ក្រុមអ្នកសង្កេតការណ៍អន្តរជាតិ អះអាងថា ការបោះឆ្នោតជ្រើសរើស ក្រុមប្រឹក្សាឃុំសង្កាត់អាណត្តិទី៥ ដំណើរការល្អ សេរី និងយុត្តិធម៌

ភ្នំពេញ ៖ ក្រុមអ្នកសង្កេតការណ៍អន្តរជាតិ បានបញ្ជាក់ថា ការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥ នៅក្នុងប្រទេសកម្ពុជា កាលពីថ្ងៃអាទិត្យ ទី០៥ ខែមិថុនា ឆ្នាំ២០២២ កន្លងទៅនេះ ដំណើរការយ៉ាងល្អត្រឹមត្រូវ សេរី មានតម្លាភាព និងយុត្តិធម៌។

ក្រុមអ្នកសង្កេតការណ៍អន្តរជាតិ បានថ្លែងបែបនេះនៅក្នុងសន្និសីទសារព័ត៌មានមួយ នៅសណ្ឋាគារហៃយ៉ាត់ រាជធានីភ្នំពេញ នាព្រឹកថ្ងៃទី០៦ ខែមិថុនា ឆ្នាំ២០២២នេះ។

សូមរំលឹកថា អ្នកសង្កេតការណ៍អន្តរជាតិ បានចុះសង្កេតមើលដំណើរការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ នៅ រាជធានីភ្នំពេញ និងតាមបណ្តាខេត្ត នាព្រឹកថ្ងៃអាទិត្យ ទី៥ ខែមិថុនា ឆ្នាំ២០២២។

ការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥ បានបិទបញ្ចប់ កាលពីល្ងាចថ្ងៃទី០៥ ខែមិថុនា ដោយមានប្រជាពលរដ្ឋ ៧៧.៩១ភាគរយ ស្មើនឹងជាង៧.១លាននាក់ បានមកចូលរួមបោះឆ្នោត ក្នុងចំណោមអ្នកដែលមានឈ្មោះ ក្នុងបញ្ជីឈ្មោះបោះឆ្នោតជាង៩.២លាននាក់។

ការបោះឆ្នោតនេះមានការចូលរួមសង្កេតការណ៍ដោយបណ្តាស្ថាប័ន អង្គការ សហគមន៍ចំនួន៧២ និងសហគមន៍អន្តរជាតិចំនួន១៩។ ព្រមទាំងមានភ្ញៀវពិសេស ចំនួន៥ ស្ថាប័នផងដែរ ក្នុងនោះមានស្ថានទូតជប៉ុន អូស្រ្តាលី និងរុស្ស៉ីជាដើម។

នារសៀលថ្ងៃអាទិត្យ ទី៥ ខែមិថុនា ឆ្នាំ២០២២ នៅសាលសន្និសីទ គ.ជ.ប វេលាម៉ោង ១៧:០០ គណៈកម្មាធិការជាតិរៀបចំការបោះឆ្នោត (គ.ជ.ប) បានប្រជុំផ្សព្វផ្សាយជាមួយភាគីពាក់ព័ន្ធ ស្ដីពី ការសរុបព្រឹត្តិការណ៍ទូទៅនៃការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ និងការប្រកាសលទ្ធផលបឋមនៃការបោះឆ្នោត នៅ គ.ជ.ប ក្រោមអធិបតីភាពដ៏ខ្ពង់ខ្ពស់របស់ ឯកឧត្តម ប្រាជ្ញ ចន្ទ ប្រធាន គ.ជ.ប និងជាប្រធានដឹកនាំកិច្ចប្រជុំ។

ឯកឧត្តម ប្រាជ្ញ ចន្ទ បានមានប្រសាសន៍ថា តាមតួលេខបណ្តោះអាសន្នដែល គ.ជ.ប ទទួល បាន អ្នកបោះឆ្នោតសរុបមានចំនួន ៧.១៧២,៤៤៨នាក់ នៃអ្នកមានឈ្មោះនៅក្នុងបញ្ជីបោះឆ្នោត ចំនួន ៩.២៥០.៦៨១នាក់ ស្មើនឹង ៧៧.៩១%។ តួលេខនេះអាចនឹងកើនឡើងបន្ថែមទៀត។

អំពីការប្រព្រឹត្តទៅនៃការបោះឆ្នោត ឯកឧត្តម ប្រាជ្ញ ចន្ទ បានមានប្រសាសន៍ថា ការិយាល័យបោះឆ្នោតនៅទូទាំងប្រទេស ដែលមានចំនួនសរុប ២៣.៦០២ការិយាល័យ បានបើក បម្រើឱ្យការបោះឆ្នោតចាប់ពីវេលាម៉ោង ៧:០០ព្រឹក។ ទោះបីជាមានបញ្ហារំខានខ្លះដែលបង្កឡើង ដោយកត្តាអាកាសធាតុយ៉ាងណាក៏ដោយ ក៏ដំណើរការនៃការបោះឆ្នោតបានប្រព្រឹត្តទៅជាប្រក្រតី តាមការគ្រោងទុកក្នុងបរិយាកាសសន្តិសុខ សុវត្ថិភាព និងសណ្តាប់ធ្នាប់សាធារណៈល្អ។

ឯកឧត្តម ប្រាជ្ញ ចន្ទ ប្រធាន គ.ជ.ប មានប្រសាសន៍បន្តទៀតថា បន្ទាប់ពីបិទការិយាល័យ បោះឆ្នោត ការិយាល័យនេះនឹងក្លាយជាការិយាល័យរាប់សន្លឹកឆ្នោត ដែលត្រូវចាប់ផ្ដើមភ្លាមៗតាម នីតិវិធី ហើយលទ្ធផលនៃការរាប់សន្លឹកឆ្នោត ត្រូវបានគណៈកម្មការការិយាសំរាប់សន្លឹកឆ្នោត បិទផ្សាយភ្លាមៗផងដែរនៅមុខការិយាល័យរាប់សន្លឹកឆ្នោតនីមួយៗ ហើយគ្រប់ភ្នាក់ងារគណបក្ស នយោបាយអាចទៅទទួលយកទម្រង់ ទ.១១០២ នៅទីស្នាក់ការគណៈកម្មការឃុំ សង្កាត់រៀបចំ ការបោះឆ្នោតនៅល្ងាចនាថ្ងៃបោះឆ្នោតនេះ។

ពាក់ព័ន្ធនឹងអ្នកសង្កេតការណ៍បោះឆ្នោត ឯកឧត្តម ប្រាជ្ញ ចន្ទ បានមានប្រសាសន៍ថា ក្នុង ដំណើរការបោះឆ្នោត និងរាប់សន្លឹកឆ្នោត មាន៖

ភ្នាក់ងារគណបក្សនយោបាយ សរុបចំនួន ៨៨.០៥០នាក់ (ស្រីចំនួន ២៦,១៥៥នាក់)។

អ្នកសង្កេតការណ៍ជាតិ សរុបចំនួន ៧៤,៨៨៥នាក់ (ស្រី ៤៥.៤៧១នាក់) ក្នុងនោះអ្នក សង្កេតការណ៍ចល័ត សរុបចំនួន ៨៨នាក់ (ស្រី ២៩នាក់)។ ដោយឡែកអ្នកសង្កេតការណ៍ អន្តរជាតិ សរុបចំនួន ១១០នាក់ (ស្រី ៤០នាក់) មកពីអង្គការសមាគមអន្តរជាតិ ចំនួន ២០។ ភ្ញៀវពិសេស សរុបចំនួន ២៣នាក់ (ស្រី ៦នាក់)។

និងអ្នកសារព័ត៌មានជាតិ សរុបចំនួន ៧៧៥នាក់ (ស្រី ១០២នាក់) និងអ្នកសារព័ត៌មាន អន្តរជាតិ សរុបចំនួន ៣៩នាក់ (ស្រី ៨នាក់)។

ចំពោះការចេញឯកសារបញ្ជាក់អត្តសញ្ញាណបម្រើឱ្យការបោះឆ្នោត ឯកឧត្តម ប្រាជ្ញ ចន្ទ មានប្រសាសន៍ថា ក្នុងរយៈពេល ៣០ថ្ងៃ ចាប់ពីថ្ងៃទី៥ ខែឧសភា ដល់ថ្ងៃទី៣ ខែមិថុនា ឆ្នាំ២០២២ គណៈកម្មការឃុំ សង្កាត់រៀបចំការបោះឆ្នោត និងអាជ្ញាធរឃុំ សង្កាត់ បានចេញឯកសារបញ្ជាក់ អត្តសញ្ញាណបម្រើឱ្យការបោះឆ្នោតជូនប្រជាពលរដ្ឋ សរុបចំនួន ២៤៣,៤២៩ ឯកសារ។

ឯកឧត្តម ប្រាជ្ញ ចន្ទ មានប្រសាសន៍បន្ថែមថា នៅមុនថ្ងៃបោះឆ្នោត មានព័ត៌មានបែកធ្លាយ អំពីផែនការអុកឡុកការបោះឆ្នោត ប៉ុន្តែគណៈបញ្ញាការសន្តិសុខអចិន្ត្រៃយ៍សម្រាប់ការបោះឆ្នោត និង គ.ជ.ប បានដាក់ចេញនូវសេចក្ដីណែនាំស្តីពីការពង្រឹងសន្តិសុខ សុវត្ថិភាព ដើម្បីគ្រប់គ្រង ស្ថានការណ៍ និងធានាឱ្យការបោះឆ្នោតដំណើរការបានរលូនល្អ និងប្រកបដោយសន្តិសុខ និង សុវត្ថិភាព។ ទន្ទឹមនឹងនេះ ដោយមានកិច្ចសហការល្អពីសំណាក់យន្តការ និងរចនាសម្ព័ន្ធសន្តិសុខ បោះឆ្នោតគ្រប់លំដាប់ថ្នាក់ ជាមួយ គ.ជ.ប និងគណៈកម្មការរៀបចំការបោះឆ្នោតគ្រប់លំដាប់ថ្នាក់ ដំណើរការបោះឆ្នោតប្រព្រឹត្តទៅដោយជោគជ័យ និងក្នុងបរិយាកាសស្ងប់ស្ងាត់ មានសន្តិសុខ សុវត្ថិភាព និងសណ្តាប់ធ្នាប់សាធារណៈ គ្មានអំពើហិង្សា គ្មានការគំរាមកំហែង។

អំពីស្ថានភាពនៃការឆ្លងរាលដាលនៃជំងឺកូវីដ-១៩ ឯកឧត្តម ប្រាជ្ញ ចន្ទ បានមានប្រសាសន៍ ថា ដោយមានការយកចិត្តទុកដាក់ ចាត់វិធានការគ្រប់រូបភាព ក្នុងការប្រយុទ្ធប្រឆាំង បង្ការ និង ទប់ស្កាត់ការឆ្លងរាលដាលពីសំណាក់រាជរដ្ឋាភិបាល និងអាជ្ញាធរពាក់ព័ន្ធគ្រប់លំដាប់ថ្នាក់ ជាពិសេសយុទ្ធនាការចាក់វាក់សាំងដូសទី៣ និងដូសជំរុញជាបន្តបន្ទាប់ ដែលបង្កើតឱ្យមានភាពសាំ ក្នុងសហគមន៍ និងផ្អែកតាមរបាយការណ៍របស់ក្រសួងសុខាភិបាល នៅកម្ពុជាពុំមានការឆ្លងថ្មី តាំងពីថ្ងៃទី៨ ខែឧសភា រហូតដល់ថ្ងៃទី៤ ខែមិថុនា ឆ្នាំ២០២២ ដែលពិតជាអំណោយផលល្អដល់ ការបោះឆ្នោតឱ្យប្រព្រឹត្តទៅប្រកបដោយសុវត្ថិភាពខ្ពស់។ បន្ថែមលើនេះ គជប ក៏បានចាត់វិធានការ សមស្របនានា ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ នៅក្នុងដំណើរការបោះឆ្នោត ហើយគិតមកដល់ពេលនេះ គ.ជ.ប ពុំទាន់បានទទួលរបាយការណ៍ណាមួយអំពីករណីឆ្លងរាលដាលនៃជំងឺកូវីដ-១៩ ក្នុងដំណើរការបោះឆ្នោតនេះនៅឡើយទេ។

ឯកឧត្តម ប្រាជ្ញ ចន្ទ បានមានប្រសាសន៍បន្ថែមទៀតថា គ.ជ.ប បានពង្រឹង និងពង្រីក វិសាលភាពនៃការប្រើប្រាស់ប្រព័ន្ធបច្ចេកវិទ្យាព័ត៌មានវិទ្យា ក្នុងការត្រួតពិនិត្យ ផ្ទៀងផ្ទាត់ និងបូកសរុប លទ្ធផលនៃការបោះឆ្នោត ដោយក្ដោមទាំងលទ្ធផលបឋម លទ្ធផលបណ្តោះអាសន្ន និងលទ្ធផលផ្លូវការ ដើម្បីជាជំនួយដល់ការអនុវត្តដោយដៃរបស់មន្ត្រីបោះឆ្នោត។ ចំពោះការផ្សព្វផ្សាយលទ្ធផលបឋម នៃការបោះឆ្នោត គ.ជ.ប បានសហការជាមួយអគ្គនាយកដ្ឋានទូរទស្សន៍ជាតិកម្ពុជា (ទទក) ធ្វើការ ផ្សាយផ្ទាល់នៅវេលាយប់នេះ។ លទ្ធផលបឋមនៃការបោះឆ្នោតនេះ មានផ្សាយតាមវិទ្យុជាតិកម្ពុជា និងតាមគេហទំព័រដែលមានអាសយដ្ឋាន electresult.nec.gov.kh, App-NEC KH, Channel YouTube និងតាម Facebook Page របស់ គ.ជ.ប ផងដែរ។

គ.ជ.ប បានឆ្លើយទៅនឹងសំណួររបស់អ្នកសារព័ត៌មានអំពីតួលេខបណ្តោះអាសន្ននៃអ្នកចេញ ទៅបោះឆ្នោត ផែនការអុកឡុកការបោះឆ្នោត មូលហេតុអ្នកមិនបានចេញទៅបោះឆ្នោត ការមិន ចូលរួមសង្កេតការណ៍បោះឆ្នោតរបស់សហភាពអឺរុប សន្លឹកឆ្នោតខូច និងអំពីការចូលរួមបោះឆ្នោត របស់គណបក្សនយោបាយ។

ឯកឧត្តមប្រធាន គ.ជ.ប បានគូសបញ្ជាក់ថា តួលេខបណ្តោះអាសន្នដែលមានជិត៨០% នេះគឺជាតួលេខខ្ពស់ បើធៀបទៅនឹងបណ្តាប្រទេសមួយចំនួនលើសកលលោក។ គ.ជ.ប ទទួលបាន ជោគជ័យក្នុងការទប់ស្កាត់ផែនការបំផ្លាញការបោះឆ្នោត។ មានពលរដ្ឋមួយចំនួនដែលមិនបានទៅ បោះឆ្នោតដោយសារពួកគាត់ស្ថិតនៅក្រៅប្រទេស និងដោយសាកត្តាអាកាសធាតុផងដែរ។ ការ មិនចូលរួមសង្កេតការណ៍បោះឆ្នោតរបស់សហភាពអឺរ៉ុបនោះជាសិទ្ធិរបស់គាត់។ គ.ជ.ប បាន ជូនដំណឹង និងអំពាវនាវរួចហើយ ហើយទោះបីមិនមានអ្នកសង្កេតការណ៍មកពីសហភាពអឺរ៉ុប ក៏ការបោះឆ្នោតឃុំ សង្កាត់នៅកម្ពុជាបានប្រព្រឹត្តទៅស្របតាមច្បាប់ដែរ។ ចំពោះសន្លឹកឆ្នោតខូច គ.ជ.ប មិនទាន់ទទួលបានរបាយការណ៍ទេមកដល់ពេលនេះ។ ការបោះឆ្នោតឃុំសង្កាត់នេះ មាន ១៧ គណបក្សចូលរួមនោះបង្ហាញថា កម្ពុជាមានប្រជាធិបតេយ្យល្អហើយ។

មុនបិទបញ្ចប់កិច្ចប្រជុំ ឯកឧត្តម ប្រាជ្ញ ចន្ទ ប្រធាន គ.ជ.ប និងជាប្រធានដឹកនាំកិច្ចប្រជុំ បានថ្លែងអំណរគុណយ៉ាងជ្រាលជ្រៅចំពោះប្រជាពលរដ្ឋដែលបានចូលរួមការបោះឆ្នោត ដើម្បី ជ្រើសរើសក្រុមប្រឹក្សាឃុំ សង្កាត់ ដែលជាតំណាងរបស់ប្រជាពលរដ្ឋ ក្នុងការអភិវឌ្ឍឃុំ សង្កាត់ និង លើកកម្ពស់លទ្ធិប្រជាធិបតេយ្យនៅព្រះរាជាណាចក្រកម្ពុជា និងសូមថ្លែងអំណរគុណយ៉ាងជ្រាលជ ចំពោះអាជ្ញាធរមានសមត្ថកិច្ចគ្រប់លំដាប់ថ្នាក់ មន្ត្រីបោះឆ្នោតគ្រប់លំដាប់ថ្នាក់ គណបក្សនយោបាយ និងភាគីពាក់ព័ន្ធទាំងអស់ដែលបានចូលរួម និងសហការអនុវត្តតាមភារកិច្ចឡើងៗខ្លួនប្រកបដោយស្មារតីទទួលខុសត្រូវខ្ពស់ ដើម្បីបង្កលក្ខណៈងាយស្រួលឱ្យការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ នេះ ប្រព្រឹត្តទៅដោយជោគជ័យ និងប្រកបដោយ សន្តិសុខ សុវត្ថិភាព និងសណ្តាប់ធ្នាប់សាធារណៈ គ្មានអំពើហិង្សា និងសូមបន្តរក្សាភាពស្ងប់ស្ងាត់ ដើម្បីបង្កបរិយាកាស ក្រោយថ្ងៃបោះឆ្នោត និងរង់ចាំការប្រកាសលទ្ធផលនៃការបោះឆ្នោត ដោយ គ.ជ.ប។

នេះជាកិច្ចប្រជុំលើកទី៩ សម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២។ សមាសភាពភាគីពាក់ព័ន្ធចូលរួមក្នុងកិច្ចប្រជុំនោះមានប្រមាណជាង ៨០នាក់ មកពី ក្រសួង ស្ថាប័ននានាដូចជា ក្រុមប្រឹក្សាធម្មនុញ្ញ ព្រឹទ្ធសភា រដ្ឋសភា ក្រសួងមហាផ្ទៃ ក្រសួង ការពារជាតិ ក្រសួងព័ត៌មាន កងរាជអាវុធហត្ថលើផ្ទៃប្រទេស ទីស្តីការគណៈរដ្ឋមន្ត្រី តំណាង ស្ថានទូតជប៉ុន ស្ថានទូតអូស្ត្រាលី តំណាងគណបក្សនយោបាយ តំណាងអង្គការមិនមែនរដ្ឋាភិបាល ព្រមទាំងអ្នកសារព័ត៌មាន៕រក្សាសិទ្ធិដោយ ៖ សុទ្ធ លី