Wednesday, June 26, 2024

ទំនាក់ទំនង : 0716140005

Address : #16 (Borey New World) St. 6A sk . Phnom Penh Thmey kh. Sen Sok ct., Phnom Penh 120913 Office: +85523232725 Tel: 017 93 61 91

កម្មករ​រោងចក្រ​ជាង ៤​ពាន់​នាក់ ជួប​ជាមួយ​សម្តេច​តេ​ជោ នាយករដ្ឋមន្ត្រី​

spot_img

​ភ្នំពេញ ​៖ ​នៅ​ព្រឹក​ថ្ងៃអាទិត្យ ទី​៨ ខែមេសា ឆ្នាំ​២០១៨​នេះ សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា បាន​អញ្ជើញ​ជួប​សំណេះសំណាល​ជាមួយ​តំណាង​កម្មករ កម្ម​ការ​នី ជា​ប្រធាន​រដ្ឋបាល ប្រធាន​ក្រុម ប្រធាន​ផ្នែក ជំនួយ​ការសរុប​ប្រមាណ ៤.៦១៧​នាក់ មកពី​រោងចក្រ​ចំនួន​៤៩ ក្នុង​ខេត្តតាកែវ និង​ខេត្តកំពង់ស្ពឺ​។ កិច្ច​សំណេះសំណាល​នេះ បានធ្វើ​ឡើង​នៅ​សាល​មហោស្រព កោះ​ពេជ្រ រាជធានី​ភ្នំពេញ​។​

​គោលបំណង​សំខាន់​នៃ​ការអញ្ជើញ​ចុះ​ជួប​សំណេះសំណាល​ប្រចាំ​សប្តាហ៍​នេះ គឺ​ដើម្បី​ស្វែងយល់​ពី សុខទុក្ខ​របស់​បងប្អូន​កូនក្មួយ​កម្មករ កម្មការិនី​ដោយផ្ទាល់ និង​ដើម្បី​ដោះស្រាយ​បញ្ហា​ប្រឈម​នានា​។ ទន្ទឹមនឹង​នេះដែរ គឺ​ដើម្បី​ជំរុញ​គោលនយោបាយ​អភិវឌ្ឍន៍​វិស័យ​ឧស្សាហកម្ម (២០១៥-២០២៥) ឲ្យ​កាន់​តែមាន​ប្រសិទ្ធភាព​ខ្ពស់ ដើម្បី​ពង្រឹង​សេដ្ឋកិច្ចជាតិ និង​លើកកម្ពស់​ជីវភាព​រស់​នៅ​របស់​ពលរដ្ឋ អោយ​កាន់តែ​ល្អប្រសើរ​ឡើង​។​

​នៅក្នុង​ថ្ងៃនេះ សម្តេច​តេ​ជោ ហ៊ុន សែន នាយករដ្ឋមន្ត្រី មាន​សេចក្តី​សប្បាយរីករាយ​ក្រៃលែង ដែល​បាន​អញ្ជើញ​ចុះ​ជួប​ជាមួយ​កូនក្មួយ​កម្មករ កម្មការិនី ជា​ប្រធាន​រដ្ឋបាល ប្រធាន​ក្រុម ប្រធាន​ផ្នែក និង​ជំនួយការ នាពេល​ព្រឹក​នេះ​។ សម្តេច​តេ​ជោ​នាយករដ្ឋមន្ត្រី បាន​មានប្រសាសន៍ថា ក្រោយពី​ជួប​សំណេះ​សំ​ណា​ជាមួយ​បងប្អូន​កម្មករ​រួម​ក សម្តេច​តេ​ជោ នឹង​ទទួល​ជួបពិភាក្សា​ការងារ ជាមួយ​រដ្ឋមន្ត្រីក្រសួង​ការបរទេស​ជប៉ុន ដែល​អញ្ជើញ​មក​បំពេញ​ទស្សនកិច្ច​ផ្លូវការ​នៅ​កម្ពុជា​។​

​សម្តេច​តេ​ជោ​នាយករដ្ឋមន្ត្រី បាន​មានប្រសាសន៍ថា កម្ពុជា​បាន​ឆ្លងកាត់​នូវ​សង្គ្រាម​ដ៏​រាំ​រៃ​ជាច្រើន​ដែល បានធ្វើ​ឲ្យ​ប្រទេស​ត្រូវ​ទទួលរង​នូវ​ភាព​ខ្ទេចខ្ទី​ស្ទើរ​គ្រប់​វិស័យ រួមទាំង​អាយុជីវិត​មនុស្ស​ផងដែរ​។ ប៉ុន្តែ​ដោយសារ​ថ្ងៃ​រំដោះ ៧ មករា ឆ្នាំ​១៩៧៩ និង​ការដាក់ចេញ​នូវ​គោលនយោបាយ​ឈ្នះ​-​ឈ្នះ របស់ សម្តេច​បានធ្វើ​ឲ្យ​ប្រទេស​កម្ពុជា​រួច​ផុតពី​សង្គ្រាម និង​ធ្វើការ​អភិវឌ្ឍ​ប្រទេស​មានកា​រីកចម្រើន​ដូច​សព្វថ្ងៃ​។ សម្តេច​តេ​ជោ​បាន​មានប្រសាសន៍​បញ្ជាក់ថា ក្នុងនាម​ជា​អ្នកដឹកនាំ​ប្រទេស សម្តេច​តែងតែ ផ្សារភ្ជាប់​ជាមួយ​សុខទុក្ខ​ប្រជាពលរដ្ឋ ក្នុងការ​ស្វែងយល់​អំពី​តម្រូវការ នៃ​ការរស់នៅ របស់​ប្រជាពលរដ្ឋ​គ្រប់​ទីកន្លែង​។ កម្ពុជា​បានប្រែក្លាយ​ពី​ប្រទេស​ក្រីក្រ​មកជា​ប្រទេស​ដែលមាន​ប្រាក់ចំណូល​មធ្យម កម្រិត​ទាប និង​មាន​ទិសដៅ​ក្លាយទៅជា​ប្រទេស​ដែលមាន​ប្រាក់ចំណូល​មធ្យម​កម្រិត​ខ្ពស់​នៅ​ឆ្នាំ​២០៣០ ហើយ ក៏មាន​មហិច្ឆតា​កា្ល​យ​ទៅជា​ប្រទេស ដែលមាន​ប្រាក់ចំណូល​ខ្ពស់​ក្នុង​ឆ្នាំ​២០៥០​ទៀតផង​។​

​សម្តេច​តេ​ជោ​នាយករដ្ឋមន្ត្រី បាន​មានប្រសាសន៍ថា កម្ពុជា​បាននិងកំពុង​ជំរុញ​វិស័យ​ឧស្សាហកម្ម ដែលជា​វិស័យ​មួយ​ជួយ​ជំរុញ​កំណើន​សេដ្ឋកិច្ចជាតិ​ឲ្យ​រីកលូតលាស់​។ ដើម្បី​ជំរុញ​វិស័យ​ឧស្សាហកម្ម នេះ​ឲ្យ​មានការ​រីកចម្រើន រាជរដ្ឋាភិបាល​កម្ពុជា​ត្រូវដាក់​ចេញ​នូវ​ផែនការ សកម្មភាព អភិវឌ្ឍន៍ លើក​ផ្នែក​មួយចំនួន​ដូចជា វិស័យ ហេដ្ឋារចនាសម្ព័ន្ធ មាន ផ្លូវ​ធ្វើដំណើរ ទាំង​ផ្លូវ គោក ផ្លូវទឹក និង​ផ្លូវអាកាស រួមទាំង​ការអភិវឌ្ឍ​ធនធានមនុស្ស​ជាដើម​។ ក្មួយៗ កម្មករ​កម្ម​ការ​នី​ទាំងអស់​ត្រូវ​រក្សា​ការងារ​ដែលមាន​ស្រាប់ កុំ​ឲ្យ​គេ​ដក​រោងចក្រ​ទៅ​ប្រទេស​គេ​វិញ និង​ត្រូវខិតខំ​ពង្រីក​ការងារ ដើម្បី​ទាក់ទាញ​ការវិនិយោគ​បន្ថែមទៀត​ពី​បរទេស​។ រហូតមកដល់ ពេលនេះ​មាន​ស្ត្រី​កម្ម​ការ​នី​សម្រាលកូន​មាន​ប្រមាណ​ជា ១៤.០០៩​នាក់ ដែល​ក្នុងនោះ​សម្រាល បានកូន​ចំនួន ១៤.៣០៦​នាក់​ដោយមាន​ទាំង​កូនភ្លោះ​ផងដែរ ហើយ​ក្នុងនោះ​រាជរដ្ឋាភិបាល​ក៏បាន ចំណាយ​ថវិការ​ប្រមាណ​ជិត ១,៥ លាន​ដុល្លារ​។​

​សម្តេច​តេ​ជោ​នាយករដ្ឋមន្ត្រី សូម​ឲ្យ ប្រជាពលរដ្ឋ​ទាំងអស់​រួមគ្នា​ថែរក្សា​សន្តិភាព ស្ថិរភាព និង​ការ​អ​ភ​វិ​ឌ្ឍ ដើម្បី​ចូលរួម​ក្នុង​ការជំរុញ​វិស័យនេះ​ឲ្យ​កាន់តែ​រីកចម្រើន​ថែមទៀត​។ សម្តេច​តេ​ជោ បញ្ជាក់​សាជាថ្មី​ថា សម្តេច​នឹង​បន្ត​ដឹកនាំ​ប្រទេស​មិនតិចជាង ១០​ឆ្នាំ ដើម្បី​បន្តដំណើរ​អ​ភ​វិ​វ​ឌ្ឍ​ប្រទេស និង​មើលថែរ​កូន ក្មួយ​កម្មករ​កម្ម​ការ​នី​បន្តទៀត​។​

​សម្តេច​តេ​ជោ បាន​បញ្ជាក់ថា “​សូមកុំ​ឲ្យ​មាន បងធំ បងតូច និង​ក្រុម​គ្រឿងញៀន កើតមាន​នៅក្នុង​រោងចក្រ​ឲ្យ​សោះ ព្រោះ​ពួកគេ​អាច​នឹង​បំផ្លាញ សុវត្ថិភាព​ការងារ របស់​បងប្អូន កូនក្មួយ​កម្មករ​កម្ម​ការិនី​។ អរគុណ​ម្ចាស់​រោងចក្រ​ទាំងអស់ ដែល​បានផ្តល់​ការងារ​ធ្វើ​សមរម្យ​និង ផ្តល់នូវ​អត្ថប្រយោជន៍​ជាច្រើន​ថែមទៀត​ដល់​បងប្អូន​កូនក្មួយ​កម្មករ​កម្មការិនី​”​។​

​សម្តេច​តេ​ជោ បាន​ថ្លែងថា ថ្ងៃនេះ យើង​ក៏មាន​ដំណឹង​ល្អ​សម្រាប់​កម្ពុជា​ដែរ គឺ​នៅ​ម៉ោង​ប្រហែល​១១​ព្រឹក​ថ្ងៃនេះ ខ្ញុំ​នឹង ជួបពិភាក្សា​ការងារ​ជាមួយ​លោក​រដ្ឋមន្ត្រីការបរទេស​ជប៉ុន Taro Kono នៅ​វិមាន​សន្តិភាព​។ នៅក្នុង​ជំនួប​បន្តិចទៀត​នេះ កម្ពុជា​នឹង​ចុះហត្ថលេខា​លើ កិច្ចព្រមព្រៀង​សំខាន់ៗ ចំនួន​២ ជាមួយ​មិត្ត​ជប៉ុន​: ១)​កិច្ចព្រមព្រៀង ផ្តល់​ជំនួយឥតសំណង​ជាង ៥០ លាន​ដុល្លារ សម្រាប់​គម្រោង​អភិវឌ្ឍន៍ សេដ្ឋកិច្ចសង្គម​។ ២)​កិច្ចព្រមព្រៀង ផ្តល់​ឥណទាន​សម្បទាន ប្រមាណ​ជិត ១០០​លាន​ដុល្លារ ដើម្បី​រៀបចំ​ខ្សែបណ្តាញ ចែកចាយ​អគ្គីសនី នៅ​ទីក្រុង​ភ្នំពេញ​។ ទន្ទឹមនឹង​ប្រទេស​ជប៉ុន ជា​មិត្ត​កំពុង​មក​ផ្តល់ជំនួយ ដល់​កម្ពុជា ក្រុម​ជន​ខិល ខូច​មួយចំនួន អាច​បំពុល​ព័ត៌មាន ទៅជា​រឿង​មិនល្អ ដូចដែល​ពួកគេ​ធ្លាប់ធ្វើ​។ បងប្អូន​ជនរួមជាតិ បានដឹងហើយថា ប្រទេស​ជប៉ុន មិន​ធ្វើ​អ្វី​ប៉ះពាល់​ដល់​សន្តិភាព និង​ការរីកចម្រើន របស់​កម្ពុជា​ឡើយ​។ អរគុណ​មិត្ត​ជប៉ុន ដែល​តែងតែ​ចូលរួម ជួយ​កសាង​និង​អភិវឌ្ឍន៍​កម្ពុជា ឲ្យ​រីកចម្រើន​ទៅមុខ​។​

​មុននឹង​បញ្ច​​ប់ សម្តេច​តេ​ជោ ហ៊ុន សែន នាយករដ្ឋមន្ត្រី បាន​ជូនពរ​កូនក្មួយ​កម្មករ កម្មការិនី និង​និយោជក​ទាំងអស់ ដែល​បាន​ចូលរួម​សំណេះសំណាល ក្នុងថ្ងៃនេះ​។ សម្តេច​តេ​ជោ ក៏បាន​ឧបត្ថម្ភ ថវិកា​លើកទឹកចិត្ត​មួយចំនួន ដល់​កូនក្មួយ​កម្មករ និង​កម្មការិនី មាន​ផ្ទៃពោះ​ចំនួន ១៦៥​នាក់ ក្នុង​បរិយាកាស​ស្និទ្ធស្នាល​រីករាយ និង​កក់ក្តៅ​ក្រៃលែង​។​

​នៅក្នុង​ឱកាស​នៃ​ពិធីបុណ្យ​ចូលឆ្នាំថ្មី ប្រពៃណីជាតិ ខាងមុខនេះ សម្តេច​តេ​ជោ ហ៊ុន សែន បាន​ជូនពរ​ជនរួមជាតិ ទូទាំងប្រទេស ជួបតែ​សេចក្តីសុខ​ចម្រើន ព្រមទាំង​ពុទ្ធពរ​៥​ប្រការ​គឺ អាយុ វណ្ណៈ សុ​ខៈ ពលៈ និង​បដិភាណៈ​កុំបី​ឃ្លៀងឃ្លាត​ឡើយ​៕ ​ដោយ​៖​បញ្ញា​ស័ក្តិ​

spot_img
×