ភ្នំពេញ៖ លោក សាយ សំអាល់ រដ្ឋមន្ត្រីក្រសួងបរិស្ថាន បានលើកឡើងថា «សុខសន្តិភាព គឺជាកត្តាដែលមិនអាចខ្វះបានក្នុងការគ្រប់គ្រងបរិស្ថាន ការដោះស្រាយបញ្ហាការប្រែប្រួលអាកាសធាតុ និងអភិវឌ្ឍន៍សេដ្ឋកិច្ចជាតិ។ រាជរដ្ឋាភិបាល បាននិងកំពុងចាប់យកកាលានុវត្តភាព តាមរយៈការវិនិយោគចម្បងៗ ដែលអាចជំរុញកំណើនសេដ្ឋកិច្ចបានឆាប់រហ័ស»។
ការលើកឡើងបែបនេះ របស់លោក សាយ សំអាល់ បានធ្វើឡើង អំឡុងពេលជួបប្រជុំពិភាក្សាការងារជាមួយ លោក James Larsen អ្នកសម្របសម្រួលកិច្ចការប្រែប្រួលអាកាសធាតុ និងលោក Pablo Kang ឯកអគ្គរដ្ឋទូតប្រទេសអូស្រ្តាលី ប្រចាំនៅកម្ពុជា នាថ្ងៃទី៣០ ខែសីហា ឆ្នាំ២០២១ ម្សិលមិញ។
កិច្ចប្រជុំដែលផ្តោតសំខាន់លើទស្សនៈវិស័យរបស់ប្រទេសអូស្រ្តាលី និងរាជរដ្ឋាភិបាលកម្ពុជាសម្រាប់សន្និបាតសហប្រជាជាតិលើកទី២៦ ស្តីពីការប្រែប្រួលអាកាសធាតុ។
លោក James Larsen បានថ្លែងអំណរគុណលោករដ្ឋមន្ត្រី សាយ សំអាល់ ដែលបានឆ្លៀតពេលដ៏មមាញឹក ដើម្បីពិភាក្សាកិច្ចការងារប្រែប្រួលអាកាសធាតុ។ លោកបានបញ្ជាក់ថា ប្រទេសអូស្រ្តាលី បានផ្តល់ការគាំទ្រជាច្រើនដល់បណ្តាប្រទេសតាមដងទន្លេមេគង្គ រួមមានប្រទេសកម្ពុជា ក្នុងការគ្រប់គ្រងធនធានទឹក និងការអប់រំបរិស្ថាន។ ចំពោះសន្និបាតសហប្រជាជាតិលើកទី២៦ ស្តីពីការប្រែប្រួលអាកាសធាតុ ប្រទេសអូស្រ្តាលី គាំទ្រដល់ចក្រភពអង់គ្លេស ក្នុងការរៀបចំកិច្ចប្រជុំទល់មុខគ្នា ដែលផ្តលឱកាសដល់គ្រប់រដ្ឋជាសមាជិកបានជជែកគ្នាដោយផ្ទាល់។
លោកបានបន្តថា ប្រទេសអូស្រ្តាលី បានផ្តួចផ្តើមឱ្យមានពិភាក្សាគ្នាអំពីការផលិតអគ្គីសនីដោយប្រើប្រាស់ឧស្ម័នអ៉ីដ្រូសែន នៅក្នុងសន្និបាតសហប្រជាជាតិ ស្តីពីការប្រែប្រួលអាកាសធាតុ ដើម្បីជាជម្រើសមួយដ៏ប្រសើរសម្រាប់លើកកម្ពស់ផែនការ កាត់បន្ថយការបញ្ចេញឧស្ម័នផ្ទះកញ្ចក់ឱ្យនៅកម្រិតសូន្យនៅឆ្នាំ២០៥០។
ជាការឆ្លើយតប លោករដ្ឋមន្ត្រីក្រសួងបរិស្ថាន បានសម្តែងនូវស្វាគមន៍ចំពោះការលើកឡើងរបស់ភាគីអូស្រ្តាលី ក្នុងការប្រយុទ្ធប្រឆាំងនឹងការប្រែប្រួលអាកាសធាតុ ក៏ដូចជាបញ្ហាបរិស្ថានសកល។
រដ្ឋមន្រ្តី សាយ សំអាល់ បានលើកជាសំណើ២ រួមមានទី១៖ បង្កើតមជ្ឈមណ្ឌល់ចែករំលែកព័ត៌មានអំពីថាមពលឧស្ម័នអ៉ីដ្រូសែន ដោយមានការចូលរួមពីក្រសួងបរិស្ថាន គ្រឹះស្ថានសិក្សាស្រាវជ្រាវរបស់ប្រទេសកម្ពុជា និងប្រទេសអូស្រ្តាលី និងទី២៖ បង្កើតឱ្យមានផែនទីបង្ហាញផ្លូវក្នុងការពង្រឹងកិច្ចសហប្រតិបត្តិការអភិវឌ្ឍន៍សេដ្ឋកិច្ចរវាងកម្ពុជា និងអូស្រ្តាលី៕ រក្សាសិទ្ធិដោយ៖បញ្ញាស័ក្តិ
