ស្រុកកៀនស្វាយ ៖ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល សូមឆ្លើយតបជូនប្រជាពលរដ្ឋ សុំមិនបញ្ចេញឈ្មោះ ដែលបានរាយការណ៍ក្នុងប្រអប់សារផេកហ្វេសបុកស្នងការដ្ឋាននគរបាលខេត្តកណ្តាល មានខ្លឹមសារថា ៖ នៅភូមិកណ្តាលលើ ឃុំបន្ទាយដែក ស្រុកកៀនស្វាយ នៅជិតផ្សារក្បែរវត្តបន្ទាយដែក ឲ្យតែម៉ោង១២ឡើង ជួបជុំលេងល្បែងបៀរ ជារៀងរាល់ថ្ងៃ កន្លែងលេងនៅជាប់សាលារៀនជប៉ុន ជិតផ្សារក្បែរវត្តបន្ទាយដែក ។
ក្រោយពីទទួលបានព័ត៌មាននេះ ដោយមានការចង្អុលបង្ហាញពីក្រុមប្រតិកម្មរហ័សខេត្ត លោកអធិការ និងក្រុមព័ត៌មាន និងប្រតិកម្មរហ័សនៃអធិការដ្ឋាននគរបាលស្រុកកៀនស្វាយ បានដាក់បទបញ្ជាឲ្យប៉ុស្តិ៍នគរបាលរដ្ឋបាលបន្ទាយដែកស្រាវជ្រាវករណីខាងលើ ។
ជាលទ្ធផលនៅថ្ងៃទី២៥ ខែកញ្ញា ឆ្នាំ២០២១ វេលាម៉ោង១៣និង១៥នាទី ប៉ុស្តិ៍នគរបាលរដ្ឋបាលបន្ទាយដែក បានចុះទៅដល់ទីតាំងផ្ទះលេងល្បែងបៀរ និងធ្វើការស្រាវជ្រាវឃើញថាពិតជាមានការលេងល្បែងបៀរប្រាកដមែន កាលពីថ្ងៃទី២៤ ខែកញ្ញា ឆ្នាំ២០២១ វេលាម៉ោង១១និង៣៥នាទី ម្ចាស់ផ្ទះមានឈ្មោះ ម៉ុក សាម៉ី ភេទស្រី អាយុ៥៦ឆ្នាំ មុខរបរលក់ដូរ តែម្ចាស់ផ្ទះមិនបានរស់នៅផ្ទះខាងលើនេះទេ បច្ចុប្បន្នទៅរស់នៅផ្ទះជួលក្នុងក្រុងតាខ្មៅ ខេត្តកណ្តាល ហើយផ្ទះខាងលើនេះស្ថិតនៅលើដីរបស់ម្ចាស់កម្មសិទ្ធឈ្មោះ លឹម ភី អាយុ៦៥ឆ្នាំ ជនជាតិខ្មែរ មានទីលំនៅរាជធានីភ្នំពេញ ដោយនៅថ្ងៃកើតហេតុខាងលើម្ចាស់ផ្ទះ បានមកកាន់បិណ្ឌទី៣វេនរបស់គាត់ ហើយក៏បានជួបជុំបងប្អូន និងអ្នកជិតខាងលេងបៀរ ។ លុះដល់ម៉ោង១៦និង៣៥នាទី ថ្ងៃខែឆ្នាំដដែល គាត់និងក្រុមគ្រួសារបានត្រទ្បប់ទៅផ្ទះជួលនៅក្រុងតាខ្មៅវិញ ហើយក៏លែងមានអ្នកលេងបៀរទៀតដែរ ។
ក្រោយពីប៉ុស្តិ៍នគរបាលរដ្ឋបាលបន្ទាយដែក ចុះធ្វើការស្រាវជ្រាវរួចមក ក៏បានកោះហៅអ្នកជិតខាង ដែលចូលរួមលេងបៀរមកធ្វើការអប់រំ និងធ្វើកិច្ចសន្យាបញ្ឈប់ការលេងល្បែងស៊ីសង(បៀរ) និងល្បែងស៊ីសងគ្រប់ប្រភេទចាប់ពីពេលនេះតទៅ ។
ពាក់ព័ន្ធករណីនេះ ស្រ្តីឈ្មោះ លឹម សំសិត អាយុ២៣ឆ្នាំ បានធ្វើកិច្ចសន្យា ឈប់លែងស៊ីសងខុសច្បាប់ទៀតហើយ និងសន្យាមិនមានការជួបជុំគ្នា សភាពមនុស្សច្រើនទៀតហើយ និងគោរពតាមការណែនាំរបស់សមត្ថកិច្ចនិងមិនខឹងគាត់ឡើយ៕ រក្សាសិទ្ធិដោយ៖បញ្ញាស័ក្តិ
