ភ្នំពេញ៖ ឯកឧត្តម ហ៊ុន ម៉ានី បានថ្លែងសារនៅលើផេកហ្វេសប៊ុកផ្លូវការ នៅថ្ងៃអាទិត្យនេះថា ថ្ងៃនេះបងប្អូនប្រជាពលរដ្ឋ ភ្នំលោកតា លោកយាយ អ៊ំ ពូមីង បានអនុវត្តសិទ្ធរបស់ខ្លួនតាមរយៈការចេញទៅបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី០៥ ឆ្នាំ២០២២ ដែលខ្លួនមានជំនឿទុកចិត្តសម្រាប់ការដឹកនាំរយៈពេល៥ឆ្នាំបន្តទៅមុខ នៅតាមមូលដ្ឋានរៀងៗខ្លួន។ ការចេញទៅបោះឆ្នោតនេះ ក៏ជាការអនុវត្តសិទ្ធអំណាចរបស់ខ្លួនក្នុងនាមជាម្ចាស់ជោគវាសនារបស់ប្រទេសជាតិ។
ដំណើរការបោះឆ្នោតនាថ្ងៃទី០៥ ខែមិថុនា ឆ្នាំ២០២២ ត្រូវបានបញ្ចប់ដោយរលូន សេរី ត្រឹមត្រូវ និងយុត្តិធម៌ នៅវេលាម៉ោង៣៖០០ រសៀលនេះទូទាំងប្រទេស។ ទន្ទឹមនេះ បើតាមរបាយការណ៍បឋមរបស់គណៈកម្មការជាតិរៀបចំការបោះឆ្នោត ប្រជាពលរដ្ឋចំនួន ៧.១ លាននាក់ ស្មើនឹង ៧៧.៩១% នៃអ្នកដែលមានឈ្មោះក្នុងបញ្ជីបោះឆ្នោត បានអញ្ចើញចេញទៅបោះឆ្នោតតាមការិយាល័យដែលបានកំណត់។
ការណ៍នេះ សបញ្ជាក់ឱ្យឃើញថាប្រជាពលរដ្ឋកម្ពុជា បានយល់ច្បាស់ពីសារសំខាន់នៃការចេញទៅបោះឆ្នោត ដើម្បីធានាបាននូវស្ថេរភាពនៃដំណើរការលទ្ធិប្រជាធិបតេយ្យ ដែលជាមូលដ្ឋានក្នុងការរក្សា និងធានាជីវភាពការរស់នៅប្រចាំថ្ងៃ ព្រមទាំងសុខសន្តិភាពក្នុងប្រទេស។
ចំណែកអ្នកសង្កេតការណ៍អន្តរជាតិ ចុះសង្កេតមើលដំណើរការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ នៅសង្កាត់ស្ទឹងមានជ័យមួយ ខណ្ឌមានជ័យ រាជធានីភ្នំពេញ នាព្រឹកថ្ងៃអាទិត្យ ទី៥ ខែមិថុនា ឆ្នាំ២០២២៕ រក្សាសិទ្ធិដោយ ៖ សុទ្ធ លី
