ភ្នំពេញ ÷ យុវជនម្នាក់បានបាត់បង់ជីវិត នៅនឹងកន្លែងកើតហេតុភ្លាមៗ បន្ទាប់ពីជិះម៉ូតូឌ្រីមសង់មួយគ្រឿង ក្នុងល្បឿនលឿនខ្វះការប្រុងប្រយ័ត្នជ្រុលទៅធ្លាក់ បណ្តាលម៉ូតូដួលអូសទៅមុខជាច្រើនម៉ែត្រ ចំណែកជនរងគ្រោះខ្ទាត ទៅខាងត្រូវរថយន្តកិនពីលើស្លា.ប់ភ្លាមៗ។
ហេតុការណ៍គ្រោះថ្នាក់ចរាចរណ៍នេះដែរ បានកើតឡើងកាលពីវេលាម៉ោង ៩និង៤០នាទីយប់ ថ្ងៃទី២ ខែកញ្ញា ឆ្នាំ២០២១ ចំណុចស្តុបផ្សារមាន់អាំង ស្ថិតនៅតាមបណ្តោយផ្លូវ៣១៥ កែងនឹងផ្លូវ៥៩២ ក្នុងសង្កាត់បឹងកក់ទី២ ខណ្ឌទួលគោក រាជធានីភ្នំពេញ។
សពជនរងគ្រោះនៅពុំទាន់ស្គាល់អត្តសញ្ញាណ នៅឡើយ បច្ចុប្បន្នសព កំពុងតែតម្កល់ទុកនៅវត្តទឹកថ្លា។
យោងតាមប្រភពព័ត៌មាន ពីពលរដ្ឋនៅកន្លែងកើតហេតុ បានប្រាប់ឱ្យដឹងថា មុនពេលកើតហេតុ គេបានឃើញយុវជនម្នាក់ ជិះម៉ូតូម៉ាកឌ្រីមសង់សេ១២៥ ស៊េរីឆ្នាំ២០២០ ពណ៌ខ្មៅពាក់ផ្លាកលេខកំពង់ធំ 1O-6876 ជិះតាមបណ្តោយផ្លូវ៣១៥ ក្នុងទិសដៅពីលិចមកកើតក្នុងល្បឿនលឿន លុះមកដល់ចំណុចកើតហេតុ ជាប់ស្តុបផ្សារមាន់អាំងបានជ្រុលចង្កូត ទៅធ្លាក់ជង្ហុកបណ្តាលឲ្យម៉ូតូដួលខ្ទាត ជនរងគ្រោះទៅម្ខាង ស្របពេលដែលមានរថយន្តមួយគ្រឿង មិនចាំម៉ាកបានធ្វើដំណើរបញ្រ្ចាសទិស ពីកើតមកលិចក្នុងល្បឿលឿន បានជ្រុលទៅកិនជនរងគ្រោះពីលើ បណ្តាលឲ្យស្លា.ប់ភ្លាមៗ រួចបន្តល្បឿនបើករត់គេចខ្លួនបាត់ស្រមោល។ ចំណែកនៅខ្លួនជនរគ្រោះ សមត្ថកិច្ចឆែកមានឃើញគ្រឿងញៀនប្រភេទក្រាមស ២កញ្ចប់។
ក្រោយកើតហេតុសមត្ថកិច្ចមូលដ្ឋាន សហការជាមួយនឹងផ្នែកជំនាញចរាចរណ៍ ចុះមកដល់រួចក៏បានពិនិត្យ និងធ្វើការវាស់វែងយកម៉ូតូជនរងគ្រោះ ទៅរក្សាទុកនៅអធិការដ្ឋានខណ្ឌទួលគោក រង់ចាំក្រុមគ្រួសារមកទទួល រីឯរថយន្តបង្កសមត្ថកិច្ច និងធ្វើការតាមស្រាវជ្រាវបន្ថែម៕ រក្សាសិទ្ធិដោយ ៖ សា មេត