ភ្នំពេញ ៖ ករណីអំពើហិង្សាក្នុងគ្រួសារ (កូនវាយម្តាយ) ដែលជារឿងដដែលៗ ឈ្លោះប្រកែកដណ្តើមកេរមរតកជាងមួយឆ្នាំមកហើយ ស្ថិតក្នុងភូមិធំជើង សង្កាត់ពញាពន់នោះ នគរបាលយុត្តិធម៌ បានចេញលិខិតអញ្ជើញភាគីទាំងសងខាង មកធ្វើការសាកសួរ និងបំភ្លឺ នៅអធិការដ្ឋាននគរបាលខណ្ឌព្រែកព្នៅ រហូតមកដល់ថ្ងៃទី១៤ ខែមិថុនា ឆ្នាំ២០២១ ភាគីខាងកូន ឈ្មោះ ប៉ាន់ វណ្ណា មិនព្រមចូលខ្លួនមកបំភ្លឺ តាមការអញ្ជើញរបស់សមត្ថកិច្ច ដូច្នេះសមត្ថកិច្ចបានកសាងសំណុំរឿងបញ្ជូនទៅតុលាការ។
កាលពីថ្ងៃទី០៥ ខែមិថុនា ឆ្នាំ២០២១ ក្រោយពីទទួលបានព័ត៌មានពីក្រុមការងារព័ត៌មាន និង ប្រតិកម្មរហ័សនៃស្នងការដ្ឋាននគរបាលរាជធានីភ្នំពេញ ថា មានករណីហិង្សាក្នុងគ្រួសារ(កូនវាយម្តាយ)ត្រង់ចំណុច ផ្ទះគ្មានលេខ ផ្លូវ១៥១ ស្ថិតក្នុងភូមិធំជើង សង្កាត់ពញាពន់ ខណ្ឌព្រែកព្នៅ រាជធានីភ្នំពេញ កម្លាំងប៉ុស្តិ៍នគរបាលរដ្ឋបាលពញាពន់ ក៏បានចុះដល់កន្លែងកើតហេតុ និងបានអញ្ជើញភាគីទាំងសងខាងមកប៉ុស្តិ៍ដើម្បីធ្វើការសាកសួរ និងបំភ្លឺ ។
ក្រោយពីធ្វើការសាកសួររួច ភាគីទាំងសង់ខាងមិនបានដាក់ពាក្យបណ្តឹងទេ ដោយគ្រាន់តែសម្របសម្រួលគ្នារួចក៏ត្រឡប់ទៅផ្ទះវិញ(ជារឿងដដែលៗឈ្លោះប្រកែកដណ្តើមកេរមរតកជាងមួយឆ្នាំមកហើយ ។ ស្រាប់តែនៅព្រឹកថ្ងៃទី០៦ ខែមិថុនា ឆ្នាំ២០២១ ភាគីទាំងសងខាងបានមកដាក់ពាក្យបណ្តឹងប្តឹងគ្នាទៅវិញទៅមក ដោយសមត្ថកិច្ចដោះស្រាយមិនបាន លោកនាយប៉ុស្តិ៍នគរបាលរដ្ឋបាលពញាពន់ ក៏បានសុំបញ្ជូនសំណុំរឿងនេះ មកផ្នែកនគរបាលយុត្តិធម៌នៃអធិការដ្ឋាននគរបាលខណ្ឌព្រែកព្នៅ ដើម្បីធ្វើការដោះស្រាយបន្ត ក្រោយមកផ្នែកនគរបាលយុត្តិធម៌ ក៏បានចេញលិខិតអញ្ជើញភាគីទាំងសងខាង មកធ្វើការសាកសួរ និងបំភ្លឺ នៅអធិការដ្ឋាននគរបាលខណ្ឌព្រែកព្នៅ រហូតមកដល់ថ្ងៃទី១៤ ខែមិថុនា ឆ្នាំ២០២១ ភាគីខាងកូន ឈ្មោះ ប៉ាន់ វណ្ណា មិនព្រមចូលខ្លួនមកបំភ្លឺ តាមការអញ្ជើញរបស់សមត្ថកិច្ចនោះទេ ។
បច្ចុប្បន្ន ផ្នែកនគរបាលយុត្តិធម៌នៃអធិការដ្ឋាននគរបាលខណ្ឌព្រែកព្នៅ បានកសាងសំណុំរឿង បញ្ជូនទៅសាលាដំបូងរាជធានីភ្នំពេញ ដើម្បីចាក់ការតាមនីតិវិធីច្បាប់ ៕ រក្សាសិទ្ធិដោយ៖បញ្ញាស័ក្តិ