ភ្នំពេញ ៖ ករណីជនត្រូវចោទ កឹម សុខា អតីតប្រធាននៃអតីតគណបក្សសង្គ្រោះជាតិ សុំនៅក្រៅឃុំ ត្រូវបានសាលាឧទ្ធរណ៍ នាព្រឹកថ្ងៃទី២៧ ខែមីនា នេះ បន្ដបើកសវនាការ ក្រោមបទចោទប្រកាន់ សន្និដ្ឋិភាពជាមួយបរទេស។
លោកអ៊ូច កែនបូ ក្រឡាបញ្ជីនៃសាលាឧទ្ធរណ៍ បានចេញលិខិតអញ្ជើញលោកសំ សុគង់ មេធាវីការពារក្តីឲ្យលោកកឹម សុខា បន្តបើកសវនាការរបស់សាលាឧទ្ធរណ៍ ដើម្បីជំនុះជម្រះរឿងស៊ើបសួរពីបទ សន្និដិ្ឋភាពជាមួយបរទេស នៅព្រឹកថ្ងៃទី២៧ខែមីនាឆ្នាំ២០១៨។
លោកម៊ុត ចន្ថា នាយកខុទ្ទកាល័យលោកកឹម សុខា បានបញ្ជាក់នៅលើផេកហ្វេសប៊ុកនាព្រឹកថ្ងៃទី២៧ខែមីនានេះថា ៣វត្តមានរបស់ ឯកឧត្តម កឹម សុខា ប្រធានគណបក្សសង្គ្រោះជាតិ ពុំមានវត្តមាននៅក្នុងសវនការនៃសាលាឧទ្ធរណ៍ នៅព្រឹកនេះ តាមការគ្រោងទុកទេ”។
ផ្លូវនៅជុំវិញ សាលាឧទ្ធរណ៍ត្រូវបានបិទ ដាក់របងដែករាំងផ្លូវ ដោយមានទាំងសមត្ថកិច្ចចម្រុះផងដែរ។
លោក កឹម សុខា ត្រូវបានចោទប្រកាន់ពីបទ សន្ទិដ្ឋិភាពជាមួយបរទេស តាមមាត្រា៤៤៣ នៃក្រមព្រហ្មទណ្ឌ។ បទសន្ទិដ្ឋិភាពជាមួយបរទេស គឺជាអំពើត្រូវរ៉ូវគ្នាដោយសម្ងាត់ជាមួយរដ្ឋបរទេស ឬភ្នាក់ងារបរទេស ដើម្បីបង្កើតឱ្យមានអំពើប្រទូស្តរ៉ាយ ឬឱ្យមានអំពើឈ្លានពានប្រឆាំងនឹងព្រះរាជាណាចក្រកម្ពុជា។ បទល្មើសនេះ ត្រូវជាប់ពន្ធនាគារពី១៥ ដល់៣០ឆ្នាំ។
លោក កឹម សុខា ត្រូវបានសមត្ថកិច្ចចាប់ខ្លួននៅពាក់កណ្តាលអាធ្រាត្រ ឈានចូលថ្ងៃទី៣ ខែកញ្ញា ឆ្នាំ២០១៧។ ក្រោយឃាត់ខ្លួន សមត្ថកិច្ចបានបញ្ជូនលោក កឹម សុខា ទៅឃុំបណ្តោះអាសន្ននៅពន្ធនាគារត្រពាំងផ្លុង ខេត្តត្បូងឃ្មុំ៕ ដោយ ៖ បញ្ញាស័ក្តិ
