នេះគឺជាទិដ្ឋភាពនៃរូបភាពអាចចាត់ទុកថាជាលើកទី១ហើយ សម្រាប់ប្រទេសវៀតណាម ខណៈដែលប្រជាពលរដ្ឋយ៉ាងច្រើន បានកំពុងសម្រុកចាកចេញពីទីក្រុងហូជីមិញ បន្ទាប់ពីទីក្រុងនេះត្រូវបានបិទខ្ទប់ ដោយសារករណីឆ្លងជំងឺកូវីដ១៩ បានផ្ទុះរាតត្បាតកាន់តែធ្ងន់ធ្ងរ ពីមួយថ្ងៃទៅមួយថ្ងៃ។
យោងតាមប្រភពព័ត៌មានបានឲ្យដឹងថា បន្ទាប់ពីបទខ្ទប់ទីក្រុងហូជីមិញ ពលរដ្ឋវៀតណាមរាប់ពាន់នាក់ ដែលបាត់បង់ការងារធ្វើ បានបង្ខំចិត្តចាកចេញពីក្រុងហូជីមិញ (ព្រៃនគរ) វិលត្រឡប់ទៅស្រុកកំណើតរបស់ពួកគេវិញ តាមរយៈមធ្យោបាយម៉ូតូផ្ទាល់ខ្លួន ដែលខ្លះមានចម្ងាយផ្លូវរហូតជាង១ពាន់គីឡូម៉ែត្រ ឬប្រើរយៈពេលធ្វើដំណើរ ៣០ ម៉ោង ទាំងយប់ទាំងថ្ងៃដ៏ប្រថុយសុវត្ថិភាពតាមផ្លូវជាខ្លាំង។ ជាក់ស្តែង គឺពួកគេត្រូវសម្រាកនៅតាមផ្លូវពីរបីថ្ងៃ ទម្រាំដល់ផ្ទះពួកគេ។
ពលរដ្ឋម្នាក់ឈ្មោះ Phuong បាននិយាយថា ដំបូង គឺគាត់ចង់ស្នាក់នៅក្នុងទីក្រុង រហូតចប់នៃការរីករាលជំងឺកូវីដ។ ប៉ុន្តែ ដោយសារការរង់ចាំកាន់តែយូរទៅៗ ខណៈការងារក៏អត់មានធ្វើ ហើយអារម្មណ៍កាន់តែស្រ្តេស ជាហេតុធ្វើឲ្យគាត់សម្រេចចិត្ត ចាកចេញពីទីក្រុង វិលត្រឡប់ទៅស្រុក។ លោក Phuong ក៏បានបញ្ចេញអារម្មណ៍មួយនេះថា ក្នុងមួយជីវិតរបស់គាត់ៗ មិនដែលគិតថា នឹងត្រូវដេកតាមផ្លូវដូចមនុស្សគ្មានផ្ទះសម្បែងបែបនេះនោះទេ តែនេះជាលើកទី១ហើយ ដែលកូវីដបានធ្វើឲ្យពួកគាត់បានស្គាល់រសជាតិជីវិតដេកតាមផ្លូវ។
ពលរដ្ឋរូបនេះ នៅបានឲ្យដឹងទៀតថា គាត់ និងប្រពន្ធកូនពិតជាស្រែកឃ្លានអាហារ និងទឹកជាខ្លាំង ព្រោះថា នៅតាមផ្លូវពុំមានអ្នកលក់ដូរនោះទេ ដោយសារប្រហែលពួកគេខ្លាចឆ្លងជំងឺ។ ប៉ុន្តែ សំណាងល្អ បានមកដល់ប៉ុស្តិ៍ប៉ូលីសនៅ Binh Thuan ប៉ូលីសបានផ្តល់នំប៉័ង ទឹកដោះគោ និងទឹកផឹក អាចបន្តដំណើរទៅមុខទៀត។
ចំណែកពលរដ្ឋម្នាក់ទៀតឈ្មោះ Chua បាននិយាយថា៖ «យើងគ្មានជម្រើសទៀតទេ។ ប្រសិនបើយើងនៅបន្តស្នាក់នៅក្នុងទីក្រុង នោះយើងនឹងគ្មានអាហារហូបចុក ខណៈការងារក៏គ្មានធ្វើ។ ហើយអ្វីដែលមិននឹកស្មាននោះ គឺសូម្បីតែសំបុតរថភ្លើងធ្វើដំណើរ ក៏មិនមែនដែរ។ ហេតុនេះ ពួកយើងបង្ខំចិត្តជិះម៉ូតូ ទោះបីអាចប្រឈមគ្រោះថ្នាក់តាមផ្លូវយ៉ាងណាក៏ដោយចុះ»។
គួរបញ្ជាក់ថា នៅពេលនេះ ពលរដ្ឋវៀតណាម បាននិងកំពុងសម្រុកចាកចេញវិលត្រឡប់ទៅស្រុកកំណើតពីក្រុង ហូជីមិញ និង ប៊ិញ ដុង។ ប៉ុន្តែ ភាគច្រើន ៨០% គឺចាកចេញពីក្នុងទីក្រុងហូជីមិញ តែម្តង៕ រក្សាសិទ្ធិដោយ៖ លឹម ហុង
