អ្នកប្រើប្រាស់ហ្វេសម្នាក់ នៅប៉ុន្មានម៉ោងមុននេះ (ថ្ងៃទី២៤ ខែកក្កដា ឆ្នាំ២០២១) បានផុសរូបភាពដ៏សោគសង្រេងមួយ ចែករំលែកតៗគ្នា បង្ហាញគិលានុបដ្ឋាយិកា និងបុគ្គលិកពេទ្យប្រុសស្រីជាច្រើននាក់ បានជួរជាឈរអមសងខាងផ្លូវដើរ ស្ថិតក្នុងទឹកមុខដ៏ក្រៀមក្រំបំផុត ដើម្បីជូនដំណើរសពអ្នកគ្រូពេទ្យម្នាក់ ដែលបានស្លាប់បាត់បង់ជីវិត ដោយសារឆ្លងជំងឺកូវីដ-១៩ ពីការងារដ៏លះបង់របស់គាត់ ចេញពីមន្ទីរពេទ្យមួយកន្លែង នៅក្នុងទីក្រុងបាងកក។
អ្នកបង្ហោះនោះ បានរៀបរាប់ទាំងអារម្មណ៍ក្តុកក្តួលថា «ខ្ញុំទទួលយកមិនបានទេ ពេលឃើញបែបនេះ! ខ្ញុំសឹងតែលែងខ្វល់អ្នកណាទាំងអស់។ សូមបងស្រីជាទីស្រឡាញ់របស់ប្អូន សម្រាកចុះ បងហត់នឿយពេកហើយ។ កូវីដ ពិតជាសាហាវណាស់ បានឆក់យកជីវិតគិលានុបដ្ឋាយិកាជាទីស្រឡាញ់របស់ខ្ញុំ ប្អូនលែងបានឃើញបងស្រីទៀតហើយ ចាប់ពីពេលនេះទៅ!!»។
បើតាមប្រភពបានឲ្យដឹងថា សពអ្នកគ្រូពេទ្យ Praepat Thanyawat Taweesuk ត្រូវបានបញ្ជូនចេញពីមន្ទីរពេទ្យ កាសេមរ៉ាត់ ក្នុងសង្កាត់បាងខា ទីក្រុងបាងកក នៅវេលាម៉ោង ១ រសៀល ថ្ងៃទី២៤ ខែកក្កដា ឆ្នាំ២០២១ នេះ និងត្រូវបានបូជានៅវត្ត បាងមឿង ស្រុកបាងយ៉ៃ ខេត្តណងថាបូរី ហើយធាតុរបស់គាត់ត្រូវបានយកទៅស្រុកកំណើតនៅក្នុងខេត្ត ណាខន រ៉ាឆាស៊ីម៉ា ផងដែរ៕ រក្សាសិទ្ធិដោយ៖ លឹម ហុង
