ភ្នំពេញ ÷ បុរសម្នាក់បានបើករថយន្ត MAZDA មួយគ្រឿង ក្នុងល្បឿនលឿនបើកគេច ពីសមត្ថកិច្ចកំពុងតែអនុវត្តច្បាប់ចរាចរណ៍ បានបួងចង្កូតជ្រុលទៅបុកខឿន រួចបន្តទៅបុកបង្កាន់ដៃស្ពានជ្រោយចង្វារខាងកើត បណ្តាលឲ្យរថយន្ត រងការខូចខាតផ្នែកខាងមុខយ៉ាងដំណំ។
ហេតុការណ៍គ្រោះថ្នាក់ចរាចរណ៍នេះដែរ បានកើតឡើង កាលពីវេលាម៉ោង២និង៤០នាទីរសៀល ថ្ងៃទី១៦ ខែមិថុនា ឆ្នាំ២០២១ នៅត្រង់ចំណុចស្ពានជ្រោយចង្វារ ស្ថិតនៅតាមបណ្ដោយផ្លូវជាតិលេខ១A ក្នុងសង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។
ប្រភពព័ត៌មានពីកន្លែងកើតហេតុ បានប្រាប់ឲ្យដឹងថា នៅមុនពេលកើតហេតុ គេបានឃើញបុរសម្នាក់ បានបើករថយន្តម៉ាក MAZDA ពណ៌សមួយគ្រឿង ពាក់ផ្លាកលេខភ្នំពេញ 2BH-4287 ធ្វើដំណើរតាមបណ្ដោយផ្លូវជាតិលេខ១A ក្នុងទិសដៅពីកើតមកលិចក្នុងល្បឿនមធ្យម ខណៈមកដល់ចំណុចកើតហេតុ បានគេចពីសមត្ថកិច្ចកំពុងតែអនុវត្តរឹតបន្តឹងច្បាប់ចរាចរណ៍ បានបួងចង្កូតជ្រុលទៅបុកខឿន រួចបន្តទៅបុកបង្កាន់ដៃស្ពានជ្រោយចង្វារ រងការខូចខាត។ សំណាងល្អនៅក្នុងហេតុការណ៍ គ្រោះថ្នាក់ចរាចរណ៍មួយនេះ មិនបង្កឲ្យមានអ្នកណាម្នាក់ រងរបួសនោះទេ រងការខូចខាតតែរថយន្ត និងបង្កាន់ដៃស្ពានជាទ្រព្យសម្បត្តិរដ្ឋ។
ក្រោយពេលកើតហេតុ សមត្ថកិច្ចមូលដ្ឋានបានចុះមកដល់រួចក៏បានទំនាក់ទំនង ទៅខាងជំនាញចរាចរណ៍ក្រុង ឱ្យចុះមកវាស់វែង យករថយន្តស្ទូចមកស្ទូចយករថយន្តបង្កខាងលើ ទៅរក្សាទុកនៅការិយាល័យចរាចរណ៍ផ្លូវគោក រង់ចាំដោះស្រាយនៅពេលក្រោយ៕ រក្សាសិទ្ធិដោយ៖ សា មេត
