ភ្នំពេញ ៖ ចៅក្រមស៊ើបសួរ សាលាដំបូងរាជធានីភ្នំពេញ កាលពីថ្ងៃទី ១១ ខែ កញ្ញា ឆ្នាំ ២០២១ បានសម្រេចឃុំខ្លួន ជនត្រូវចោទជនជាតិចិន ចំនួន០២ នាក់ ដែលត្រូវជាប្តីប្រពន្ធនឹងគ្នា និង បានបញ្ជូនខ្លួនពួកគេ ទៅឃុំខ្លួនជាបណ្ដោះអាសន្ន នៅពន្ធនាគារ ដើម្បីរងចាំ ការទោស តាមច្បាប់ ជាប់ពាក់ព័ន្ធនឹងបទល្មើសការរក្សាទុក និង ជួញដូរដោយខុសច្បាប់ នូវសារធាតុញៀន ជិត១០ គីឡូក្រាម។
![](https://cen.com.kh/wp-content/uploads/2021/09/photo_2021-09-11_15-17-31.jpg)
យោងតាមដីកាបង្គាប់ឱ្យឃុំខ្លួនរបស់តុលាការ បានឲ្យដឹងថា ជនត្រូវចោទទាំង០២នាក់នេះ មានឈ្មោះ ទី ១-ឈ្មោះ YE YU SONG ភេទប្រុស កើតឆ្នាំ១៩៨១ ជនជាតិចិន កាន់លិខិតឆ្លងដែនលេខ EG3299329 និង ២-ឈ្មោះ LIN WEI ភេទស្រី អាយុ ៣៦ឆ្នាំ ជនជាតិចិន លិខិតឆ្លងដែន (គ្មាន)។
ពួកគេទាំង០២ នាក់ ត្រូវបាន តំណាងអយ្យការចោទប្រកាន់ពីបទ : រក្សាទុក, ជួញដូរ ដោយខុសច្បាប់ នូវសារធាតុញៀន និង ផលិតគ្រឿងញៀន។
ពួកគេត្រូវបានចាប់ឃាត់ខ្លួន ដោយសមត្ថភាពនគរបាលប្រឆាំងគ្រឿងញៀន នៃ មន្ទីរប្រឆាំងគ្រឿងញៀន ក្រសួងមហាផ្ទៃ កាលពីថ្ងៃទី ៤ ខែ ឆ្នាំ ២០២១ នៅក្នុង ចំណុច ផ្ទះលេខ១៥B បន្ទប់លេខ២A (ខុនដូ) ផ្លូវលេខ១០៥ ស្ថិតក្នុងសង្កាត់បឺងកេងកង២ ខណ្ឌបឹងកេងកង រាជធានីភ្នំពេញ។
![](https://cen.com.kh/wp-content/uploads/2021/09/photo_2021-09-11_15-17-30.jpg)
ក្រោយពេលឃាត់ខ្លួនពួកគេ, សមត្ថកិច្ចនគរបាលជំនាញ ដកហូតបានវត្ថុតាងរួមមាន ៖ ទី ១-ថ្នំាញៀន អ៊ិចស្តាស៊ី (MDMA) ចំនួន 6546,65 ក្រាម, ទី ២-ថ្នាំញៀន មេតាំហ្វេតាមីន (ICE) ចំនួន 1085,35 ក្រាម, ទី ៣-ថ្នាំញៀន អំហ្វេតាមីន ចំនួន 608,33ក្រាម , ទី ៤- ថ្នាំញៀន កេតាមីន(Ketamine) ចំនួន 228,89 ក្រាម, និង ទី ៥-ថ្នាំញៀន នីមេតាហ្សេប៉ាម(Nimetazepam) ចំនួន 1 503,88 ក្រាម។
សរុបទម្ងន់ ថ្នាំញៀន ដែលរឹបអូសបាន មានចំនួន 9973,10 ក្រាម ( ជិត ១០ គីឡូក្រាម) , សារធាតុគីមី 4684,70 ក្រាម, ទូរស័ព្ទ ០២គ្រឿង និងឧបករណ៍កែច្នៃមួយចំនួនធំផ្សេងទៀត៕រក្សាសិទ្ធិដោយ ៖ ចន្ទា ភា