ភ្នំពេញ÷បុរសម្នាក់បានបើករថយន្តបែកដឹកខ្សាច់មួយគ្រឿង ចេញពីការដ្ឋានមិនប្រយ័ត្នបានជ្រុលចង្កូតទៅបុកចំពីខាងមុខរថយន្តស៊រីទំនើប កំពុងតែបើកនៅតាមដងផ្លូវចំពីខាងមុខពេញទំហឹងបណ្តាលឲ្យខ្ទេចផ្នែកខាងមុខ ចំណែកតៃកុងរថយន្តបង្កបានចុះចេញពីកន្លែងកើតហេតុបាត់ស្រមោល។
ហេតុការណ៍គ្រោះថ្នាក់ចរាចរណ៍នេះដែរ កើតឡើងកាលពីវេលាម៉ោង ១០និង២០នាទីយប់ថ្ងៃទី១៣ ខែមិថុនាឆ្នាំ២០២១ ស្ថិតនៅតាមបណ្ដោយផ្លូវ៦០ម៉ែត្រ សង្កាត់ចាក់អង្រែក្រោម ខណ្ឌមានជ័យរាជធានីភ្នំពេញ។
ប្រភពព័ត៌មានពីប្រជាពលរដ្ឋនៅកន្លែងកើតហេតុបានប្រាប់ឲ្យដឹងថា នៅមុនពេលកើតហេតុ គេបានឃើញរថយន្តស៊េរីទំនើបម៉ាក toyota fortuner ពណ៌ខ្មៅពាក់ផ្លាកលេខ ភ្នំពេញ2-AM 1199 បើកបរដោយបុរសម្នាក់ ធ្វើដំណើរតាមបណ្តោយផ្លូវ៦០ម៉ែត្ រក្នុងទិសដៅពីកើតមកលិចក្នុងល្បឿនមធ្យម ខណៈមកដល់កន្លែងកើតហេតុចំណុចមុខដេប៉ូដឹកខ្សាច់ ស្រាប់តែមានរថយន្តបែនដឹកខ្សាច់មួយគ្រឿងទៀតម៉ាក deawoo ក្បាលពណ៌គ្រាប់អំពិល ពាក់ផ្លាកលេខពោធិ៍សាត់ 3-A1140 បើកបរដោយបុរសម្នាក់ចេញពីការដ្ឋានខ្សាច់មកបុកចំពីមុខរថយន្តស៊េរីទំនើបពេញទំហឹង បណ្តាលឲ្យរថយន្តរងគ្រោះខ្ទេចផ្នែកខាងមុខស្ទើរទាំងស្រុង ចំណែករថយន្តបង្ករងការខូចខាតបន្តិចបន្តួច។
ក្រោយពេលកើតហេតុសមត្ថកិច្ចមូលដ្ឋាន បានចុះមកដល់រួចឲ្យភាគីទាំងសងខាងធ្វើការសម្របសម្រួលគ្នាដោយភាគីខាងបង្កព្រមសងជាសំណង ក្នុងការជួសជុលទៅលើរថយន្តរងគ្រោះបញ្ចប់រឿងនៅកន្លែងកើតហេតុ៕ រក្សាសិទ្ធិដោយ ៖សាមេត
