រាវជ្រាវចាប់ខ្លួន ដើម្បីយកមកផ្ដន្ទាទោសតាមផ្លូវច្បាប់ជាធរមាន។
លោកវរសេនីយ៍ត្រី ផុន សុផល ប្រធានការិយាល័យព្រហ្មទណ្ឌកងរាជអាវុធហត្ថខេត្តកំពង់ធំ បានបញ្ជាក់នាថ្ងៃទី២៤ ខែឧសភានេះថា ពិតជាមានករណីហិង្សានេះ កើតឡើងក្នុងមូលដ្ឋានស្រុកសណ្តាន់ ប្រាកដមែន ពេលនេះជនបង្កហេតុកំពុងរត់គេចខ្លួនមិនទាន់ចាប់បាននៅឡើយ ហើយកម្លាំងកំពុងតែធ្វើការយ៉ាងយកចិត្តទុក ដើម្បីចាប់ជនបង្កយកមកចំណាត់ការតាមផ្លូវច្បាប់ ដើម្បីរកយុត្តិធម៌ជូនជនរងគ្រោះ។
សូមជម្រាបថា មន្ត្រីកងរាជអាវុធហត្ថម្នាក់នៅស្រុកសណ្តាន់ បានយកកាំបិតចាក់អតីតភរិយាជាច្រើនកាំបិត បណ្តាលឱ្យរងរបួសធ្ងន់ ហើយស្រ្តីរងគ្រោះត្រូវបានសាច់ញាតិបញ្ជូនមកព្យាបាលនៅមន្ទីរពេទ្យឯកជន។ ករណីអំពើហិង្សានេះបានកើតឡើង នៅភូមិត្បូងទឹក ឃុំមានរិទ្ធ ស្រុកសណ្តាន់ ខេត្តកំពង់ធំ នាថ្ងៃទី២៣ ខែឧសភា ឆ្នាំ២០២១។
ស្ត្រីរងគ្រោះឈ្មោះ កួច មួយហៀក អាយុ៣០ឆ្នាំ រស់នៅភូមិឃុំកើតហេតុ បានបញ្ជាក់ថា ជនបង្កជាអតីតប្តីមានឈ្មោះ ស្រ៊ុន ពេជ្ររស្មី អាយុ៣៦ឆ្នាំ មុខរបរជាមន្ត្រីកងរាជអាវុធហត្ថខេត្តកំពង់ធំ ប្រចាំការនៅស្រុកសណ្តាន់។
ស្ត្រីរងគ្រោះបានប្រាប់ឱ្យដឹងថា ដំបូងឡើយជនបង្ក ស្រ៊ុន ពេជ្ររស្មី មកឈប់ម៉ូតូមុខតូប ហើយស្រែកសួរថាកូននៅឯណា? នៅជាមួយអ្នកណា? នាងបានប្រាប់ថា កូននៅគេងក្នុងផ្ទះមិនទាន់ក្រោកទេ នៅជាមួយម៉ាក់ (ម្តាយជនរងគ្រោះ), ភ្លាមៗនោះជនបង្កបានទាញកាំបិតមកប្រហារមកលើរូបនាងតែម្តង ដូចមានចេតនាទុកមុន ហើយស្រែកថា ហេតុអីបានជាឱ្យគេចូលបន្ទប់មិនសុំការអនុញ្ញាតពីគេជាមុនសិន។
បច្ចុប្បន្នស្ត្រីរងគ្រោះ ត្រូវបានបញ្ជូនមកព្យាបាល នៅមន្ទីរពេទ្យឯកជនស្រុកសណ្តាន់ ដោយរងរបួសធ្ងន់ ចំដៃឆ្វេងពីរកាំបិត ខាងស្តាំពីរកាំបិត និងកញ្ចឹងកមួយកាំបិត។ ដោយឡែកជនបង្ក បន្ទាប់ពីធ្វើសកម្មភាព វាយប្រហារមកលើអតីតប្រពន្ធរួចមក បានរត់គិតខ្លួនបាត់ស្រមោល៕ បញ្ញាស័ក្តិ
