ភ្នំពេញ៖ បុរសម្នាក់ បើកម៉ូតូកង់បីឥណ្ឌាមួយគ្រឿង ទៅបុកចំពីក្រោយរថយន្ដកុងតឺន័រ បណ្ដាលឲ្យគៀបជាប់នឹងម៉ូតូកង់បីឥណ្ឌាស្លាប់ភ្លាមៗយ៉ាងអាណោចអាធ័ម។ ចំណែកតៃកុងរថយន្តកុងតឺន័របានបើកទ្វាររត់គេចខ្លួនបាត់ស្រមោល។
ហេតុការណ៍គ្រោះថ្នាក់ចរាចរដ៏រន្ធត់នេះដែរបានកើតឡើងកាលពីវេលាម៉ោង១០ និង៣០នាក់យប់ ថ្ងៃទី២៧ ខែឧសភា ឆ្នាំ២០២១ ស្ថិតតាមបណ្ដោយផ្លូវមហាវិថីឈ្នះឈ្នះ ក្នុងសង្កាត់សំរោងក្រោម ខណ្ឌពោធិ៍សែនជ័យ រាជាធានីភ្នំពេញ។
ជនរងគ្រោះមានឈ្មោះគង់ គឹមស៊ុន អាយុ៤៨ឆ្នាំ មុខរបរត់ម៉ូតូកង់បី បច្ចុប្បន្នរស់ភូមិជម្ពូវ័ន សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ មានស្រុកកំណើតរស់នៅខេត្តស្វាយរៀង ។
បើយោងតាមប្រភពពីកន្លែងកើតហេតុបានប្រាប់ឲ្យដឹងថា នៅមុនពេលកើតហេតុគេឃើញរថយន្ដកុងតឺន័រមួយក្បាលពណ៌ខៀវ ពាក់ផ្លាកលេខភ្នំពេញ3B-7425 បើកបរដោយបុរសម្នាក់ធ្វើដំណើរតាមផ្លូវមហាវិថីឈ្នះឈ្នះ ក្នុងទិសដៅពីជើងមកត្បូងក្នុងល្បឿនមធ្យម ខណៈមកដល់ចំណុចកើតហេតុ ស្រាប់តែគេឃើញមានបុរសម្នាក់បានបើកកង់បីឥណ្ឌាមួយគ្រឿង ពណ៌ស ពាក់ផ្លាកលេខភ្នំពេញ 1-IM-5598 ធ្វើដំណើរពីក្រោយ ស្របទិសគ្នាក្នុងល្បឿនលឿន ទៅបុកចំពីក្រោយរថយន្ដកុងតឺន័រពេញទំហឹង បណ្ដាលឲ្យគ្រៀបជាប់ស្លាប់នៅក្នុងកង់បីឥណ្ឌាតែម្តង ចំណែកតៃកុងរថយន្ដបង្កក៏បានចុះពីលើរថយន្ដរត់គេចខ្លួនបាត់ទៅបន្សល់តែរថយន្តនៅនឹងកន្លែងកើតហេតុ។
ក្រោយពេលកើតហេតុ សមត្ថកិច្ចមូលដ្ឋានក៏បានចុះមកដល់កន្លែងកើតហេតុ រួចក៏បានទាក់ទងទៅសមត្ថកិច្ចជំនាញចរាចរណ៍បានធ្វើការវាស់វែងយករថយន្តនិងម៉ូតូទៅរក្សាទុកនៅការិយាល័យចរាចរណ៍ជើងគោកស្នងការនគរបាលរាជធានីភ្នំពេញ ដើម្បីដោះស្រាយគ្នានៅពេលក្រោយ ចំណែកឯសពសមត្ថកិច្ចបានត្រួតពិនិត្យរួចហើយក៏បានធ្វើកំណត់ហេតុប្រគល់ឲ្យសាច់ញាតិយកទៅធ្វើបុណ្យតាមប្រពៃណី៕ រក្សាសិទ្ធិដោយ៖ សាមេត
