ភ្នំពេញ៖ កាលពីយប់ថ្ងៃទី៣ ខែវិច្ឆិកា កម្លាំងសមត្ថកិច្ចបានឃាត់ខ្លួនមនុស្សជាង១០០នាក់ ដែលពាក់អាវមានអក្សរ Police និង Army ដើរលេងក្នុងពិធីបុណ្យអុំទូក ពីកន្លែងគោលដៅផ្សេងៗគ្នា ដោយខ្លាចសង្ស័យមានចេតនាមិនល្អ នៅពិធីបុណ្យអុំទូកនារាត្រីនេះ។ ប៉ុន្តែក្រោយពីសាកសួររួចហើយ ទើបដឹងថាពួកគាត់ មិនមានចេតនាអាក្រក់នោះទេ, សមត្ថកិច្ចបានអនុញ្ញាតឲ្យពួកគាត់ដើរលេងកំសាន្តវិញ ប៉ុន្តែដកហូតយកអាវ ដែលមានពាក្យ Police និង Army ដើម្បីរក្សាទុក។
នៅព្រឹកថ្ងៃទី៤ ខែវិច្ឆិកា ឆ្នាំ២០១៧នេះ លោក ឃួង ស្រេង អភិបាលរាជធានីភ្នំពេញ ក្នុងនាមជាប្រធានគណៈបញ្ជាការឯកភាពរដ្ឋបាលរាជធានីភ្នំពេញ បានសូមអំពាវនាវដល់បងប្អូនប្រជាពលរដ្ឋ ឈប់ទិញសម្លៀកបំពាក់ និងឧបករណ៍ដែលពាក់ព័ន្ធនឹងកងកម្លាំងនគរបាល កងកម្លាំងអាវុធហត្ថ និងកងកម្លាំងយោធា ដើម្បីជៀសវាសប្រើប្រាស់ហើយពាក់ព័ន្ធនឹងផ្លូវច្បាប់។
ក្នុងនោះដែរលោកអភិបាលរាជធានីភ្នំពេញ ក៏សូមអំពាវនាវដល់អាជីវករទាំងអស់ និងអ្នករកស៊ីនាំចូលសំលៀកបំពាក់, ស្នើសុំបញ្ឈប់ការលក់ និងនាំចូលនូវសម្លៀកបំពាក់ និងឧបករណ៍ដូចខាងលើនេះតទៅទៀតផងដែរ ព្រោះការនាំចូល និងលក់សំភារៈកងកម្លាំងប្រដាប់អាវុធ អាចនឹងមានទោសតាមផ្លូវច្បាប់។ នាយឧត្តមសេនីយ៍ ជួន សុវណ្ណ ស្នងការនគរបាលរាជធានីភ្នំពេញបានបញ្ជាក់ឲ្យដឹងថា៖ក្រុមប្រជាពលរដ្ឋជាង១០០នាក់ ក្រោយពីសាកសួរនាំពួកគាត់ជាប្រជាពលរដ្ឋមកដើរកំសាន្តធម្មតាទេ ដោយសាររដូវនេះជារដូវរងាពួកគាត់បានទិញអាវប្រភេទ អាវរងារនេះពាក់ មានមនុស្សចាស់ ក្មេង ជំទង់ ប្រុសស្រី ហើយឃាត់នៅគ្រប់គោលដៅ។ ដោយគោលដៅខ្លះមានជាង៥០នាក់ គោលដៅខ្លះជាង២០នាក់ គោលដៅខ្លះជាង១០នាក់ គោលដៅខ្លះ៥នាក់ ដែលសរុបប្រមាណជាង១០០នាក់៕ ដោយ៖កូឡាប
