ភ្នំពេញ ៖ ឯកឧត្តម កើត រិទ្ធ រដ្ឋមន្រ្តីក្រសួងយុត្តិធម៌ បានថ្លែងបញ្ជាក់នៅចំពោះមុខក្រុមអ្នកសារព័ត៌មានថា ការធ្វើវិសោនធកម្មរដ្ឋធម្មនុញ្ញដែលបានសម្រេចពីគណៈរដ្ឋមន្ត្រីថ្មីៗនេះ គឺដើម្បីធានាដល់ដំណើរការស្ថាប័នជាតិ ឱ្យប្រព្រឹត្តទៅរលូនល្អ ប្រកបដោយនិរន្តរភាព ក្នុងទិសដៅការពារនូវឧត្តមប្រយោជន៍ជាតិ ហើយជាពិសេស គឺធានានូវ សន្តិភាពស្ថិរភាព សេចក្តីសុខសាន្តរបស់ប្រជាជន ដែលជាគ្រឹះសម្រាប់ការអភិវឌ្ឍប្រទេសជាតិរបស់យើង។
ការថ្លែងបញ្ជាក់បែបនេះរបស់រដ្ឋមន្ត្រីក្រសួងយុត្តិធម៌ ធ្វើឡើងក្នុងសន្និសីទកាសែតមួយ កាលពីរសៀលថ្ងៃទី១៤ ខែកក្កដា ឆ្នាំ២០២២, ឯកឧត្តមរដ្ឋមន្រ្តីរូបនេះ បានបញ្ជាក់ទៀតថា វិសោធនកម្មរដ្ឋធម្មនុញ្ញ លើកទី១០នេះ គឺធ្វើឡើងដើម្បីបំពេញចន្លោះខ្វះខាតក្នុងរដ្ឋធម្មនុញ្ញ ដែលយើងបានមើលឃើញទាំងអស់គ្នា, ហើយមិនបានប៉ះពាល់ទៅដល់គោលការណ៍គ្រឹះរបស់រដ្ឋធម្មនុញ្ញនោះឡើយ។
ឯកឧត្តម កើត រិទ្ធ បានច្រានចោលចំពោះមតិដែលចង់ឱ្យមានការធ្វើប្រជាមតិមុន កែរដ្ឋធម្មនុញ្ញ ដោយសារតែរដ្ឋធម្មនុញ្ញកម្ពុជា មិនបានចែងថា ត្រូវតែធ្វើប្រជាមតិទើបអនុញ្ញាតឲ្យធ្វើវិសោធនកម្មរដ្ឋធម្មនុញ្ញនោះទេ, ដូច្នេះ ប្រសិនបើធ្វើប្រជាមតិនោះ វានឹងខុស។ ជាការពិតទៅ ការកែវិសោធនកម្មរដ្ឋធម្មនុញ្ញនេះ នៅតែប្រកាន់ខ្ជាប់នូវគោលការណ៍គ្រឹះដែលមានចែងក្នុងរដ្ឋធម្មនុញ្ញដដែលទេ គ្រាន់តែថា យើងបំពេញចន្លោះប្រហោង ឬចន្លោះខ្វះខាតតែប៉ុណ្ណោះ, ហើយយើងនៅតែរក្សាគោលការណ៍គ្រឹះដែល គឺរបបប្រជាធិបតេយ្យ សេរីនិយម ពហុបក្ស និងគោលការណ៍របបរាជានិយមអាស្រ័យរដ្ឋធម្មនុញ្ញ និងរបបដឹកនាំតាមបែបសភានិយមនៅកម្ពុជា ហើយក៏ពុំបានធ្វើឡើងក្នុងពេលដែលប្រទេសជាតិមានភាពចលាចលនោះដែរ។
គួរបញ្ជាក់ថា កាលពីថ្ងៃទី១៣ ខែកក្កដា ឆ្នាំ២០២២ ក្រុមប្រឹក្សាធម្មនុញ្ញ ក៏បានបើកកិច្ចប្រជុំពេញអង្គរៀបចំសេចក្តីក្រាបបង្គំទូលថ្វាយមតិទៅព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ចំពោះសេចក្តីព្រាងច្បាប់ធម្មនុញ្ញ ស្តីពីការស្នើសុំធ្វើវិសោធនកម្មមាត្រា១៩ ថ្មី(១) មាត្រា៨៩ , មាត្រា៩៨ថ្មី , មាត្រា១០២ថ្មី , មាត្រា១១៩ថ្មី (១) និងមាត្រា១២៥ ថ្មី នៃរដ្ឋធម្មនុញ្ញ និងមាត្រា ៣ថ្មី និងមាត្រា ៤ថ្មី នៃច្បាប់ធម្មនុញ្ញបន្ថែម សំដៅធានានូវដំណើរការជាប្រក្រតីនៃស្ថាប័នជាតិ៕ រក្សាសិទ្ធិដោយ ៖ ពិសិដ្ឋ CEN
