ភូមិឋានកីឡាដែលជាផ្នែកមួយរណបឲ្យពហុកីឡដ្ឋានជាតិមរតកតេជោ បើតាម អ្នកឧកញ៉ា សៀ ឫទ្ធី តំណាងក្រុមហ៊ុនសាងសង់ World Bridge Sport Village បានអះអាងថា នឹងខិតខំសាងសង់គម្រោងភូមិឋានកីឡានេះ ឲ្យទាន់ពេលវេលាកំណត់ នៅចុងឆ្នាំ២០២២ តាមរយៈការសម្រុកធ្វើការងារទាំងយប់ទាំងថ្ងៃ ទោះបីស្ថិតក្នុងកាលៈទេសៈនៃការរីករាលដាលជំងឺកូវីដ-១៩ ក៏ដោយ ក៏គម្រោងនៅតែបន្តការសាងសង់ជាប់ជានិច្ច ដើម្បីធ្វើជាម្ចាស់ផ្ទះ រៀបចំការប្រកួតកីឡាស៊ីហ្គេម លើកទី៣២ ឆ្នាំ២០២៣។
ការអះអាងរបស់ អ្នកឧកញ៉ា សៀ ឫទ្ធី ធ្វើឡើងនាថ្ងៃទី២៤ ខែឧសភា ឆ្នាំ២០២១ នៅចំពោះមុខ លោក ថោងខុន រដ្ឋមន្ត្រីក្រសួងទេសចរណ៍ និងជាអនុប្រធានអចិន្ដ្រៃយ៍នៃគណៈកម្មាធិការជាតិរៀបចំការប្រកួតកីឡាស៊ីហ្គេមនៅកម្ពុជា ខណ:ចុះពិនិត្យវឌ្ឍនភាព និងជំរុញការសាងសង់ភូមិថានកីឡា (Sport Village) នៅក្នុងបរិវេណកីឡដ្ឋានជាតិមរតកតេជោ ស្ថិតនៅសង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ។
ក្នុងដំណើរពិនិត្យមើលវឌ្ឍនភាពនេះ លោក រដ្ឋមន្ត្រី ថោង ខុន និងជាអនុប្រធានអចិន្ដ្រៃយ៍នៃគណៈកម្មាធិការជាតិរៀបចំការប្រកួតកីឡាស៊ីហ្គេម លើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះនេះ បានជំរុញក្រុមហ៊ុន World Bridge Sport Village ឲ្យពន្លឿនការសាងសង់កន្លែងស្នាក់នៅ (ភូមិឋានកីឡា) និងកំណត់ទីតាំងអាហារដ្ឋានសម្រាប់បម្រើឲ្យប្រតិភូកីឡា និងអត្តពលិក សរុបប្រមាណ ១ម៉ឺននាក់ អំឡុងការប្រកួតកីឡាស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣ នៅកម្ពុជា។
លោករដ្ឋមន្ត្រី ថោង ខុន បានផ្ដល់ទំនុកចិត្តបន្ថែមដល់ក្រុមហ៊ុន World Bridge Sport Village ដោយធ្វើយ៉ាងណា ឱ្យជួយសម្របសម្រួលការងាររដ្ឋបាល ក៏ដូចជាដោះស្រាយការងារប្រឈមមួយចំនួនអំឡុងពេលសាងសង់ ហើយសូមឱ្យចាត់តាំងមន្ដ្រីប្រចាំការជួយលើការងារជំនាញផង និងការងារសម្របសម្រួលផង ចៀសវាងការរាំងស្ទះក្នុងដំណើរការសាងសង់ភូមិឋាកីឡាមួយនេះ ដើម្បីឆ្ពោះទៅសម្រេចការងារសាងសង់តាមផែនការកំណត់ បញ្ចប់នៅចុងឆ្នាំ២០២២៕ ពិសិដ្ឋ CEN
