ជាការឆ្លើយតបនឹងទង្វើដែលប្រធានាធិបតីអាមេរិកដូណាល់ ត្រាំ បានអនុវត្តទៅលើផលិតផលនាំចូលពីប្រទេសចិន ថ្មីៗនេះចិនបានព្រមានអាមេរិក ហើយអះអាងថា ៖ ពុំខ្លាចមានសង្គ្រាមពាណិជ្ជកម្មមួយនេះទេ!។
មុនពេលដាក់ពាក្យបណ្តឹងទៅកាន់ WTO ប្រធានាដធិបតីអាមេរិកឲ្យដោះស្រាយជំម្លោះតាមរយៈការចរចា។
ចិនបានប្រកាសជាសាធារណៈនូវបញ្ជីរាយនាមផលិតផល អាចប្រឈមមុខនឹងអត្រាពន្ធឡើងដល់ ២៥% ដែលរួមមាន ផ្លែឈើស្រស់ សាច់ជ្រូក ឬស្រាទំពាំងបាយជូរពីអាមេរិក។ តម្លៃនាំចូលនៃទំនិញទាំងនេះ មានប្រមាណ ៣០០០លានដុល្លារក្នុង១ឆ្នាំ។
ក្រសួងពាណិជ្ជកម្មចិនឲ្យដឹងថា ៖ “ចិនពុំចង់ចូលរួមក្នុងសង្គ្រាមពាណិជ្ជកម្មមួយណានោះទេ ប៉ុន្តែក៏ពុំខ្លាចក្នុងការធ្វើសង្គ្រាមយ៉ាងពេញលេញមួយដែរ”។
តាមក្រសួងនេះ ឲ្យដឹងថា មានមុខទំនិញប្រមាណ ១២០មុខ ដែលនាំចេញពីអាមេរិក ក្នុងតម្លៃប្រមាណ ១.០០០លានដុល្លារ អាចត្រូវរងអត្រាពន្ធ ១៥% ប្រសិនបើអាមេរិក ពុំអាចមានការព្រមព្រៀងដោះស្រាយបញ្ហាជម្លោះពាណិជ្ជកម្មក្នុងអំឡុងពេលមួយជាកំណត់។
ទន្ទឹមនោះ អត្រាពន្ធ ២៥% តាមគម្រោង នឹងត្រូវបានចិនអនវត្តលើមុខទំនិញ ៨ ដែលមានតម្លៃនាំចេញពីអាមេរិកប្រមាណ ២.០០០លានដុល្លារ បន្ទាប់ពីក្រុងប៉េកាំងពិនិត្យវាយតម្លៃលើវិធានការដោះស្រាយបញ្ហារបស់អាមេរិក។
តាមក្រុងប៉េកាំងទង្វើនេះគឺសំដៅឆ្លើយតបចំពោះការបង្កើតរបាំងពន្ធដែលអាមេរិកអនុវត្តចំពោះផលិតផល អាយុមីញ៉ូម ដែកថែប ចិននាំចូលទៅកាន់ប្រទេសអាមេរិក។ មុននោះ ប្រធានាធិបតីអាមេរិកដូណាល់ ត្រាំ បានចុះហត្ថលេខាលើក្រិតជាផ្លូវការដើម្បីអនុវត្តអត្រាពន្ធ ២៥% ចំពោះដែកថែប និង ១០%ចំពោះអាលុយមីញ៉ូម ដែលនាំចូលប្រទេសអាមេរិក ។ ខណៈពេលនោះនៅថ្ងៃទី ២៣ មីនា ម្សិលមិញនេះ រដ្ឋការត្រាំ ក៏បានប្រកាសលើកលែងពន្ធជាបណ្តោះអាសន្នដល់ប្រទេសដែលត្រូវបានអាមេរិកចាត់ទុកជាសម្ព័ន្ធមិត្តរួមមាន សហគមអឺរ៉ុប (EU) កូរ៉េខាងត្បូង ប្រេស៊ីល ម៉ិចស៊ីកូ និងកាណាដា ។
តាមរយទ័រ ការកែទម្រង់នេះត្រូវបានចាត់ទុកថា កំពុងផ្តោតលើផលិតផលអាលុយមីញ៉ូម ដែកថែប របស់ចិន។
ទង្វើឆ្លើយតបរបស់ចិន គឺជាការព្រមានខ្លាំងមួយចំពោះអាមេរិក ហើយហាក់ដូចជា ខឿនសេដ្ឋកិច្ចធំបំផុតពិភពលោកទាំងពីរនេះ កំពុងត្រៀមបម្រុងសម្រាប់សង្គ្រាមពាណិជ្ជកម្មមួយ។ ក្រុងប៉េកាំង ក៏បានឲ្យដឹងថា ប្រទេសនេះនឹងប្តឹងប្រទេសអាមេរិកទៅកាន់អង្គការពិភពលោក (WTO) ប៉ុន្តែចំពោះមុខគេអំពាវនាវឲ្យមានដំណោះស្រាយជម្លោះតាមរយៈកិច្ចចរចាជាមុនសិន៕ សូយន