Friday, March 29, 2024

ទំនាក់ទំនង : 0716140005

Address : #16 (Borey New World) St. 6A sk . Phnom Penh Thmey kh. Sen Sok ct., Phnom Penh 120913 Office: +85523232725 Tel: 017 93 61 91

កម្ពុជា-អង្គការ Helen Keller ចុះអនុស្សរណៈស្តីពីការលើកកម្ពស់សុខភាពកម្មករនៅកន្លែងធ្វើការ

spot_img

កម្មករមានសេចក្តីរីករាយ និងចាប់ផ្តើមមានដង្ហើមដក បន្ទាប់ពីក្រសួងការងារ និងបណ្តុះបណ្តាលវិជ្ជាជីវៈ បានចុះអនុស្សរណៈយោគយល់គ្នាជាមួយអង្គការ Helen Keller International Cambodia ដើម្បីចាប់ផ្តើមគម្រោងលើកកម្ពស់សុខភាព និងអាហារូបត្ថម្ភរបស់ស្រ្តី និងកម្មករនៅកន្លែងធ្វើការ និងរោងចក្រ។​ គាំទ្រដោយកម្មវិធី GIZ-MUSEFO ការចុះអនុស្សរណៈនេះដើម្បីស្វែងរកការលើកកម្ពស់សុខភាព និងសេដ្ឋកិច្ចរបស់កម្ពុជា។

តាមរយៈកម្មវិធីនេះ លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករ (CUMW) បានសម្តែងការរំពឹងទុកថា បន្ទាប់ពីគម្រោងនេះទទួលបានជោគជ័យ សុខភាពកម្មកររោងចក្រនឹងល្អប្រសើរឡើង ដែលនឹងជួយបង្កើនផលិតកម្មសម្រាប់អ្នកវិនិយោគបានច្រើនជាងមុន។ កិច្ច​ព្រម​ព្រៀង​នេះ​ត្រូវ​បាន​ធ្វើ​ឡើង​បន្ទាប់​ពី​សង្ខេតឃើញថាកម្មករ​រោងចក្របានជួប​ឧប្បត្តិហេតុ​ដួល​សន្លប់​ដោយ​សារអាហារ​កង្វះ​សារធាតុ​ចិញ្ចឹមដោយសារតែកម្មករញុំាតែ​អាហារ​ដែល​មាន​គុណភាព​មិនសូវល្អ និងខ្វះជីវជាតិ ក្នុងគោលបំណង​សន្សំ​ប្រាក់ដើម្បីផ្គត់ផ្គង់គ្រួសាររបស់ពួកគេ។

លោក ប៉ាវ ស៊ីណា ​ ប្រធាន​សម្ព័ន្ធ​សហជីព​ចលនា​កម្មករ(CUMW) បានមានប្រសាសន៍ថា“ខ្ញុំបានតាមដានកិច្ចប្រជុំនេះ ខ្ញុំគិតថាវាពិតជាមានសារៈសំខាន់មែនទែន​ ប្រសិនបើដំណើរការរបស់គម្រោងនេះទទួលបានជោគ​ជ័យ ព្រោះអាចជួយដល់កម្មកររោងចក្ររបស់ប្រទេសកម្ពុជាយើងបានច្រើន​ ទៅលើការយកចិត្តទុកដាក់ការលើកម្ពស់សុខភាពរបស់កម្មករ​ និង​ជាពិសេសការយល់ដឹងពីអាហាររូបត្ថម្ភ​ មានសំខាន់ក្នុងការជួួយលើកកម្ពស់សុខភាពកម្មករ។”

លោក ប៉ាវ ស៊ីណា​ មានប្រសាសន៍បន្តថា “ដូច្នេះវាពិតជាមានសារៈសំខាន់ណាស់សម្រាប់កម្មកររោងចក្រ ព្រោះនាពេលបច្ចុប្បន្នចំណូលរបស់ពួកគាត់នៅមានកម្រិតនៅឡើយក្នុងការទិញរបបអាហារដែលមានជីវជាតិ​និងអនាម័យត្រឹមត្រូវ ដូច្នេះហើយទើបពួកគាត់ត្រូវសន្សំរាល់ចំណូលរបស់ពួកគាត់។”

អ្នកស្រី​ សាន់ សុផា កម្មការនីរោងចក្រ​ បានឱ្យដឹងថា​ “ពួកខ្ញុំដឹងថាម្ហូបដែលវិចខ្ចប់លក់មុខរោងចក្រថាមិនមានជីវជាតិនិងខ្វះអនាម័យ បន្លែនិងសាច់ក៏មិនស្រស់​ តែពួកខ្ញុំគ្មានជម្រើស ចឹងពួកខ្ញុំត្រូវតែញុំដើម្បីបំពេញក្រពះ។”

កញ្ញា ឈាង​ ស៊ីណៃ​ កម្មការនីរោងចក្រ បានលើកឡើងដែរថា “រាល់ថ្ងៃខ្ញុំទិញអាហារថ្ងៃត្រង់មុខរោងចក្រ វាមិនមានជីវជាតិគ្រប់គ្រាន់នោះទេ ដូច្នេះខ្ញុំត្រូទិញភេសជ្ជៈដើម្បីជំនួយកម្លាំង។ រាល់ថ្ងៃខ្ញុំចំណាយសម្រាប់អាហារថ្ងៃត្រង់អស់២៥០០៛ (០.63$)​។ “

អ្នកស្រី ហ៊ាង សុណារី កម្មការនីរោងចក្រ​ បានឱ្យដឹងថា “កម្មកររោងចក្រខ្លះគាត់ត្រូវចិញ្ចឹមទាំងម្តាយឪពុកជម្រា​ និងកូនរបស់គាត់ ដែលពួកគេស្ថិតនៅក្នុងវ័យសិក្សាថែមទៀត។​ ប្រសិនជាគាត់ចង់ញុំាអាហារដែលល្អសម្រាប់សុខភាព​ នោះគាត់ប្រាកដជាគ្មានលុយគ្រប់គ្រាន់សម្រាប់ផ្គត់ផ្គង់គ្រួសាររបស់គាត់។ សព្វថ្ងៃគាត់ញុំាត្រឹមតែ ២៥០០៛ (0.63$)​ផង គាត់នៅតែជួបបញ្ហាក្នុងគ្រួសារ​ ទោះបីគាត់ចំណាយត្រឹមតែ៥០០០៛ (1.25$)​សម្រាប់មួយពេល នោះគាត់ពិតជាគ្មានលុយសម្រាប់បង់ថ្ងៃសាលានោះទេ។”

កញ្ញា ឈាង​ ស៊ីណៃ កម្មការនីរោងចក្រ បាននិយាយថា “ភាគច្រើនខ្ញុំសង្ខេតឃើញថា អ្នកដែលញុំាអាហារថ្ងៃត្រង់ក្បែរៗខ្ញុំ​គឺមិនមានសុខភាពល្អនោះទេ អ្នកខ្លះស្លេកស្លាំង ហើយភាគច្រើនពួកគេមានជំងឺវិល។”

លោក ប៉ាវ ស៊ីណា ប្រធាន​សម្ព័ន្ធ​សហជីព​ចលនា​កម្មករ(CUMW) ​បានលើកឡើងទៀតថា “ដើម្បីធ្វើអោយការសាកល្បងមួយនេះទទួលបានជោគជ័យលុះត្រាតែមានការចូលរួមពីក្រុមអ្នកបញ្ជាទិញ ព្រោះក្រុមអ្នកបញ្ជាទិញមានការតាំងចិត្តសម្រាប់ក្រមសីលធម៌របសគាត់ជុំវិញការលើកកម្ពស់ទាំងជីវភាព និង សុខភាពកម្មករ ជាពិសេសបរិស្ថាននៅកន្លែងធ្វើការ ដូច្នេះនេះជារឿងសំខាន់បំផុតដែលក្រុមអ្នកបញ្ជាទិញត្រូវតែចូលរួម។”​

លោក ប៉ាវ ស៊ីណា បានបន្តថា “ប្រសិនជាគម្រោងនេះទទួលបានជោគជ័យ​ ខ្ញុំជឿជាក់ថាសុខភាពរបស់កម្មករនឹងមានភាពល្អប្រសើរជាងមុន ហើយប្រសិនជាសុខភាពកម្មករមានភាពល្អប្រសើរនោះការផលិតនឹងមានការកើនឡើង។​ ប្រសិនជារោងចក្រមួយមានកម្មករដួលសន្លប់ច្រើន ដូច្នេះបញ្ហាផលិតនឹងធ្លាក់ចុះ។ ដូច្នេះការយកចិត្តទុកដាក់គិតគូរពីបញ្ហាសុខភាព ពីបញ្ហាម្ហូបអាហារ និងការកែលម្អឱ្យមានភាពល្អប្រសើរសម្រាប់ថ្ងៃអនាគត់ គឺជារឿងសំខាន់ណាស់។ ខ្ញុំសង្ឃឹមថាគម្រោងមួយនេះនឹងទទួលបានជោគជ័យ”៕ ប្រភព៖ A24

spot_img
×