រដ្ឋមន្រ្តីការបរទេសប៉ាគីស្ថានបាននិយាយថា អំពើហឹង្សានិងភាពគ្មានច្បាប់ អាចនឹងកើតមាននៅក្នុងប្រទេសអាហ្វហ្គានីស្ថាន បន្ទាប់ពីសហរដ្ឋអាមេរិកបានដកទ័ពចេញ ហើយថា ប៉ាគីស្ថាននឹងបិទព្រំដែនរបស់ខ្លួន ជាមួយប្រទេសនេះប្រសិនបើក្រុមតាលីបង់កាន់កាប់។
លោក Shah Mahmood Qureshi បាននិយាយថា ប្រទេសប៉ាគីស្ថាន បានទទួលយកជនភៀសខ្លួនអាហ្វហ្គានីស្ថានចំនួន ៣.៥ លាននាក់អស់រយៈពេលជាច្រើនឆ្នាំមកហើយ ប៉ុន្តែនឹងមិនទទួលយកទៀតទេ។ ការថ្លែងបែបនេះបន្ទាប់ពីលោកបាននិយាយនៅក្នុងសន្និសីទសារព័ត៌មានប្រចាំសប្តាហ៍ដែលបានធ្វើឡើងនៅកណ្តាលទីក្រុង Multan ។
លោកថា៖« យើងមិនអាចយកអ្វីបន្ថែមទៀតទេ យើងនឹងត្រូវបិទព្រំដែនរបស់យើង ហើយយើងត្រូវការពារផលប្រយោជន៍ជាតិរបស់យើង»។ លោកបន្ថែមថា ប៉ាគីស្ថាននឹងបន្តកិច្ចខិតខំប្រឹងប្រែងការទូតរបស់ខ្លួនដើម្បីសន្តិភាពនៅក្នុងប្រទេសនិងស្វាគមន៍មេដឹកនាំដែលបានជាប់ឆ្នោតតាមបែបប្រជាធិបតេយ្យ។
ជនជាតិអាហ្វហ្កានរាប់លាននាក់បានភៀសខ្លួន ទៅកាន់ប្រទេសប៉ាគីស្ថាន ពីការប៉ះទង្គិចគ្នារវាងក្រុម Mujahideen បន្ទាប់ពីការដកទ័ពសូវៀតនៅឆ្នាំ ១៩៨៩ ។
ពួកតាលីបង់បានគ្រប់គ្រងប្រទេសអាហ្វហ្គានីស្ថាន រហូតដល់ពួកគេត្រូវបានបណ្តេញ ចេញដោយក្រុមចម្រុះដឹកនាំ ដោយសហរដ្ឋអាមេរិក បន្ទាប់ពីការវាយប្រហារថ្ងៃទី ១១ ខែកញ្ញាឆ្នាំ ២០០១ នៅអាមេរិក។ ក្នុងប៉ុន្មានសប្តាហ៍ថ្មីៗនេះអ្នកប្រយុទ្ធតាលីបង់ បានវាយលុកស្រុកជាច្រើននៅភាគខាងត្បូង និងខាងជើងប្រទេសអាហ្វហ្គានីស្ថាន ដោយបញ្ចុះបញ្ចូលកងកម្លាំងសន្តិសុខរដ្ឋាភិបាលឱ្យចុះចាញ់ និងរឹបអូសអាវុធនិងយានយន្តយោធា៕
ប្រភព៖ AP
រក្សាសិទ្ធិដោយ៖CEN