ភ្នំពេញ÷ ទីតាំងខារ៉ាអូខេ ២កន្លែង ត្រូវបានគណៈបញ្ជាការឯកភាពខណ្ឌពោធិ៍សែនជ័យ លួចឆ្មក់បង្ក្រាបដោយល្មើសនឹងបម្រាមរបស់សាលារាជធានីភ្នំពេញ ហើយនៅក្នុងនោះឃាត់មនុស្សប្រុសស្រីបានជាច្រើនាក់។
ហេតុការណ៍ចុះប្រតិបត្តិការលួចឆ្មក់បង្ក្រាបនេះ ធ្វើឡើងនៅមុនក្រោយគ្នាបន្ទិច នៅយប់ថ្ងៃទី ១៤ ខែមិថុនា ឆ្នាំ២០២១ ដោយកន្លែងទី១ ស្ថិតនៅតាមបណ្តោយផ្លូវបេតុង សង្កាត់កាកាបទី១ និងកន្លែងទី២ លួចឆ្មក់បង្ក្រាបនៅវេលាម៉ោង ១១និង៣០នាទីយប់ ស្ថិតនៅតាមបណ្តោយផ្លូវសហព័ន្ធរុស្សុី សង្កាត់ចោមចៅទី៣។
យោងតាមការបញ្ជាក់ពីសមត្ថកិច្ចបានឲ្យដឹងថា ដោយទីតាំងលួចបើកខារ៉ាអូខេទាំង២កន្លែងនេះ ១ មានឈ្មោះ ភោជនីដ្ឋាន ផាតធី, ទី២ មានឈ្មោះ ជីនជន ដោយមិនគរពតាមគោលការណ៍របស់សាលារាជធានីភ្នំពេញ ដោយអនុញ្ញាតឲ្យបើកត្រឹមតែភោជនីយដ្ឋានលក់ដូរធម្មតា តែដោយសមត្ថកិច្ចចុះពិនិត្យទៅឃើញថា ហាងទាំង ២កន្លែងនេះ បង្កប់ទៅដោយ KTV មានស្រីបម្រើ និងមេការនាំភ្ញៀវនៅក្នុងនោះ ទើបសមត្ថកិច្ចចុះទៅបង្ក្រាបភ្លាមៗ។
ក្រោយពេលចុះឆ្មក់បង្ក្រាបក៏បាននាំខ្លួនមនុស្សប្រុសស្រីនៅក្នុងនោះជាច្រើននាក់ យកទៅស្នងការក្រុងដើម្បីធ្វើការណែនាំ និងចាត់វិធានការទៅតាមច្បាប់៕ រក្សាសិទ្ធិដោយ៖សាមេត
