ការព្រមានផ្សេងៗ និងក៏ដូចការដាក់ទណ្ឌកម្មរបស់ប្រធានាធិបតីអាមេរិក Joe Biden បានបង្ហាញថា មិនទទួលបានជោគជ័យក្នុងការបញ្ឈប់រុស្ស៊ីឈ្លានពានអ៊ុយក្រែនឡើយ។ មានសេចក្តីរាយការណ៍ថា កងទ័ពរុស្ស៊ីបានដណ្តើមបានយ៉ាងងាយស្រួលទីក្រុង Kherson ក្នុងប្រទេសអ៊ុយក្រែន ហើយទាហានរបស់ខ្លួន ក៏បានចូលក្រុង Kharkiv ផងដែរ។
យោងតាមរបាយការណ៍របស់ CNN រូបថតអេក្រង់នៃ webcam និងវីដេអូត្រូវបានគេកំណត់ទីតាំងភូមិសាស្ត្រ បង្ហាញថា កងទ័ពរុស្ស៊ីកំពុងមានវត្តមាននៅក្នុង Kherson ដោយពួកគេកំពុងស្ថិតនៅភាគខាងកើតនៃទីក្រុងនេះ។
របាយការណ៍បាននិយាយថា រថយន្តយោធារុស្ស៊ីត្រូវបានគេឃើញនៅផ្លូវបំបែកមួយនៅភាគខាងជើង Kherson កាលពីថ្ងៃអង្គារ។ រូបថតអេក្រង់របស់ Webcam បង្ហាញរថយន្តយោធារុស្ស៊ីនៅលើទីលាន Svobody នៅកណ្តាល Kherson ។ បន្ទាប់ពីការបាញ់ផ្លោងជាច្រើនថ្ងៃ និងការប្រយុទ្ធគ្នាយ៉ាងខ្លាំងក្លា កងកម្លាំងរុស្ស៊ីត្រូវបានគេឃើញមុននេះនៅផ្នែកខាងកើតនៃទីក្រុង។
អភិបាលក្រុងនេះ បានសរសេរបង្ហោះតាមហ្វេសប៊ុកថា វីដេអូផ្តល់ភស្តុតាងថ្មី ជនជាតិរុស្សីកំពុងដើរចច្រប់ដោយសេរីនៅក្នុង Kherson ។ វីដេអូក៏បង្ហាញផងដែរថា កងទ័ពរុស្ស៊ីបានរុលទៅមុខពី Crimea ហើយបានបង្កើតច្រកឆ្លងកាត់ទន្លេ Dnieper ។
នៅរសៀលថ្ងៃអង្គារ អភិបាលក្រុង Kherson លោក Igor Kolkhayev បានបង្ហោះសារយ៉ាងតឹងរ៉ឹងនៅលើ Facebook ដោយព្រមានថា ទីក្រុងកំពុងស្ថិតនៅក្រោមការវាយប្រហារ។ លោកបានសរសេរថា អគារលំនៅឋាន និងអគារក្នុងទីក្រុងកំពុងឆេះ។
អភិបាលក្រុងរូបនេះ នៅបានសរសេរថា “ប្រសិនបើទាហានរុស្ស៊ី និងថ្នាក់ដឹកនាំរបស់ពួកគេស្តាប់ខ្ញុំ នូវអ្វីដែលខ្ញុំបាននិយាយថា គួរតែចាកចេញពីទីក្រុងរបស់យើង ឈប់បាញ់ផ្លោងជនស៊ីវិល។ អ្នកបានយកអ្វីគ្រប់យ៉ាងដែលអ្នកចង់បាន រួមទាំងជីវិតរបស់មនុស្សផងដែរ។ ហើយអ្វីដែលគួរឲ្យកត់សម្គាល់នោះ គឺថ្ងៃនេះជាថ្ងៃទី៧នៃសង្គ្រាមដែលកំពុងកើតឡើងរវាងរុស្ស៊ី និងអ៊ុយក្រែន។
មានការខិតខំប្រឹងប្រែងជាបន្តបន្ទាប់នៅកម្រិតអន្តរជាតិ ដើម្បីបញ្ឈប់ប្រធានាធិបតីរុស្ស៊ីលោក វ្ល៉ាឌីមៀ ពូទីន ប៉ុន្តែលោកមិនទាន់ត្រៀមខ្លួនស្តាប់អ្វីទាំងអស់៕ រក្សាសិទ្ធិដោយ៖ លឹម ហុង
