ភ្នំពេញ ៖ ព្រឹកនេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា កំពុងអញ្ជើញជាអធិបតីភាពបិទសន្និបាតបូកសរុបការងារវិស័យទេសចរណ៍ ដែលរៀបចំឡើងដោយក្រសួងទេសចរណ៍ និងប្រតិបត្តិករទេសចរណ៍ ដែលពិធីនេះ បានប្រព្រឹត្តធ្វើឡើងនាព្រឹកថ្ងៃព្រហស្បតិ៍ ទី១៤ ខែកក្កដា ឆ្នាំ២០២២នេះ នៅសណ្ឋាគារសុខា រាជធានីភ្នំពេញ។
សូមបញ្ជាក់ថា សន្និបាតបូកសរុបការងារវិស័យទេសចរណ៍នេះ បានធ្វើឡើងរយ:ពេល២ថ្ងៃ គឺថ្ងៃទី១២ និង១៣ ខែកក្កដា ឆ្នាំ២០២២, ហើយនៅថ្ងៃនេះ ក្រសួងទេសចរណ៍ និងប្រតិបត្តិករទេសចរណ៍នៅកម្ពុជា បានបិទសន្និបាតរួមគ្នាមួយ ដើម្បីបូកសរុបការងារទេសចរណ៍ បូកសរុបផែនការស្តារ និងលើកស្ទួយវិស័យទេសចរណ៍កម្ពុជា ក្នុង និងក្រោយវិបត្តិជំងឺកូវីដ-១៩ ដំណាក់កាលទី១ (២០២០-២០២១) និងឆមាសទី១ ឆ្នាំ២០២២ និងលើកទិសដៅផែនការស្តារឡើងវិញនូវវិស័យទេសចរណ៍ក្នុងដំណាក់កាលទី២ (ឆមាសទី២ ឆ្នាំ២០២២-២០២៣)។
សន្និបាតចម្រុះ រដ្ឋ និងវិស័យឯកជននេះ បានជជែក និងពិភាក្សាគ្នាលើប្រធានបទជាច្រើនពាក់ព័ន្ធនឹងវិស័យទេសចរណ៍ ជាពិសេសវិបត្តិ និងបញ្ហា ដែលបានកើតមានចំពោះវិស័យទេសចរណ៍ ដែលបានកើតមានក្នុងវិបត្តិកូវីដ-១៩, ក្នុងសន្និបាត ក៏បានពិភាក្សាដាក់ចេញនូវយន្តការផ្សេងៗ ដើម្បីជាកាលានុវត្តន៍ភាពសម្រាប់វិស័យទេសចរណ៍ចំពោះមុខភាពមិនច្បាស់លាស់នៃជំងឺកូវីដ-១៩។
អង្គសន្និបាតនេះ បានឱ្យដឹងទៀតថា រយៈពេលប្រមាណ ៦ខែដើមឆ្នាំ២០២២ កម្ពុជាទទួលបានភ្ញៀវទេសចរអន្តរជាតិប្រមាណជាង ៥០ម៉ឺននាក់ កើនឡើង ៣៩៤% ធៀបនឹងរយៈពេលដូចគ្នាឆ្នាំ២០២១, ប៉ុន្តែ នៅថយចុះ -៨៤.៨% ធៀបនឹងរយៈពេលដូចគ្នាឆ្នាំ២០១៩ (មុនមានវិបត្តិ) ដោយភាគច្រើនមកពីប្រភពទីផ្សារវៀតណាម ថៃ ចិន សហរដ្ឋអាមេរិក ឥណ្ឌូណេស៊ី បារាំង កូរ៉េ ម៉ាឡេស៊ី អង់គ្លេស អូស្រ្តាលី សិង្ហបុរី និងឥណ្ឌា។
ថ្លែងទៅកាន់ក្រុមមន្ត្រី និងប្រតិបត្តិករជាច្រើននៃវិស័យទេសចរណ៍ សម្ដេចតេជោ ហ៊ុន សែន បានលើកបង្ហាញថា វិស័យទេសចរណ៍នៅកម្ពុជា ក៏ដូចជានៅលើពិភពលោក បានជួបនូវការប៉ះទង្គិចយ៉ាងខ្លាំងក្នុងរយៈពេលជាង ២ឆ្នាំកន្លងទៅនេះ ដោយសារតែវិបត្តិបណ្តាលមកពីការរាតត្បាតនៃជំងឺកូវីដ-១៩។ បន្ទាប់ពីរាជរដ្ឋាភិបាលកម្ពុជា បានយកឈ្នះលើការរាតត្បាតកាលពីចុងឆ្នាំ២០២១កន្លងទៅនេះ ក្រសួងទេសចរណ៍ដែលជាសេនាធិការរបស់រាជរដ្ឋាភិបាល និងប្រតិបត្តិករក្នុងវិស័យទេសចរណ៍ បានប្រឹងប្រែងជាខ្លាំង ដើម្បីឱ្យវិស័យដែលកម្ពុជាចាត់ទុកជាមាសបៃតងនេះ មានដង្ហើមឡើងវិញ ហើយពេលនេះកំពុងតែកម្រើកជាបណ្ដើៗ។
សម្ដេចបញ្ជាក់ថា កម្ពុជារំពឹងថា នឹងអាចទទួលបានភ្ញៀវទេសចរអន្តរជាតិក្នុងរង្វង់ ១លាននាក់ នៅក្នុងឆ្នាំ២០២២នេះ និងប្រមាណ ២លាននាក់ នៅក្នុងឆ្នាំ២០២៣ ខាងមុខ គឺជាឆ្នាំដែលកម្ពុជានឹងធ្វើជាម្ចាស់ផ្ទះព្រឹត្តិការណ៍កីឡាស៊ីហ្គេម-អាស៊ានប៉ារ៉ាហ្គេម លើកទី៣២ ព្រោះពេលនោះ ជាឱកាសបង្ហាញសក្ដានុពលរបស់កម្ពុជា និងភាពទាក់ទាញ៕ រក្សាសិទ្ធិដោយ ៖ ពិសិដ្ឋ CEN
