ភ្នំពេញ ៖ អគ្គស្នងការដ្ឋាននគរបាលជាតិ បានឲ្យដឹងថា ខែសីហា ឆ្នាំ២០២១នេះ កម្លាំងសមត្ថកិច្ចបង្ក្រាបបទល្មើសលួច ឆក់ ក្នុងរាជធានីភ្នំពេញ បានចំនួន ៦៤ករណី (បទល្មើសលួច ៥៦ , បទល្មើសឆក់ ៨) ឃាត់ខ្លួនជនសង្ស័យចំនួន ៩១នាក់ ស្មើនឹង ១០០% នៃបទល្មើសដែលកើតឡើង ។
បើយោងតាមរបាយការណ៍របស់គណ:បញ្ជាការអនុវត្តផែនការសកម្មភាពបង្ការ ទប់ស្កាត់ និងបង្ក្រាបអំពើលួច ឆក់ នៅរាជធានីភ្នំពេញ ជនសង្ស័យក្រោយការបង្ក្រាប បានរកឃើញធ្លាប់ប្រើសារធាតុញៀនចំនួន ៧៥នាក់ ស្មើនឹង ៨៤% ។ ក្នុងបទល្មើសចំនួន ៦៤ករណី រួមមាន ៖ -បទល្មើសលួច ៥៦ លើ ៥៦ករណី -បទល្មើសឆក់ ៨លើ ១១ករណី ថយ៣ករណី (ពុំមានជនរងគ្រោះជាជនបរទេសនោះទេ) ។
របាយការណ៍ដដែលបានបញ្ជាក់ថា ៖ ខណ្ឌដែលមានបទល្មើសលួច ឆក់ ច្រើនលើសពី៥លើក មានចំនួន៥ខណ្ឌ ៖ ១-ច្បារអំពៅ ចំនួន៨លើក , ២-សែនសុខ ចំនួន ៦លើក, ៣-មានជ័យ ចំនួន១១លើក, ៤-ទួលគោក ចំនួន៨លើក, ៥-ដង្កោ ចំនួន៥លើក ។
ទន្ទឹមនឹងកិច្ចប្រតិបត្តិការបង្ការ ទប់ស្កាត់ និងបង្ក្រាប ទទួលបានលទ្ធផលល្អយ៉ាងណាក៏ដោយ ក៏គណ:បញ្ជាការអនុវត្តផែនការសកម្មភាពបង្ការ ទប់ស្កាត់ និងបង្ក្រាបអំពើលួច ឆក់ នៅរាជធានីភ្នំពេញ នៅបន្តដាក់ចេញទិសដៅ និងវិធានការសំខាន់ៗនានាមួយចំនួន ដើម្បីឲ្យបទល្មើសមានការថយចុះបន្តទៀត ៕រក្សាសិទ្ធិដោយ៖បញ្ញាស័ក្តិ
