ភ្នំពេញ៖ ឯកអគ្គរាជទូត Pablo Kang បានអញ្ជើញចូលរួមជាមួយវាគ្មិន និងភ្ញៀវកិត្តិយស មួយចំនួន ក្នុងកិច្ចពិភាក្សាតុមូលមួយ កាលពីថ្ងៃចន្ទ ទី៧ ខែមិថុនា ឆ្នាំ២០២២នេះ លើប្រធានបទ “សង្រ្គាមនៅអ៊ុយក្រែន៖ តួនាទីរបស់កម្ពុជា និងអាស៊ាន ក្នុងការលើកកម្ពស់ដំណោះស្រាយដោយសន្តិភាព”។
ឯកអគ្គរាជទូត Kang បានគូសបញ្ចាក់ពីជំនួយផ្នែកហិរញ្ញវត្ថុ និងមនុស្សធម៌ ដែលអូស្ត្រាលីបានផ្តល់ដល់អ៊ុយក្រែន ចាប់តាំងពីមានការឈ្លានពានខុសច្បាប់របស់រុស្ស៊ីមក ក៏ដូចជាកោតសរសើរដល់ប្រជាជនអ៊ុយក្រែនចំពោះភាពក្លាហានដ៏ធំធេងរបស់ពួកគេ និងស្វាគមន៍ជំហរនៃការឆ្លើយតបរបស់រដ្ឋាភិបាលកម្ពុជា ទៅលើសកម្មភាពរបស់ទីក្រុងមូស្គូនៅអ៊ុយក្រែន។
ក្រោមការសហការឧបត្ថម្ភដោយស្ថានទូតអូស្ត្រាលី និងវិទ្យាស្ថានកម្ពុជាសម្រាប់កិច្ចសហប្រតិបត្តិការ និងសន្តិភាព Cambodian Institute for Cooperation and Peace (CICP) និងរៀបចំដោយនាយកប្រតិបត្តិ CICP ឯកអគ្គរាជទូត ពូ សុធីរៈ កិច្ចពិភាក្សាតុមូលនេះមានការចូលរួមពីក្រុមអ្នកជំនាញមួយចំនួន រួមមាន ឯកឧត្តម បណ្ឌិត កៅ គឹមហួន រដ្ឋមន្រ្តីប្រតិភូអមនាយករដ្ឋមន្ត្រី្ត ឯកឧត្តម បណ្ឌិត ជឺនបូរាណ ច័ន្ទបូរី អញ្ជើញមកពីវិទ្យាស្ថានចក្ខុវិស័យអាស៊ី Asian Vision Institute និងលោកស្រី Natalia Zhynkina ឯកអគ្គរដ្ឋទូតរងអ៊ុយក្រែនដែលកំពុងបំពេញទស្សនកិច្ចនៅកម្ពុជា។ ក្នុងចំណោមភ្ញៀវទាំងអស់ ក៏មានវត្តមាន ឯកអគ្គរាជទូត អ្នកសិក្សា និងអ្នកតំណាងខាងស្រាវជ្រាវក្នុងស្រុកមួយចំនួនផងដែរ។
វាគ្មិនទាំងបីរូប បានចូលរួមយ៉ាងសកម្មដល់កិច្ចពិភាក្សា ដ៏គួរអោយចាប់អារម្មណ៍ និងស៊ីជម្រៅ អំពីការឆ្លើយតបជាសាកលចំពោះការឈ្លានពានរបស់រុស្ស៊ី ព្រមទាំងផលប៉ះពាល់ចំពោះតំបន់អាស៊ីអាគ្នេយ៍នៃការដួលរលំសេដ្ឋកិច្ចបណ្តាលមកពីការឈ្លានពាននេះ និងតួនាទីរបស់កម្ពុជាដែលជាប្រធានអាស៊ានក្នុងការដឹកនាំការឆ្លើយតបរបស់ស្ថាប័នក្នុងតំបន់ ទៅលើសកម្មភាពខុសច្បាប់របស់រុស្ស៊ី៕រក្សាសិទ្ធិដោយ ៖ សុទ្ធ លី
