ភ្នំពេញៈ លោកទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិបានអញ្ជើញឲ្យគណៈប្រតិភូសហភាពអឺរ៉ុបមកចូលរួមសង្កេតការណ៍នៅក្នុងឱកាស នៃការបោះឆ្នោតទូទៅនៅឆ្នាំ២០១៨ ខាងមុខនេះ។ ភាគីប្រតិភូសភាអឺរ៉ុប បានស្វាគមន៍ចំពោះការអញ្ជើញរបស់កម្ពុជាឲ្យចូលរួមសង្កេតការណ៍នៅក្នុងការបោះឆ្នោតទូទៅនៅឆ្នាំ២០១៨។ ហើយសហភាពអឺរ៉ុបនឹងបញ្ជូនអ្នកសង្កេតការណ៍មកចូលរួមក្នុងការបោះឆ្នោតនៅកម្ពុជានាពេលខាងមុខនេះ។
គណៈប្រតិភូសភាអឺរ៉ុបជួបពិភាក្សាជាមួយលោកទេសរដ្ឋមន្ត្រី ប្រាក់ សុខុន
លោកទេសរដ្ឋមន្ត្រី ប្រាក់ សុខុន រដ្ឋមន្ត្រីសួងការបរទេស និងសហប្រតិបត្តិការអន្តរជាតិ បានពិភាក្សាការងារជាមួយគណៈប្រតិភូសភាអឺរ៉ុប ដឹកនាំដោយលោក វឺណឺ ឡែនជេន (Werner Langen) ប្រធានគណៈកម្មាធិការកិច្ចការសេដ្ឋកិច្ច និងរូបិយវត្ថុ នៃគណៈប្រតិភូសភាអឺរ៉ុប កាលពីព្រឹកថ្ងៃទី៣០ ខែតុលា ឆ្នាំ២០១៧ នៅទីស្តីការក្រសួងការបរទេស។ ប្រតិភូសភាអឺរ៉ុបមកបំពេញទស្សនកិច្ចនៅកម្ពុជារយៈពេលពីរថ្ងៃ គឺចាប់ពីថ្ងៃទី៣០ ដល់ថ្ងៃទី៣១ ខែតុលា ឆ្នាំ២០១៧។
នៅក្នុងជំនួបពិភាក្សា លោកទេសរដ្ឋមន្ត្រី ប្រាក់ សុខុន បានធ្វើការពន្យល់បកស្រាយដោយលំអិតអំពីដំណើរការប្រជាធិបតេយ្យនៅកម្ពុជា ដែលផ្សាភ្ជាប់គ្នាជាមួយនឹងការពង្រឹងនីតិរដ្ឋ។ ហើយបានគូសបញ្ជាក់អំពីករណីបិទកាសែត ឌឺ ខេមបូឌាដេលី និងការបិទអង្គការ NDI ក្នុងរយៈពេលកន្លងមក និងករណីចាប់ខ្លួនលោកកឹម សុខា ប្រធានគណបក្សប្រឆាំង។
លោកជុំ សុន្ទរី អ្នកនាំពាក្យក្រសួងការបរទេស បានថ្លែងប្រាប់ក្រុមអ្នកកាសែតបន្ទាប់ពីជំនួបចប់ថា លោកទេសរដ្ឋមន្ត្រី បានវាយតម្លៃខ្ពស់ចំពោះការរីកចំរើនដ៏ល្អប្រសើរក្នុងទំនាក់ទំនងរវាងព្រះរាជាណាចក្រកម្ពុជា និងសហភាពអឺរ៉ុប បន្ទាប់ពីបង្កើតឡើងនៅទំនាក់ទំនងផ្លូវការនៅក្នុងឆ្នាំ១៩៩៤ រហូតមកដល់ពេលបច្ចុប្បន្ននេះ។
ចំណែកលោកវឺណឺ ឡែនជេន ប្រធានគណៈកម្មាធិការកិច្ចការសេដ្ឋកិច្ច និងរូបិយវត្ថុ នៃគណៈប្រតិភូសភាអឺរ៉ុប បានជម្រាបជូនលោកទេសរដ្ឋមន្ត្រី អំពីរចនាសម្ព័ន្ធរបស់សភាអឺរ៉ុប និងបានលើកឡើងអំពីនយោបាយរបស់សហភាពអឺរ៉ុប ក្នុងការពង្រីកទំនាក់ទំនងជាមួយកម្ពុជា ក៏ដូចជាការរីកចំរើនដែលសម្រេចបានក្នុងទំនាក់ទំនងដ៏ល្អរវាងកម្ពុជា និងសហភាពអឺរ៉ុបក្នុងរយៈកាល២០ឆ្នាំកន្លងមកនេះ។
លោកវឺណឺ ឡែនជេន ក៏បានលើកឡើងដែរអំពីកិច្ចសហប្រតិបត្តិការដ៏ល្អរវាងសហភាពអឺរ៉ុបទំនងជាមួយកម្ពុជា ពិសេសការផ្តល់ជំនួយឧបត្ថម្ភរបស់សហភាពអឺរ៉ុបមកកម្ពុជា ក្នុងរយៈកាលជាង២០ឆ្នាំកន្លងមកនេះ ពិសេសគឺការផ្តល់នៅប្រព័ន្ធអនុគ្រោះទូទៅតាមរយៈអ្វីទាំងអស់ លើកលែងតែអាវុធមកដល់កម្ពុជា។ ហើយក៏បានលើកឡើងអំពីការផ្តល់ជំនួយឥតសំណងរបស់សហភាពអឺរ៉ុបមកកម្ពុជា ដែលមានចំនួន ៤២០លានយូរ៉ូ សម្រាប់រយៈពេលឆ្នាំ២០១៤ ដល់ឆ្នាំ២០២០។
អ្នកនាំពាក្យបានបន្តថា ប្រធានប្រតិភូសភាអឺរ៉ុប និងសមាជិកទាំងអស់បានមានមតិចាប់អារម្មណ៍ចំពោះការរីកចំរើននៅក្នុងកម្ពុជា និងវាយតម្លៃចំពោះទំនាក់ទំនងនិងកិច្ចសហប្រតិបត្តិការរវាងសហភាពអឺរ៉ុបជាមួយកម្ពុជា។ ហើយក៏បានសូមការផ្តល់ព័ត៍មានរបស់លោកទេសរដ្ឋមន្ត្រី ប្រាក់ សុខុន ចំពោះអនាគតនៃទំនាក់ទំនងរវាងសហភាពអឺរ៉ុបជាមួយកម្ពុជា ក៏ដូចជាព័ត៍មានស្តីអំពីសភាពការណ៍បច្ចុប្បន្ននៅកម្ពុជា និងព័ត៍មានផ្សេងៗទៀត ដែលពាក់ព័ន្ធនិងតួនាទីរបស់កម្ពុជានៅក្នុងអាស៊ាន និងពាក់ព័ន្ធសហគមន៍ជនជាតិឥស្លាមនៅកម្ពុជា។
ជាការឆ្លើយតបលោកទេសរដ្ឋមន្ត្រី ប្រាក់ សុខុន ក៏បានថ្លែងអំណរគុណចំពោះសហភាពអឺរ៉ុបដែលបានផ្តល់ជំនួយឧបត្ថម្ភជាច្រើនមកកម្ពុជា ក្នុងរយៈកាលជាង២០ឆ្នាំកន្លងមកនេះ។ ហើយជំនួយនោះបានចូលរួមយ៉ាងសំខាន់នៅក្នុងកិច្ចអភិវឌ្ឍន៍សេដ្ឋកិច្ច និងសង្គមរបស់កម្ពុជា ការកាត់បន្ថយភាពក្រីក្រ ការលើកស្ទួយផ្នែកសិទ្ធិមនុស្ស និងលទ្ធិប្រជាធិបតេយ្យ ក៏ដូចជានីតិរដ្ឋនៅកម្ពុជាក្នុងរយៈកាលកន្លងមកនេះ។
លោកទេសរដ្ឋមន្ត្រីក៏បានជម្រាបជូនគណៈប្រតិភូសភាអឺរ៉ុប អំពីការរីកចំរើននៅកម្ពុជាដែលទទួលបានក្នុងរយៈកាលកន្លងមកនេះ។ ឆ្លើយតបទៅនិងការចង់ដឹងរបស់គណៈប្រតិភូអំពីអនាគតនៃទំនាក់ទំនងរបស់កម្ពុជាជាមួយនិងសហភាពអឺរ៉ុប លោកទេសរដ្ឋមន្ត្រីកបានគូសបបញ្ជាក់អំពីសារៈសំខាន់នៃប្រព័ន្ធអនុគ្រោះទូទៅដែលសហភាពអឺរ៉ុបបានផ្តល់មកដល់កម្ពុជាតាមរយៈអ្វីៗទាំងអស់លើកលែងតែអាវុធ គឺបានរួមចំណែកដ៏សំខាន់ក្នុងកិច្ចអភិវឌ្ឍន៍កម្ពុជា ពិសេសកិច្ចអភិវឌ្ឍន៍ផ្នែកសេដ្ឋកិច្ច។ ហើយដែលជំនួយនោះក៏បានរួមចំណែកដល់ការលើកស្ទួយជីវភាពរបស់ប្រជាពលរដ្ឋទូទៅ តាមរយៈការបង្កើតការងារធ្វើជាច្រើនសម្រាប់ប្រជាពលរដ្ឋកម្ពុជា។
លោកទេសរដ្ឋមន្ត្រី ប្រាក់ សុខុន បានសម្តែងនៅក្តីសង្ឃឹមថា ទំនាក់ទំនងដ៏ល្អ និងកិច្ចសហប្រតិបត្តិការរវាងកម្ពុជា និងសហភាពអឺរ៉ុប នឹងត្រូវបានពង្រឹងនិងពង្រីកបន្ថែមទៀត។ លោកទេសរដ្ឋមន្ត្រីក៏បានវាយតម្លៃខ្ពស់ចំពោះបំណងប្រាថ្នារបស់សហភាពអឺរ៉ុបក្នុងការបង្កើននៅការផ្លាស់ប្តូរពាណិជ្ជកម្មជាមួយកម្ពុជា។ លោកទេសរដ្ឋមន្ត្រី ក៏បានគូសបញ្ជាក់អំពីការប្តេជ្ញាចិត្តរបស់រាជរដ្ឋាភិបាលកម្ពុជាក្នុងការពង្រឹងនិងពង្រីកទំនាក់ទំនង និងកិច្ចសហប្រតិបត្តិការជាមួយនិងសហភាពអឺរ៉ុបលើគ្រប់វិស័យទាំងអស់។ ពិសេសកិច្ចសហប្រតិបត្តិការនៅលើផ្នែកកសិកម្ម ការគ្រប់គ្រងធនធានធម្មជាតិ និងវិស័យអប់រំជាដើម។ ហើយក៏បានថ្លែងនៅអំណរគុណចំពោះការជួយឧបត្ថម្ភរបស់សហភាពអឺរ៉ុបលើផ្នែកបច្ចេកទេស ក៏ដូចជាផ្នែកហិរញ្ញវត្ថុដល់ការរៀបចំការបោះឆ្នោតនៅកម្ពុជា ចាប់តាំងពីការបោះឆ្នោតជាតិលើកទី២ ក្នុងឆ្នាំ១៩៩៨ រហូតមកដល់ពេលបច្ចុប្បន្ននេះ ហើយនិងការបញ្ជូនអ្នកសង្កេតការណ៍សហភាពអឺរ៉ុបមកចូលរួមសង្កេតការណ៍នៅរាល់ការបោះឆ្នោតកន្លងមកនៅកម្ពុជា។ ជាមួយគ្នានេះ លោកទេសរដ្ឋមន្ត្រី ប្រាក់ សុខុន ក៏បានអញ្ជើញឲ្យគណៈប្រតិភូសហភាពអឺរ៉ុបមកចូលរួមសង្កេតការណ៍នៅក្នុងឱកាស នៃការបោះឆ្នោតទូទៅនៅឆ្នាំ២០១៨ ខាងមុខនេះ។ ហើយលោកក៏បានថ្លែងអំណរគគុណនិងការវាយតម្លៃខ្ពស់ចំពោះជំនួយការជួយឧបត្ថម្ភទាំងផ្នែកបច្ចេកទេស និងហិរញ្ញវត្ថិកន្លងមកនេះរបស់សហភាពអឺរ៉ុប ចំពោះគណៈកម្មាធិការជាតិរៀបចំការបោះឆ្នោត (គ.ជ.ប) ។
ពាក់ព័ន្ធសភាពការណ៍នាពេលបច្ចុប្បន្ននៅកម្ពុជា លោកទេសរដ្ឋមន្ត្រី ប្រាក់ សុខុន បានធ្វើការពន្យល់បកស្រាយដោយលំអិតអំពីដំណើរការប្រជាធិបតេយ្យនៅកម្ពុជា ដែលផ្សាភ្ជាប់គ្នាជាមួយនឹងការពង្រឹងនីតិរដ្ឋ។ ហើយបានគូសបញ្ជាក់អំពីករណីបិទកាសែត ឌឺ ខេមបូឌាដេលី និងការបិទអង្គការ NDI ក្នុងរយៈពេលកន្លងមក និងករណីចាប់ខ្លួនលោកកឹម សុខា ប្រធានគណបក្សប្រឆាំង។
គណៈប្រតិភូសភាអឺរ៉ុប បានថ្លែងអំណរគុណចំពោះការពន្យល់បកស្រាយរបស់លោកទេសរដ្ឋមន្ត្រី ប្រាក់ សុខុន។ ហើយគណៈប្រតិភូក៏បានសម្តែងនៅការស្វាគមន៍ចំពោះការអញ្ជើញរបស់កម្ពុជាឲ្យចូលរួមសង្កេតការណ៍នៅក្នុងការបោះឆ្នោតទូទៅនៅឆ្នាំ២០១៨៕ ដោយៈ មុនីរាជ
