អ្នកពេទ្យទាហានអ៊ុយក្រែនម្នាក់ បានពលីជីវិតនៅសមរភូមិ ខណៈពេលនាងកំពុងរត់កាត់គ្រាប់កាំភ្លើងបាញ់ស្រោចរបស់កងទ័ពរុស្ស៊ី ដើម្បីជម្លៀសអ្នករបួសចេញពីជាយក្រុងគៀវ។ ហើយសពរបស់នាងក៏ត្រូវបានបញ្ចុះនៅក្នុងរដ្ឋធានីរបស់ប្រទេសនេះផងដែរ កាលពីថ្ងៃសៅរ៍។
វីរនារីគ្រូពេទ្យ Valentyna Pushich ត្រូវបានគេស្គាល់ក្នុងស្រុកថា “Romashka” ដែលមានន័យថា “Daisy” ។ មិត្តភ័ក្តិម្នាក់របស់នាង បានពណ៌នានាងថា នាងជា «មនុស្សហ៊ាន» ដែលមិនខ្លាច «ត្រូវរងគ្រាប់កាំភ្លើង» ឡើយ។
នាង Nataliia Voronkova ដែលជាមិត្តភក្តិ បាននិយាយថា Pushich តែងតែ “រត់ទៅកន្លែងគ្រោះថ្នាក់បំផុត” ដើម្បីជួយសង្គ្រោះអ្នករបួស។
Pushich ធ្លាប់ជាបុគ្គលិកដែលមានប្រាក់ខែល្អនៅក្រុមហ៊ុនដឹកជញ្ជូនមួយ។ ប៉ុន្តែនៅឆ្នាំ ២០១៦ នាងបានចូលរួមជាមួយកងទ័ពជាគ្រូពេទ្យ ដើម្បីឆ្លើយតបទៅនឹងជម្លោះបំបែកខ្លួននៅភាគខាងកើតអ៊ុយក្រែន។
ស្ត្រីជាច្រើននាក់ រួមទាំងអ្នកខ្លះស្ថិតក្នុងឈុតទាហាន បានស្រក់ទឹកភ្នែក ខណៈសាកសពរបស់នាងដាក់ក្នុងមឈូស និងរៀបនឹងបញ្ចុះនៅទីកន្លែងបញ្ចុះសពមួយ។ ហើយរូបគំនូររបស់នាង ក៏ត្រូវបានគូរស្ថិតនៅលើជញ្ជាំងក្បែរនោះផងដែរ៕ រក្សាសិទ្ធិដោយ៖ លឹម ហុង
