ភ្នំពេញ: ជនជាប់ចោទគ្រឿងញៀនម្នាក់ កាលពីថ្ងៃទី ២០ ខែ កញ្ញា ឆ្នាំ ២០២១ បានសំណូមពរ ដល់ចៅក្រមប្រឹក្សាជំនុំជម្រះ នៃតុលាការឧទ្ធរណ៍ រាជធានីភ្នំពេញ មេត្តាទម្លាក់បទប្រកាន់ និងដោះលែងខ្លួន អោយមានសេរីភាពវិញ ដោយអះអាងថា គាត់មិនមែនជាអ្នកជួញដូរគ្រឿងញៀននោះទេ។ តែជាអ្នកប្រើប្រាស់ថ្នាំងញៀនទេ។
ជនជាប់ចោទរូបនេះ មានឈ្មោះ នាង សុធី ភេទប្រុស អាយុ ៥០ឆ្នាំ មុខរបរ អ្នករត់ឌុប មានទីលំនៅឃុំអង្គររាជ , ស្រុកព្រះស្ដេច, ខេត្តព្រៃវែង។
ជនជាប់ចោទ ត្រូវបាន សាលាដំបូងខេត្តព្រៃវៃង កាលពីឆ្នាំ ២០២០ កាត់ទោស ដាក់ពន្ធនាគារ កំណត់ ០៣ឆ្នាំ ពីបទ ” រក្សាទុក និង ជួញដូរដោយខុសច្បាប់ នូវ សារធាតុញៀន” តាមបញ្ញាតិ មាត្រា ៤០ នៃ ច្បាប់ស្តីពីការត្រួតពិនិត្យគ្រឿងញៀន។
តែគាត់បានប្តឹងជំទាស់នឹងសេចក្តីសម្រេចរបស់តុលាការខេត្តព្រៃវែង មកកាន់សាលាឧទ្ទរណ៍ រាជធានីភ្នំពេញ។
ជនជាប់ត្រូវបានក្រុមប្រឹក្សាជំនុំជម្រះនៃ សាលាឧទ្ធរណ៍ រាជធានីភ្នំពេញ ក្រោមការដឹកនាំរបស់លោកជំទាវ ចាន់ ម៉ារីណា ជាប្រធានក្រុមប្រឹក្សាជំនុំជម្រះ ធ្វើការជំនុំជម្រះ លើបណ្ដឹងឧទ្ធរណ៍ របស់គាត់ កាលពីព្រឹកថ្ងៃទី ២០ ខែ កញ្ញា ឆ្នាំ ២០២១។
ជនជាប់ចោទឈ្មោះ នាង សុធី ត្រូវបាន សមត្ថកិច្ចនគរបាល ចាប់ឃាត់ខ្លួន កាលពី ទី ០៤ ខែ ឧសភា ឆ្នាំ ២០១៩ នៅភូមិស្វាយ ឃុំអង្គរាជ ស្រុកព្រះស្តេច ខេត្ត ព្រៃវែង ។
ក្រោយឃាត់ខ្លួន, សមត្ថកិច្ចនគរបាលរឹបអូសបាន គ្រឿងញៀនចំនួន ០២ កញ្ចប់តូច មានទម្ងន់ សារុប០,៩០ក្រាម។
នាពេលសវនាការ ជនជាប់ឈ្មោះ សុធី បានឆ្លើយសារភាពថា គាត់ជាអ្នកជក់គ្រឿងញៀន។ ចំណែកឯ ថ្នាំញៀចំនួន០២ កញ្ចប់តូច ដែល សមត្ថកិច្ចបានដកហូតពីគាត់ នៅពេលដែលឃាត់ខ្លួនគាត់នោះ គឺបានទិញមកពីបុរសមិនស្គាល់ឈ្មោះម្នាក់ សម្រាប់ប្រើប្រាស់ផ្ទាល់ខ្លួនតែប៉ុណ្ណោះ។ និង មិនបានចែកចាយបន្តនោះទេ។
ឈ្មោះសុធី បានប្រាប់តុលាការថា គាត់មិនមែនជាអ្នកជូញដូរគ្រឿងញៀនទេ។
សុធី បានសុំអោយ តុលាការឧទ្ធរណ៍មេត្តាលើកការចោទប្រកាន់, ច្រានចោល សាលក្រមរបស់តុលាការខេត្តព្រៃវែង និង សម្រេចដោះលែងខ្លួនអោយមានសេរីភាពវិញ។
សំណុំរឿងនេះ សាលាឧទ្ធរណ៍ រាជធានីភ្នំពេញ នឹងប្រកាសសាលដីកា នៅថ្ងៃ ទី ១៩ ខែ កញ្ញា ឆ្នាំ ២០២១ ខាងមុខនេះ៕ រក្សាសិទ្ធិដោយ: ចន្ទា ភា
