ភ្នំពេញ៖ ស្ថានទូតសហរដ្ឋអាមេរិកប្រចាំនៅរាជធានីភ្នំពេញ នៃព្រះរាជាណាចក្រកម្ពុជា នៅថ្ងៃទី១១ ខែមេសាឆ្នាំ ២០១៨ បានចេញសេចក្តីថ្លែងការណ៍ថានឹងមានឧបករណ៍ផ្ទុះដែលអាចមានក្នុងអំឡុងពេលចូលឆ្នាំខ្មែរឆ្នាំ២០១៨ នៅក្នុងតំបន់ទីតាំង វត្តភ្នំ និងតំបន់ផ្សេងៗទៀត នៅរាជធានីភ្នំពេញ និងខេត្តសៀមរាប ប្រទេសកម្ពុជា។
បើតាមសេចក្តីថ្លែងការណ៍ បានបញ្ជាក់ថា ព្រឹត្តិការណ៍ មានការរាយការណ៍ ពីប្រព័ន្ធផ្សព្វផ្សាយថា ក្រុមសកម្មជនមួយរូប អាចព្យាយាមដាក់ឧបករណ៍ផ្ទុះ នៅក្បែរវត្តភ្នំ រាជធានីភ្នំពេញ ឬទីតាំងស្រដៀងគ្នាផ្សេងទៀត នៅក្នុងទីក្រុងភ្នំពេញ ឬសៀមរាប ក្នុង អំឡុងពេលបុណ្យចូលឆ្នាំខ្មែរ ចាប់ពីថ្ងៃទី ១២ ខែមេសា ដល់ថ្ងៃទី ១៦ ខែមេសា ឆ្នាំ២០១៨ ។ បុគ្គលិករដ្ឋាភិបាលអាមេរិក ត្រូវបានគេណែនាំឲ្យប្រុងប្រយ័ត្ន ជុំវិញវត្តភ្នំ ហើយជាទូទៅត្រូវដឹងពីបរិយាកាសជុំវិញរបស់ពួកគេ។ ស្ថានទូតអាមេរិក នឹងត្រូវបិទឈប់សម្រាកសម្រាប់ថ្ងៃនៅថ្ងៃសុក្រទី១៣ ខែមេសា និងថ្ងៃចន្ទទី១៦ ខែមេសា ឆ្នាំ២០១៨ ។
សកម្មភាពដើម្បីអនុវត្តន៍ អនុវត្តប្រុងប្រយ័ត្នក្នុងតំបន់ដែលមានហ្វូងមនុស្សច្រើន។ ប្រសិនបើអ្នកឃើញវត្ថុ ដែលមិនចាំបាច់ ទុកឱ្យតំបន់នោះភ្លាម។ ថតចម្លងប្រព័ន្ធផ្សព្វផ្សាយ ក្នុងស្រុក ដើម្បីធ្វើបច្ចុប្បន្នភាព។ ត្រូវដឹងអំពីទីកន្លែងរបស់អ្នក។
នេះបើតាមការបង្ហោះសារដោយ Facebook Page ផ្លូវការរបស់ស្ថានទូតអាមេរិក នៅថ្ងៃទី១១ ខែមេសា ឆ្នាំ២០១៨។
សេចក្តីថ្លែងការណ៍ បានបញ្ជាក់ថា “សកម្មភាពដែលត្រូវធ្វើនោះ គឺត្រូវមានភាពប្រុងប្រយ័ត្ន នៅតាមតំបន់ដែលមានមនុស្សកកកុញច្រើន ប្រសិនបើប្រទះឃើញវត្ថុគេទុកចោលគួរឲ្យសង្ស័យ ចាកចេញពីទីនោះជាបន្ទាន់ តាមដានការវិវត្តន៍ស្ថានការណ៍ថ្មីៗ ពីប្រព័ន្ធផ្សព្វផ្សាយក្នុងស្រុក និងត្រូវមានការប្រុងប្រយ័ត្ន ជាប់ជានិច្ចចំពោះស្ថានភាពនៅជុំវិញខ្លួន”។
សម្តេចតេជោ ហ៊ុន សែន នាយករដ្ឋមន្ត្រី ក្នុងពិធីប្រគល់សញ្ញាបត្រដល់និស្សិតសកលវិទ្យាល័យ ជាតិគ្រប់គ្រង កាលពីព្រឹកថ្ងៃទី១០ ខែមេសា ឆ្នាំ២០១៨ បានថ្លែងថា ក្រុមជនធ្វើសកម្មភាពប្រឆាំងរាជរដ្ឋាភិបាលកម្ពុជា ដឹកនាំដោយបុគ្គលឈ្មោះ សម សេរី ដែលមានមូលដ្ឋាននៅក្រៅប្រទេសនោះ បានរៀបចំផែនការបំផ្លាញការសប្បាយរបស់ប្រជាពលរដ្ឋខ្មែរក្នុងឱកាសបុណ្យចូលឆ្នាំថ្មីប្រពៃណីជាតិខ្មែរនេះ។ សម្តេចតេជោ បានបន្តថា បញ្ហាយើងបានដឹងរួចរាល់ហើយ ព្រមទាំងបានរៀបចំវិធានការរក្សា សន្តិសុខតឹងរ៉ឺងបំផុត មិនឲ្យបំណងទុច្ចរិតរបស់ក្រុមជនក្បត់ជាតិ។ សម្តេចតេជោ ហ៊ុន សែន បានថ្លែងថា ក្រុម សម សេរី មានផែនការរៀបចំការបំផ្ទុះនៅវត្តភ្នំ និងនៅសៀមរាប ដើម្បីរំខានការលេងសប្បាយរបស់ប្រជាពលរដ្ឋខ្មែរ។ សម្តេចតេជោ បានថ្លែងបញ្ជាក់យ៉ាងដូច្នេះ ខ្ញុំសូមប្រកាសថា ផែនការលោកឯងពាក់ព័ន្ធថ្ងៃទី១២ នៅវត្តភ្នំ អ្នកឯងត្រូវប្រយ័ត្ន ខ្ញុំគ្រប់គ្រងសភាពការណ៍បានរួចមុនហើយ។ អាហ្នឹងមេក្បត់ជាតិមួយ សម សេរី កំពុងបញ្ជាមកឲ្យបង្កស្ថានភាពផ្ទុះ ខ្ញុំបានបញ្ជូនទៅឲ្យផ្នែកពាក់ព័ន្ធហើយ។ វាចង់បង្កឲ្យមានសំឡេងផ្ទុះ ប៉ុន្តែផែនការរបស់អ្នកឯង ខ្ញុំបានចាប់យករួចមុនទៅហើយ។ អ្នកឯងប្រុងធ្វើនៅភ្នំពេញ ហើយនិងនៅសៀមរាប។
ជាមួយគ្នានោះដែរ លោកនាយឧត្ដមសេនីយ៍ ជួន សុវណ្ណ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានប្រាប់ថា កម្លាំងចម្រុះនឹងត្រូវបានដាក់ពង្រាយឈរជើងប្រចាំការ ២៤ម៉ោង នៅតាមតំបន់គោលដៅសំខាន់ៗ ដើម្បីបែងចែកគ្នា ប្រចាំ ការក្នុងការដោះស្រាយ រាល់បញ្ហាដែលកើត មាននៅក្នុងពិធីបុណ្យ ចូលឆ្នាំប្រពៃណីខ្មែរខាងមុខ ពិសេសនៅទីវត្តអារាមរមណីយដ្ឋាន សួនកម្សាន្ត ជាដើម។ ការដាក់កម្លាំងចម្រុះនេះ គឺចាប់ពីថ្ងៃទី ១២ ដល់ថ្ងៃទី ១៨ខែមេសា។ លោក ជួន សុវណ្ណ បានបញ្ជាក់ថា កម្លាំងទាំងអស់នេះ នឹងយកចិត្តទុកដាក់ ដោយបែងចែកកម្លាំងទៅលើគ្រប់គោលដៅទាំងអស់ សំខាន់ៗ ដើម្បី ការពារសន្តិសុខ សុវត្ថិភាព បង្កសប្បាយរីករាយ ជូនដល់បងប្អូន ដែលបានទៅទីកន្លែងកំម្សាន្ត និងរមណីយដ្ឋានផ្សេងៗនៅខាងក្រៅ ក៏ដូចជាជួបនឹងបញ្ហាសន្តិសុខដោយសារជនខិលខូចឆ្លៀតឱកាស ។ លោក ស្នងការរាជធានី ក៏បានធ្វើការផ្ដាំផ្ញើដល់ប្រជាពលរដ្ឋទាំងអស់ ត្រូវមានការប្រុងប្រយ័ត្នទាំងអស់គ្នា៕ ដោយ៖បញ្ញាស័ក្តិ
