ភ្នំពេញ៖ អគ្គលេខាដ្ឋានរដ្ឋសភា បានបើកមហាសន្និបាតបូកសរុបលទ្ធផលការងារ ឆ្នាំ២០១៣-២០១៧ និងកំណត់ទិសដៅ ការងារឆ្នាំបន្ត ថ្ងៃពុធ ទី១១ ខែមេសា ឆ្នាំ២០១៨ នៅវិមានរដ្ឋសភា លោក ងួន ញ៉ិល អនុប្រធានទី២ រដ្ឋសភា ។
លោក ងួន ញ៉ិល បានមានប្រសាសន៍វាយតម្លៃខ្ពស់ ចំពោះសមិទ្ធផល និងស្នាដៃសំខាន់នានា ដែលអគ្គលេខាធិការដ្ឋានសម្រេចបាននាពេលកន្លងមក ជាពិសេសក្នុងនីតិកាលទី៥ ទោះបីជាក្នុងកាលទេសៈ និងស្ថានភាពនយោបាយ មានសភាពស្មុគ្រស្មាញ និងលំបាកយ៉ាងណាក៏ដោយ ។
លោក ងួន ញ៉ិល ៖ “ខ្ញុំ សូមធ្វើការកត់សម្គាល់ និងកោតសរសើរចំពោះសមិទ្ធផល និង សេវាសំខាន់នានារបស់អគ្គលេខាធិការដ្ឋាន ដែលបានរួមចំណែក និងជួយដល់សមាជិក សមាជិការដ្ឋសភា ក្នុងការបំពេញតួនាទីស្នូលទាំង៣របស់ខ្លួន ទទួលបានជោគជ័យក្នុងនោះរួមមាន សេវាកម្មផ្នែកការងារនីតិកម្ម សេវាកម្មគាំទ្រដល់មុខងារតំណាង និងតាមដានការអនុវត្តន៍ច្បាប់ សេវាគាំទ្រដល់វិស័យការទូតសភា និងកិច្ចការអន្តរជាតិ “។
អនុប្រធានទី២ រដ្ឋសភា បានផ្តល់នូវអនុសាសន៍មួយចំនួនសំដៅ ធ្វើយ៉ាងណាប្រែក្លាយ អគ្គលេខាធិការដ្ឋានរដ្ឋសភា បច្ចុប្បន្ន ឲ្យកាន់តែទំនើប និងមានសមត្ថភាពជាងមុន ក្នុងការជួយជ្រោមជ្រែងដល់តួនាទីស្នូល របស់រដ្ឋសភា សំដៅលើកកម្ពស់លទ្ធិប្រជាធិបតេយ្យ នីតិរដ្ឋ និងអភិបាលកិច្ចល្អនៅកម្ពុជា ក៏ដូចជាក្នុងការជួយពង្រឹងសមត្ថភាព ការទូតសភាកម្ពុជា នៅលើឆាកអន្តរជាតិ ៖ ទី១ អគ្គលេខាធិការដ្ឋានរដ្ឋសភា ត្រូវរៀបចំផែនការយុទ្ធសាសស្ត្រសម្រាប់អនុវត្តកម្មវិធីកំណែទម្រង់រដ្ឋបាលសាធារណៈឲ្យបានជោគជ័យ ។ ទី២ អគ្គលេខាធិការដ្ឋានរដ្ឋសភា ត្រូវបន្តជំរុញការអនុវត្តកំណែទម្រង់ហិរញ្ញវត្ថុសាធារណៈដំណាក់កាលទី៣ និងទី៤ ដើម្បីលើកកម្ពស់គណនេយ្យភាព តម្លាភាព ប្រសិទ្ធភាព និងសង្គតិភាពថវិការដ្ឋ ។ ទី៣ អគ្គលេខាធិការដ្ឋានរដ្ឋសភា ត្រូវវៀបចំផែនការយុទ្ធសាស្ត្រសម្រាប់ធ្វើទំនើបកម្មស្ថាប័ន ឲ្យស្របទៅនឹងការវិវត្តរបស់ស្ថាប័ននានាក្នុងតំបន់ និងពិភពលោក ។ ទី៤ អគ្គលេខា ធិការដ្ឋានរដ្ឋសភា ត្រូវបន្តលើកកម្ពស់គុណភាពនៃការធ្វើទំនាក់ទំនង រវាងតំណាងរាស្ត្រ និងម្ចាស់ឆ្នោត និងជាមួយដៃគូអភិវឌ្ឍន៍ និងអង្គការជាតិ – អន្តរជាតិ ៕ ដោយ៖បញ្ញាស័ក្តិ