មនុស្ស ១០ នាក់ បានស្លាប់គួរឲ្យអាសូរ និង៣២នាក់ផ្សេងទៀតរងរបួស នៅក្នុងឧបទ្ទវហេតុដ៏រន្ធត់ បាក់ផ្នែកមួយនៃច្រាំងថ្មភ្នំ ទៅលើទូកកម្សាន្តទាំងកម្រោល នៅរមណីយដ្ឋានបឹងមួយកន្លែង នៅក្នុងប្រទេសប្រេស៊ីល។
វីដេអូដែលត្រូវបានផ្សព្វផ្សាយនៅលើអិុនធឺណិតបានបង្ហាញពីខណៈពេលដែលបំណែកផ្ទាំងថ្មដ៏ធំមួយត្រូវបានហែកចេញពីមុខច្រាំង ខណៈដែលអ្នកមើលព្យាយាមស្រែកព្រមានដល់ទូកភ្ញៀវទេសចរនៅខាងក្រោម។
តាមរយៈវីដេអូ គេបានឃើញទូកមួយក្នុងចំណោមទូកភ្ញៀវទេសចរប៉ុន្មានគ្រឿង ហាក់ដូចជាបានលិច ខណៈពេលដែលអ្នកផ្សេងទៀតបានរត់គេចពីរលកបែកខ្ញែកដ៏ធំ បន្ទាប់ផ្ទាំងថ្មបានបាក់ដួលរលំចូលទឹក។
មន្ត្រីពន្លត់អគ្គីភ័យក្នុងតំបន់បានប្រាប់អ្នកយកព័ត៌មានថា ការបាក់រលំនេះបានកើតឡើងនៅម៉ោង 11:00 (ម៉ោងក្នុងស្រុក) បន្ទាប់ពីភ្លៀងជាច្រើនថ្ងៃនៅក្នុងរដ្ឋ Minas Gerais ដែលបានធ្វើឱ្យច្រាំងថ្មភ្នំ ងាយនឹងបាក់រលំ។
ស្ត្រីម្នាក់អាចត្រូវបានគេឮនិយាយនៅក្នុងវីដេអូនៃគ្រោះថ្នាក់ដ៏រន្ធត់នេះ ដោយធ្វើការព្រមានមុនពេលច្រាំងថ្មបាក់មកលើទូកថា «បំណែកនោះនឹងធ្លាក់ពុំខាន ឆាប់ប្រញាប់ចាកចេញពីទីនេះទៅ!»។
អនុសេនីយ៍ឯក Pedro Aihara បានប្រាប់អ្នកយកព័ត៌មានថា ទូកចំនួន៣គ្រឿង ត្រូវបានវាយប្រហារដោយការធ្លាក់ថ្មនេះ។ ក្នុងចំណោមអ្នករបួសទាំង៣២នាក់ មាន៩នាក់កំពុងសម្រាកព្យាបាលនៅមន្ទីរពេទ្យ។
ពេលនេះ អាជ្ញាធរកំពុងព្យាយាមកំណត់អត្តសញ្ញាណអ្នកស្លាប់ ដោយសារតែសាកសពរបស់ពួកគេមួយចំនួនរងការប៉ះទង្គិចធ្ងន់ធ្ងរខ្លាំងពេកនៅក្នុងហេតុការណ៍ការបាក់រលំបំណែកច្រាំងថ្មដ៏រន្ធត់បំផុតនេះ៕ រក្សាសិទ្ធិដោយ៖ លឹម ហុង
