ភ្នំពេញ ៖ ជនសង្ស័យម្នាក់បានបាត់បង់ជីវិត នៅតាមចិញ្ចើមផ្លូវ បន្ទាប់ពីជនសង្ស័យរូបនោះ បានធ្វើសកម្មភាព ចូលទៅលួចទ្រព្យសម្បត្តិ ក្នុងការរ៉ាសាំងមួយកន្លែង ហើយក៏បានប្រតាយប្រតប់ចាក់គ្នា ទៅវិញទៅមក ជាមួយនិងសន្តិសុខដែលយាមនៅក្នុងនោះ បណ្តាលឲ្យសន្តិសុខរងរបួសធ្ងន់ ។ បង្កឲ្យមានការភ្ញាក់ផ្អើលឡេីងនៅវេលាម៉ោង ៤និង៣០នាទីទៀបភ្លឺ ថ្ងៃទី៦ ខែកញ្ញា ឆ្នាំ២០២១ ចំណុចដេប៉ូប្រេងឥន្ធនៈតេលា ផ្លូវ២១៧ ភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ ។
ជនសង្ស័យ មានឈ្មោះ ថន រិទ្ធ ភេទប្រុស អាយុ៤៣ឆ្នាំ ភូមិត្រពាំងក្រញូង ឃុំត្រពាំងក្រញូង ស្រុកត្រាំកក់ ខេត្តតាកែវ ។
ជនរងគ្រោះឈ្មោះមាស ម៉ុត ភេទប្រុស អាយុ៦៨ឆ្នាំ មុខរបរ ជួយមេីលការខុសត្រូវ ការ៉ាសាំងតេលារបស់ក្មួយ ដែលស្ថិតនៅភូមិសំបួរ សង្កាត់ដង្កោ ខណ្ឌដង្កោ មានស្រុកកំណើត ភូមិឬស្សីស្រុក ភូមិខ្ពប ស្រុកស្អាង ខេត្តកណ្ដាល ។
បេីតាមប្រភពព័ត៌មាន ពីកន្លែងកើតហេតុ បានឲ្យដឹងថា មុនពេលកេីតហេតុ គឺជនសង្ស័យ បានធ្វើសកម្មភាពផ្លោះចូលទៅក្នុងការ៉ាសាំង បម្រុងលួចទ្រព្យសម្បត្តិ ឬសម្ភារៈផ្សេងៗ តែពេលចូលទៅដល់ ក៏ជួបនិងបុរសជាសន្តិសុខ ដែលយាមនៅទីនោះ ហើយក៏បានស្រែកឆោឡោថាចោរៗ ប្រតាយប្រតប់គ្នា ដោយជនសង្ស័យបានដកកំបិតចាក់ទៅលេី បុរសជាសន្តិសុខ បណ្តាលឲ្យត្រូវចំត្រង់ ក ហូរឈា.មជោក ហេីយពេលនោះ បុរសជាសន្តិសុខ ក៏បានដណ្ដើមកាំបិត ហេីយបានចាក់ជនសង្ស័យ ត្រូវចំឆ្អឹងខ្នងផ្នែកខាងឆ្វេង ធ្វេីឲ្យរងរបួសធ្ងន់ ហើយនៅពេលរងរបួសហើយ ជនសង្ស័យ បានរត់ចេញពីកន្លែងកើតហេតុ ប្រហែល១០០ម៉ែត្រ ក៏បានមកដេកដួលស្លាប់នៅមុខហាងលក់កាហ្វេ យីហោ KOI តែម្ដងទៅ ។
ក្រោយពេលកើតហេតុសមត្ថកិច្ចមូលដ្ឋានប៉ុស្តិ៍នគរបាលរដ្ឋបាលសង្កាត់ដង្កោ និងកម្លាំងព្រហ្មទណ្ឌនៃអធិការដ្ឋាននគរបាលខណ្ឌដង្កោ សហការជាមួយកម្លាំងនគរបាលការិយាល័យកោសល្យវិច័យ នៃស្នងការដ្ឋាននគរបាលរាជធានីភ្នំពេញ រួមនិងក្រុមគ្រូពេទ្យ ចុះទៅពិនិត្យសព និងតេស្តសំណាកលទ្ធផលអវិជ្ជមាន ដោយឡែកខាងជំនាញសមត្ថកិច្ច បានបញ្ជាក់ថា សពពិតជាត្រូវចាក់និងកាំបិតចុងស្រួចចំសួត ទើបបណ្តាលឲ្យបាត់បង់ជីវិត។ ចំណែកជនរងគ្រោះ កំពុងស្ថិតនៅបន្ទប់សង្រ្គោះបន្ទាន់។ រីឯសពជនសង្ស័យ សមត្ថកិច្ចបានដឹកយកទៅតម្កល់ទុក នៅវត្តចាក់អង្រែលើ ដើម្បីស្រាវជ្រាវរកក្រុមគ្រួសារ មកទទួលយកទៅធ្វើបុណ្យតាមប្រពៃណី៕ រក្សាសិទ្ធិដោយ ៖ សួង សាម
