ភ្នំពេញ : ឆ្លងចរន្តអគ្គិសនីឆេះបណ្ដាញខ្សែអ៊ីនធឺណិត បង្កឱ្យមានការភ្ញាក់ផ្អើលដល់រថយន្តពន្លត់អគ្គិភ័យ និងកម្លាំងសមត្ថកិច្ចមូលដ្ឋាន ចុះជួយអន្តរាគមន៍ធ្វើការបា.ញ់ពន្លត់ឲ្យរលត់ទៅវិញ។
ហេតុការណ៍នេះបានកើតឡើងកាលពីវេលាម៉ោង ១១និង៤០នាទីថ្ងៃទី២០ខែមេសាឆ្នាំ ២០២២ស្ថិតនៅតាមបណ្ដោយផ្លូវ ២០០៤ សង្កាត់អូរបែកក្អម ខណ្ឌសែនសុខ រាជធានីភ្នំពេញ។
តាមប្រភពព័ត៌មាននៅកន្លែងកើតហេតុ បានឲ្យដឹងថា មុនកើតហេតុ ឃើញផ្សែងហុយពីបង្គោលភ្លើងខាងលើ ចេញជាអណ្ដាតភ្លើងឆាបឆេះយ៉ាងសន្ធោសន្ធៅ បង្កឱ្យមានការភ្ញាក់ផ្អើលដល់អ្នកធ្វើដំណើរ ក៏រាយការណ៍ជូនកម្លាំងសមត្ថកិច្ចមូលដ្ឋាន និងរថយន្តពន្លត់អគ្គិភ័យ ចេញជួយអន្តរាគមន៍ ធ្វើការបាញ់ឲ្យរលត់ទៅវិញភ្លាមៗ។
បើតាមន្ត្រីអគ្គិសនីបានបញ្ជាក់ថា ករណីអគ្គិភ័យខាងលើនេះមិនមែនឆេះខ្សែភ្លើងនោះទេ គឺឆេះខ្សែបណ្ដាញអ៊ីនធើណិត ហើយមិនរាលដាលដល់ផ្ទះអ្នកជិតខាងឡើង រថយន្តពន្លត់អគ្គិភ័យចេញជួយអន្តរាគមន៍ ចំនួនមួយគ្រឿង ធ្វើការបា.ញ់ឲ្យរលត់ទៅវិញជាស្ថាពរ៕ រក្សាសិទ្ធិដោយ ៖ សួង សាម
