ភ្នំពេញ ៖ ប្រមុខការទូតកម្ពុជា បានថ្លែងថា លោក Taro Kono រដ្ឋមន្ត្រីការបរទេសជប៉ុន នឹងមកធ្វើដំណើរទស្សនកិច្ចផ្លូវការនៅកម្ពុជា ក្នុងខែមេសាខាងមុខនេះ ដែលនឹងជារួមចំណែកដ៏សំខាន់មួយទៀត ក្នុងការលើកស្ទួយទំនាក់ទំនងមិត្តភាព និងកិច្ចសហប្រតិបត្តិការជាដៃគូយុទ្ធសាស្ត្រកម្ពុជានិងជប៉ុន។
នេះតាមសេចក្តីប្រកាសព័ត៌មាន របស់ក្រសួងការបរទេស និងកិច្ចសហប្រតិបត្តិការអន្តរជាតិ នៅថ្ងៃទី២៥ ខែមីនា ឆ្នាំ២០១៨នេះជុំវិញលទ្ធផលនៃជំនួបសម្តែងការគួរសម និងពិភាក្សាកងារងារ រវាងលោកទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងលោក Kentaro Sonoura ទីប្រឹក្សារបស់នាយករដ្ឋមន្ត្រីជប៉ុន នៅថ្ងៃទី២៣ ខែមីនា ឆ្នាំ២០១៨។
លោកទេសរដ្ឋមន្ត្រី ប្រាក់ សុខុន បានថ្លែងបញ្ជាក់ថា អាទិភាពសំខាន់របស់កម្ពុជា គឺការរក្សាឲ្យបាននូវសន្តិភាព ស្ថិរភាពដែលជាលក្ខខណ្ឌចម្បង និងចាំបាច់មិនអាចខ្វះបាន សម្រាប់ការអភិវឌ្ឍសេដ្ឋកិច្ច ក៏ដូចជាការពង្រឹងលទ្ធិប្រជាធិបតេយ្យ និងការគោរពសិទ្ធមនុស្ស។
ក្នុងជំនួបនោះ លោក ប្រាក់ សុខុន បានបកស្រាយលម្អិតជម្រាបជូន លោក Kentaro Sonoura អំពីសភាពការណ៍បច្ចុប្បន្ននៅកម្ពុជា និងបានគូសបញ្ជាក់ច្បាស់ថា ការចាត់វិធានការរបស់ស្ថាប័ននីតិប្បញ្ញត្តិ ប្រតិបត្តិ និងតុលាការកន្លងមក គឺផ្អែកលើអង្គហេតុច្បាស់លាស់ និងច្បាប់ជាធរមាននានារបស់កម្ពុជា ក្នុងគោលដៅទប់ស្កាត់ការប៉ុនប៉ងផ្តួលរំលំរាជរដ្ឋាភិបាលស្របច្បាប់ នៅកម្ពុជា តាមវិធីមិនប្រជាធិបតេយ្យ ពង្រឹងនីតិរដ្ឋ ការពារឯករាជ្យ និងអធិបតេយ្យ ប្រឆាំងការជ្រៀតជ្រែករបស់បរទេសចូលកិច្ចការផ្ទៃក្នុងកម្ពុជា ហើយនឹងដើម្បីរក្សាសន្តិភាព ស្ថិរភាព ដែលកម្ពុជាទទួលបានដោយការតស៊ូដ៏លំបាកវេទនាខ្លាំងក្លាបំផុត។
លោកទេសរដ្ឋមន្ត្រី បានសម្តែងនូវអំណរគុណដ៏ជ្រាលជ្រៅរបស់រាជរដ្ឋាភិបាល និងប្រជាជនកម្ពុជា សម្រាប់ជំនួយឧបត្ថម្ភដ៏ថ្លៃថ្លារបស់ជប៉ុន ចំពោះដំណើរការសន្តិភាព ក៏ដូចជាដំណើរការស្តារនិងកសាងកម្ពុជាឡើងវិញ ហើយបានគូសបញ្ជាក់ថាជំនួយរបស់ជប៉ុនបានរួមចំណែកយ៉ាងសំខាន់ក្នុងកិច្ចអភិវឌ្ឍកម្ពុជា។
លោក Kentaro Sonoura ទីប្រឹក្សានាយករដ្ឋមន្ត្រីជប៉ុន បានថ្លែងអំពីការយកចិត្តទុកដាក់របស់រាជរដ្ឋាភិបាលជប៉ុនចំពោះទំនាក់ទំនងមិត្តភាព និងកិច្ចសហប្រតិបត្តិការលើគ្រប់វិស័យជាមួយកម្ពុជា ហើយលោកក៏បានលើកឡើងចំពោះការត្រៀមលក្ខណៈរបស់ប្រទេសទាំងពីរ ក្នុងការប្រារព្ធខួបលើកទី៦៥ នៃទំនាក់ទំនងការទូត ក៏ដូចជាការត្រៀមរៀបចំសម្រាប់ដំណើរទស្សនកិច្ចរបស់លោករដ្ឋមន្ត្រីការបរទេសជប៉ុន មកកាន់កម្ពុជា។
នៅក្នុងជំនួបនោះ លោកទេសរដ្ឋមន្ត្រី ក៏បានធ្វើការបកស្រាយលម្អិតជម្រាបលោកទីប្រឹក្សា អំពីសភាពការណ៍បច្ចុប្បន្ននៅកម្ពុជា និងបានគូសបញ្ជាក់ច្បាស់ថាការចាត់វិធានការរបស់ស្ថាប័ននីតិប្បញ្ញត្តិ ប្រតិបត្តិ និងតុលាការ កន្លងមក គឺផ្អែកលើអង្គហេតុច្បាស់លាស់ និងច្បាប់ជាធរមាននានារបស់កម្ពុជា ក្នុងគោលដៅទប់ស្កាត់ការប៉ុនប៉ងផ្តួលរំលំរដ្ឋាភិបាលស្របច្បាប់ នៅកម្ពុជា តាមវិធីមិនប្រជាធិបតេយ្យ ពង្រឹងនីតិរដ្ឋ ការពារឯករាជ្យ និងអធិបតេយ្យ ប្រឆាំងការជ្រៀតជ្រែករបស់បរទេសចូលកិច្ចការផ្ទៃក្នុងកម្ពុជា ហើយនិងដើម្បីរក្សាសន្តិភាព ស្ថិរភាព ដែលកម្ពុជាទទួលបានដោយការតស៊ូដ៏លំបាកវេទនាខ្លាំងក្លាបំផុត។ លោកទេសរដ្ឋមន្ត្រី បានគូសបញ្ជាក់ថា កន្លងមកកម្ពុជាបានផ្តល់នូវការបកស្រាយយ៉ាងច្បាស់លាស់អំពីបញ្ហាទាំងអស់នេះ ជូនទៅសហគមន៍អន្តរជាតិ តែអ្វីដែលជាការលំបាកសម្រាប់កម្ពុជា ដែលជាប្រទេសតូចមួយ គឺលទ្ធភាពនៃការយកឈ្នះទៅលើឥទ្ធិពលនៃក្បាលម៉ាស៊ីនឃោសនា ដ៏ខ្លាំងក្លាដែលនៅពីក្រោយយុទ្ធនាការប្រឆាំងកម្ពុជា តាមរយៈការឃោសនាផ្សព្វផ្សាយព័ត៌មានមិនពិតអំពីកម្ពុជា ដែលការឃោសនានេះ បានជះឥទ្ធិពលអវិជ្ជមានយ៉ាងខ្លាំង និងបានបង្កការយល់ខុសឆ្គងចំពោះសភាពការណ៍ជាក់ស្តែងនៅកម្ពុជា។
លោក Kentaro Sonoura ទីប្រឹក្សានាយករដ្ឋមន្ត្រីជប៉ុន បានគូសបញ្ជាក់អំពីជំហររបស់រដ្ឋាភិបាលជប៉ុន គោរពកិច្ចការផ្ទៃក្នុង និងច្បាប់របស់កម្ពុជា ចង់ឃើញកម្ពុជាមានទំនាក់ទំនងល្អជាមួយសហគមន៍អន្តរជាតិ ហើយទន្ទឹមនឹងនោះ ចង់ឃើញកម្ពុជារក្សាបាននូវសន្តិភាព ស្ថេរភាព និងការអភិវឌ្ឍដែលកម្ពុជារក្សាបានរហូតមកដល់ពេលបច្ចុប្បន្ននេះ៕ ដោយ ៖ បញ្ញាស័ក្តិ