កណ្តាល៖ បុរសម្នាក់រួមដំណើរជាមួយស្ត្រីម្នាក់ទៀតបានបើករថយន្ត Lexus GS 300 មួយគ្រឿងក្នុងល្បឿនលឿនបានជ្រុលចង្កូតទៅបុករះចូលផ្ទះប្រជាពលរដ្ឋទាំងកណ្តាលយប់បណ្តាលឲ្យរងការខូចខាតថូផ្កា និងទ្វារផ្ទះ រួមទាំងសម្ភារមួយចំនួនទៀត និងរងរបួសបុរសជាអ្នកបើកបរ ចំណែកឯស្ត្រីរួមដំណើរជាមួយបានរត់ចេញពីកន្លែងកើតហេតុបាត់ស្រមោល។
ហេតុការណ៍គ្រោះថ្នាក់ចរាចរណ៍នេះដែរ បានកើតឡើងកាលពីវេលាម៉ោង១០នឹង៣០នាទីយប់ ថ្ងៃទី១៨ ខែមិថុនា ឆ្នាំ២០២១ ត្រង់ចំណុចស្តុបព្រែកហូរ ស្តិតនៅតាមបណ្តោយផ្លូវ១១៥ សង្កាត់តាក្តុល ក្រុងតាខ្មៅ ខេត្តកណ្តាល។
បើយោងតាមប្រភពព័ត៌មានពីប្រជាពលរដ្ឋនៅកន្លែងកើតហេតុបានប្រាប់ឲ្យដឹងថា នៅមុនពេលហេតុការណ៍គេបានឃើញរថយន្តម៉ាក Lexus GS300 ឡែនពណ៌ខ្មៅមួយគ្រឿងពាក់ផ្លាកលេខភ្នំពេញ 2-C 4426 បើកបរដោយបុរសម្នាក់រួមដំណើរជាមួយនិងស្ត្រីម្នាក់ទៀតធ្វើដំណើរតាមបណ្ដោយផ្លូវ១១៥ក្នុងទិសដៅពីត្បូងមកជើងក្នុងល្បឿនលឿន ខណៈពេលមកដល់ចំណុចកើតហេតុបានជ្រុលចង្កូតទៅបុករះធូផ្ការ និងទ្វារផ្ទះប្រជាពលរដ្ឋរងការខូចខាតអស់មួយចំនួន ចំណែកឯរថយន្តបង្កវិញខ្ទេចផ្នែកខាងមុខស្ទើរទាំងស្រុង។
ក្រោយពេលកើតហេតុសមត្ថកិច្ចខាងជំនាញចរាចរណ៍ក្រុងតាខ្មៅចុះមកដល់រួចធ្វើការវាស់វែងយករថយន្តស្ទូចមកស្ទូចយករថយន្តបង្កខាងលើទៅរក្សាទុកនៅអធិការដ្ឋានក្រុងតាខ្មៅរង់ចាំដោះស្រាយនៅពេលក្រោយ៕ រក្សាសិទ្ធិដោយ៖ សាមេត
