ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងថា កាលពីឆ្នាំមុនៗ ខ្ញុំបានអំពាវនាវសុំឲ្យក្រុមហ៊ុនដឹកជញ្ជូន កុំដំឡើងតម្លៃដល់អ្នកធ្វើដំណើរ ទៅលេងស្រុកកំណើត នៅតាមបណ្តាខេត្តនានា នៅក្នុងឱកាសបុណ្យចូលឆ្នាំថ្មី ប៉ុន្តែមិនមានប្រសិទ្ធភាពទេ។ ដូច្នេះហើយ បានជាពេលនេះ ខ្ញុំបានពិភាក្សាជាមួយសាលាក្រុងភ្នំពេញ ហើយបានសម្រេចផ្តល់សេវាឡានក្រុង ដឹកជញ្ជូនពលរដ្ឋ អ្នកធ្វើដំណើរដោយ “មិនបង់ថ្លៃ” ។
នៅព្រឹកថ្ងៃអង្គារ ទី៣ ខែមេសា ឆ្នាំ២០១៨នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្នុងឱកាសអញ្ជើញប្រគល់សញ្ញាបត្រដល់និស្សិតវិទ្យាស្ថានវ៉ាន់ដាសរុប នៅមជ្ឈមណ្ឌលកោះពេជ្រ បានលើកឡើងថា កាលខ្ញុំប្រកាសពីថ្ងៃអាទិត្យកន្លងទៅនេះ គឺគម្រោងដាក់តែ២ទិសទេ ។ ប៉ុន្តែថ្ងៃនេះ ខ្ញុំសូមប្រកាសថា យើងបានត្រៀមឡានក្រុងដឹកជញ្ជូន បងប្អូនអ្នកធ្វើដំណើរ ដោយមិនបង់ថ្លៃ នៅតាមផ្លូវជាតិមួយ ចំនួនដូចជាៈផ្លូវជាតិលេខ ១ (ពីភ្នំពេញ កណ្តាល ព្រៃវែង និងស្វាយរៀង), ផ្លូវជាតិលេខ ៣ (ពីចោមចៅទៅកំពត), ផ្លូវជាតិលេខ ៤ (ពីចោមចៅ កំពង់ស្ពឺ និងខេត្តព្រះសីហនុ), ផ្លូវជាតិលេខ៥ (ពីភ្នំពេញទៅ កំពង់ឆ្នាំង ពោធិ៍សាត់ បាត់ដំបង និងបន្ទាយមានជ័យ), ផ្លូវជាតិលេខ ៦ (គឺពីភ្នំពេញ កំពង់ធំ និងសៀមរាប)។
ក្នុងពិធីបុណ្យចូលឆ្នាំថ្មីខាងមុខនេះ ក៏នឹងរៀបចំឡានក្រុងជូនបងប្អូនប្រជាពលរដ្ឋយើងដែរ។ នៅឆ្នាំក្រោយ អាចនឹងបន្ថែមចំនួនឡានក្រុង ច្រើនជាងឆ្នាំនេះទៀត។ សូមជូនពរបងប្អូនកូនក្មួយ ធ្វើដំណើរសុខសប្បាយ តាមផ្លូវនៅគ្រប់ទីកន្លែង ទូទាំងប្រទេស៕ ដោយ ៖ បញ្ញាស័ក្តិ
