លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម នៅទី១៤ ខែកញ្ញា ឆ្នាំ២០២១ បានដឹកនាំក្រុមការងារ ចូលជជែកការពារសេចក្តីព្រាងច្បាប់សំខាន់ ចំនួន ៣ ពាក់ព័ន្ធនឹងការធ្វើពាណិជ្ជកម្មជាមួយបរទេស ក្នុងវិមានព្រឹទ្ធសភា ជាមួយគណៈកម្មទី៩ នៃព្រឹទ្ធសភា ដោយធ្វើឡើងតាមប្រព័ន្ធវីដេអូពីចម្ងាយ។
សេចក្តីព្រាងច្បាប់ ស្ដីពី ការធ្វើពាណិជ្ជកម្មជាមួយបរទេសនេះ រួមមាន ៖ សេចក្តីព្រាងច្បាប់ ស្តីពីការអនុម័តយល់ព្រមលើកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (អាសិប), សេចក្តីព្រាងច្បាប់ ស្តីពីការអនុម័តយល់ព្រមលើកិច្ចព្រមព្រៀងពាណិជ្ជកម្មសេរីរវាងកម្ពុជា-ចិន, និងសេចក្តីព្រាងច្បាប់ស្តីពីការប្រកួតប្រជែង។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានលើកឡើងក្នុងអង្គប្រជុំជាមួយគណៈកម្មទី៩ នៃព្រឹទ្ធសភា ថា កម្ពុជានឹងទទួលបានអត្ថប្រយោជន៍ជាច្រើន នៅពេលកិច្ចព្រមព្រៀង និងច្បាប់ទាំងនេះ ចូលជាធរមាន, ហើយថា ការកសាងច្បាប់ និងបទដ្ឋានគតិយុត្តលើវិស័យពាណិជ្ជកម្ម គឺសំដៅធ្វើឱ្យប្រសើរទ្បើងនូវបរិយាកាសធុរកិច្ច ក៏ដូចជាការធ្វើពិពិធកម្មទីផ្សារ និងស្វែងរកទីផ្សារបន្ថែម តាមរយៈការចរចាបង្កើតកិច្ចព្រមព្រៀងពាណិជ្ជកម្មសេរីទ្វេភាគី និងពហុភាគីជាមួយដៃគូពាណិជ្ជកម្មសំខាន់ៗ៕ ពិសិដ្ឋ CEN
