ភ្នំពេញ ៖ បេីតាមសេចក្តីប្រកាសរបស់ ស្ថានឯកអគ្គរាជទូតកម្ពុជាប្រចាំប្រទេសជប៉ុនបានឲ្យដឹងថា រដ្ឋាភិបាលជប៉ុន បានកែសម្រួលវិធានការព្រំដែនឡេីងវិញ ដោយបានដកប្រទេសកម្ពុជា ចេញពីបញ្ជីប្រទេសដែលតម្រូវឲ្យធ្វើចត្តាឡីស័ក ពេលមកដល់ជប៉ុន ចំនួន០៣ថ្ងៃនៅកន្លែងដែលរៀបចំដោយប្រធានចត្តាឡីស័កជប៉ុន ហើយត្រូវធ្វើតេស្ត នៅថ្ងៃទី៣។
ឯកឧត្តម អ៉ឹម រចនា ឯកអគ្គរាជទូតកម្ពុជាប្រចាំប្រទេសជប៉ុន បានបញ្ជាក់ថា វិធានការថ្មីនេះ បាន និងកំពុងចាប់អនុវត្ដពីថ្ងៃទី២០ ខែកញ្ញា ឆ្នាំ២០២១តទៅ ដោយអ្នកដំណើរមកពីប្រទេសកម្ពុជាត្រូវបានអនុញ្ញាតឱ្យធ្វើចត្តាឡីស័កនៅកន្លែងផ្ទាល់ខ្លួន ជំនួសវិញ ឱ្យបានគ្រប់១៤ថ្ងៃ។
ឯកអគ្គរាជទូតកម្ពុជាប្រចាំប្រទេសជប៉ុន សូមប្រជាពលរដ្ឋខ្មែរ មេត្តាសហការ និងប្រតិបត្តិតាមការអំពាវនាវរបស់អាជ្ញាធរមានសមត្ថ កិច្ចជប៉ុន និងកម្ពុជា និងបង្កើនស្មារតីប្រុងប្រយ័ត្នខ្ពស់ជាប់ជានិច្ច និងសូមថែរក្សាសុខភាព ប្រកាន់ខ្ជាប់ នូវអនាម័យល្អ ពាក់ម៉ាសជាប្រចាំ ចៀសវាសការជួបជុំគ្នាច្រើន រក្សាគម្លាតពេលមានការជួបជុំគ្នាច្រើន។
ការកែសម្រួលវិធានការរបស់រដ្ឋាភិបាលជប៉ុន ចំពោះអ្នកដំណេីរនៅកម្ពុជានេះ បានធ្វេីឡេីងបន្ទាប់ពីស្ថានភាពរីករាលដាលជំងឺកូវីដ១៩ និងអត្រាស្លាប់ដោយជំងឺនេះ នៅកម្ពុជា មានការធ្លាក់ចុះគួរឱ្យកត់សម្គាល់ ជាពិសេសនៅរាជធានីភ្នំពេញតែម្តង៕ រក្សាសិទ្ធិដោយ៖បញ្ញាស័ក្តិ
