ភ្នំពេញ ៖ ក្នុងឱកាសអញ្ជើញជាអធិបតីបិទសន្និបាតបូកសរុបការងារវិស័យទេសចរណ៍ ដែលរៀបចំឡើងដោយក្រសួងទេសចរណ៍ និងប្រតិបត្តិករទេសចរណ៍ នៅសណ្ឋាគារសុខា រាជធានីភ្នំពេញ នាព្រឹកថ្ងៃព្រហស្បតិ៍ ទី១៤ ខែកក្កដា ឆ្នាំ២០២២, សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានលើកឡើងថា សង្គ្រាម រុស្ស៉ី-អ៊ុយក្រែន និងការដាក់ទណ្ឌកម្ម បានបង្កើតជាស្ថានភាពមិនច្បាស់លាស់ នៃពិភពលោក និងបង្កជាវិបត្តិសេដ្ឋកិច្ច។
សម្តេចតេជោ ហ៊ុន សែន បានគូសបញ្ជាក់ថា បញ្ហាវាមិនមែនត្រឹមតែចេញពីសង្គ្រាមអ៊ុយក្រែន-រុស្ស៊ី នោះទេ ប៉ុន្តែក៏វាផ្តើមចេញពីទណ្ឌកម្ម ដែលបញ្ហាទណ្ឌកម្មនោះ ក៏បានបង្កើតឱ្យមានចលាចលទីផ្សារនៅទូទាំងពិភពលោក។ ការព្រមានជាបន្តបន្ទាប់ពី IMF មិនមែនគ្មានហេតុផលនោះទេ កំណើនសេដ្ឋកិច្ចពិភពលោក អាចនឹងធ្លាក់ចុះជាបន្តបន្ទាប់ អតិផរណានៅតាមបណ្តាប្រទេស គឺមានការកើនឡើង បញ្ហានេះវាក៏ទាក់ទងជាមួយជីវភាពរស់នៅរបស់ប្រជាជននៅតាមបណ្តាប្រទេសផ្សេងៗ, សំបុត្រយន្តហោះ អាចនឹងឡើងថ្លៃមួយជាពីរ នោះហើយជាផលប៉ះពាល់ដែលអាចនឹងបង្កការរំខានដល់វិស័យទេសចរណ៍ ការដឹកជញ្ជូនទំនិញពាណិជ្ជកម្ម និងការអភិវឌ្ឍសេដ្ឋកិច្ច។
យើងងាកទៅមើលជាងពីរឆ្នាំកន្លងទៅ ជំងឺកូវីដ-១៩ បានធ្វើឱ្យប៉ះពាល់ដល់វិស័យជាច្រើន ហើយធ្ងន់ធ្ងរជាងគេ គឺវិស័យទេសចរណ៍ ឧស្សាហកម្ម និងសេវាកម្មមួយចំនួន, ឥឡូវនេះបញ្ហាថ្មីក៏បានមកដល់ ដែលអាចបំផ្លាញនូវវិស័យទេសចរណ៍នេះថែមទៀត នោះ គឺនៅត្រង់ថា ចាប់ផ្តើមពីសង្គ្រាម និងទណ្ឌកម្ម បានបង្កើតជាស្ថានភាពមិនច្បាស់លាស់ នៃពិភពលោកមួយដែលបែកបាក់ និងគ្មានសណ្តាប់ធ្នាប់ ហើយបង្កទៅជាវិបត្តិស្បៀង និងវិបត្តិសេដ្ឋកិច្ច។ ដូច្នេះ ប្រសិនបើប្រេងនៅតែបន្តឡើងថ្លៃបែបនេះ វិបត្តិសេដ្ឋកិច្ចសាកលវាអាចកើតមានឡើង ហើយវិស័យទេសចរណ៍ អាចនឹងលំបាក។
ទាក់ទងនឹងវិស័យទេសចរណ៍នៅកម្ពុជាក្នុងវិបត្តិកូវីដ-១៩ និងសង្គ្រាមអ៊ុយក្រែន-រុស្ស៊ី ទៀតសោតកម្ពុជាយើង ត្រូវចលនាទេសចរណ៍ផ្ទៃក្នុង ដែលជារួមចំណែកយ៉ាងសំខាន់ក្នុងការស្ដារវិស័យទេសចរណ៍, ហេតុនេះ ក្រសួង ស្ថាប័ន អង្គភាពពាក់ព័ន្ធត្រូវរួមគ្នាជំរុញចលនាទេសចរណ៍ផ្ទៃក្នុង និងបន្ថែមការកសាងហេដ្ឋារចនាសម្ពន្ធគាំទ្រវិស័យទេសចរណ៍នៅតាមគោលដៅទេសចរណ៍ថ្មីៗឱ្យបានម៉ឺងម៉ាត់៕ រក្សាសិទ្ធិដោយ ៖ ពិសិដ្ឋ CEN
