នៅទីក្រុង Mykolaiv មនុស្សរាប់ពាន់នាក់បានជម្លៀសចេញ ប៉ុន្តែ សម្រាប់អ្នកដែលនៅសេសសល់ ជីវិតរបស់ពួកគេ កំពុងប្រឈមនឹងការលំបាកជាច្រើន ជាពិសេសកុមារដែលត្រូវការការថែទាំផ្នែកវេជ្ជសាស្ត្រ។ បច្ចុប្បន្ននេះ កុមារចំនួន ១២នាក់ កំពុងត្រូវបានព្យាបាលនៅក្នុងបន្ទប់ក្រោមដីនៃមន្ទីរពេទ្យ ដោយសារក្តីបារម្ភអំពីគ្រាប់កាំភ្លើងផ្លោងដាក់គ្នារវាងកងទ័ពរុស្ស៊ី និងអ៊ុយក្រែន។
ជាក់ស្តែង អស់រយៈពេល៣សប្តាហ៍មកហើយ ដែល Sofia អាយុ ១៣ ឆ្នាំ មិនអាចក្រោកពីគ្រែនៅក្នុងបន្ទប់ក្រោមដី នៃមន្ទីរពេទ្យក្នុងទីក្រុង Mykolaiv ភាគខាងត្បូងអ៊ុយក្រែន បាននៅឡើយទេ។ នាងបានទទួលការវះកាត់ចំនួន ៣ ដង ប៉ុន្តែ ក្រុមគ្រូពេទ្យមិនអាចយកកម្ទេចនៃគ្រាប់បែកចេញពីលលាដ៍ក្បាលរបស់នាងបានឡើយ។
អ្នកស្រី Ludmila ដែលជាម្តាយ Sofia បាននិយាយថា៖ «ខ្ញុំនៅតែរក្សាជំនឿថាអ្វីៗនឹងមិនអីទេ។ ខ្ញុំ និងកូនស្រីរបស់ខ្ញុំ គឺមិនត្រូវបំបែក។ ហើយមិនអុីចឹងទុកឲ្យខ្ញុំដួលតែឯងល្អជាង…»។
គួរបញ្ជាក់ថា Sofia គឺជាអ្នកជំងឺកុមារម្នាក់ក្នុងចំណោមអ្នកជំងឺ ១២ នាក់ ដែលកំពុងសម្រាកព្យាបាលនៅក្នុងបន្ទប់ក្រោមដីនៃមន្ទីរពេទ្យមួយកន្លែង។ ក្រៅពីនាង គឺមានក្មេងស្រីឈ្មោះ Arina អាយុ ៧ ឆ្នាំ, Micha អាយុ ៥ ឆ្នាំ បានបាត់បង់ឪពុកម្តាយរបស់នាងនៅក្នុងការបំផ្ទុះគ្រាប់បែក ហើយប្អូនតូចរបស់នាង ក៏រងរបួសដែរ កំពុងត្រូវបានជីដូនជីតាមើលថែ។
កុមារ២នាក់បានស្លាប់នៅក្នុងមន្ទីរពេទ្យនេះ បន្ទាប់ពីត្រូវគ្រាប់ផ្លោង។ អ្នកស្រុកជាច្រើនរួមទាំងកុមារ នៅតែចាកចេញពីទីក្រុង ដើម្បីសុវត្ថិភាពរបស់ពួកគេ។ តែទោះយ៉ាងណា អ្នកដែលនៅសេសសល់សង្ឃឹមថា ជីវិតអាចវិលមករកភាពប្រក្រតីវិញបាន៕ រក្សាសិទ្ធិដោយ៖ លឹម ហុង
