ភ្នំពេញ ៖ ស្ត្រីម្នាក់បានរៀបរាប់ទាំងក្តុកក្តួលថា រូបហាក់ដូចជាបានរស់ម្តងទៀតអីចឹង ខណៈពេលរូបគាត់កំពុងតែជិះម៉ូតូឌុបត្រី បម្រុងនឹងត្រឡប់ទៅផ្ទះវិញ ត្រូវបានរថយន្តកុងទីន័រមួយគ្រឿង បុកកិនចំពីលើ សំណាងល្អ ព្រោះគាត់បានលោតចុះចេញពីលើម៉ូតូទាន់ពេលវេលា កុំអីកូនស្រីរបស់គាត់ពីរនាក់ ត្រូវក្លាយជាក្មេងកំព្រា។
ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងកាលពីវេលាម៉ោង ១០ និង ៥០ នាទីព្រឹកថ្ងៃទី ២៨ ខែឧសភាឆ្នាំ២០២១ ស្ថិតនៅចំណុចស្តុកទួលពង្រ ភូមិត្រពាំងថ្លឹង សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។
តាមប្រភពព័ត៌មាននៅកន្លែងកើតហេតុ បានឲ្យដឹងថា មុនពេលកើតហេតុ គេឃើញស្ត្រីរងគ្រោះខាងលើនេះ ជិះម៉ូតូមួយគ្រឿង ម៉ាកស្មាស់វី ពណ៌សពាក់ផ្លាកលេខភ្នំពេញ 1BW -1585 ធ្វើដំណើរពីទិសដៅពីលិចទៅកើត លុះដល់ចំណុចកើតហេតុ នៅចំណុចភ្លើងស្តុបទួលពង្រ ស្រាប់តែមានរថយន្តកុងតឺន័រមួយគ្រឿង ពាក់ផ្លាកលេខភ្នំពេញ 3A -7303 បើកបរពីក្រោយស្របទិសគ្នា ហើយរថយន្តក៏បានបត់ស្តាំ បានជ្រុលចង្កូតកិនចំពីលើម៉ូតូ សំណាងល្អស្ត្រីខាងលើ លោតចេញទាន់ គ្រាន់តែរងរបួសស្រាលប៉ុណ្ណោះ ចំណែកម៉ូតូរងការខូចខាតផ្នែកខាងមុខយ៉ាងដំណំ។
ក្រោយពេលកើតហេតុ សមត្ថកិច្ចនគរបាលប៉ុស្តិ៍រដ្ឋបាលចោមចៅទី១ សហការជាមួយនឹងចរាចរណ៍ជំនាញខណ្ឌពោធិ៍សែនជ័យ ចុះមកធ្វើការវាស់វែង បន្ទាប់មកក៏យករថយន្តនិងម៉ូតូ ទៅរក្សាទុកនៅអធិការរដ្ឋាននគរបាលខណ្ឌពោធិ៍សែនជ័យ ដើម្បីដោះស្រាយគ្នា នៅពេលក្រោយ៕ រក្សាសិទ្ធិដោយ៖សួង សាម
