ខេត្តកំពត ៖ នាយកដ្ឋាននគរបាលបង្ការពន្លត់អគ្គិភ័យនិងសង្គ្រោះ នៃអគ្គស្នងការដ្ឋាននគរបាលជាតិ បានឲ្យដឹងថា ថ្ងៃចន្ទ ទី០៣ ខែមករា ឆ្នាំ២០២២ វេលាម៉ោង ១៣និង១០នាទី មានករណីអគ្គិភ័យ ឆាបឆេះរថយន្តចំនួន០១គ្រឿង តាមបណ្តោយផ្លូវជាតិលេខ៣២ ផ្លូវឡើងបូកគោ ចន្លោះបង្គោលគីឡូម៉ែត្រលេខ ១៥-១៦ ស្ថិតនៅភូមិរលួស សង្កាត់បឹងទូក ក្រុងបូកគោ ខេត្តកំពត ។
រថយន្តម៉ាកកាម៉ារីបាឡែន ពណ៌ទឹកប្រាក់ ពាក់ផ្លាកលេខ ភ្នំពេញ ២S ៣៧៤៥ មានទិសដៅពីក្រោមឡើងទៅលើភ្នំបូកគោ លុះដល់កន្លែងកើតហេតុ បានឆ្លងភ្លើងបណ្ដាលឲ្យឆេះតែម្ដង ។
ករណីនេះរថយន្តអគ្គិភ័យ របស់ក្រុមហ៊ុនអូតែលសុខា មកបា.ញ់ពន្លត់។ អ្នកបើបររថយន្ដឈ្មោះ ចាប ផាង ភេទ ប្រុស អាយុ ៦៤ ឆ្នាំ រស់នៅភូមិឡូរី សង្កាត់រកាក្នុង ក្រុងដូនកែវ ខេត្តតាកែវ មិនមានរបួស និងអ្នករួមដំណើរមួយនាក់ឈ្មោះ ភឹម សាវុធ ភេទ ប្រុស អាយុ ៦៥ ឆ្នាំ រស់នៅភូមិសែនបន ឃុំលាយបូរ ស្រុកត្រាំកក់ខេត្តតាកែវ មិនមានរបួស ។
រថយន្តដែលឆេះ ត្រូវបានកម្លាំងជំនាញ ទាក់ទងឡានស្ទួច ដើម្បីស្ទួចយកមករក្សាទុកនៅ អធិការដ្ឋាននគរបាលក្រុងបូគោ ៕ រក្សាសិទ្ធិដោយ ៖ សុទ្ធ លី
