ភ្នំពេញ ៖ លោកហ្សាក់ ប៉ឺឡេ ឯកអគ្គរដ្ឋទូតបារាំងប្រចាំកម្ពុជា ក្នុងឱកាសបុណ្យជាតិបារាំង ១៤ កក្កដា ២០២២ បានមានប្រសាសន៍ថា មកដល់ពេលនេះ មានរយៈពេល៣ឆ្នាំហើយដែលយើងមិនបានជួបជុំគ្នាដើម្បីអបអរបុណ្យជាតិបារាំង។ ក្នុងន័យនេះ យើងមានសេចក្តីរីករាយជាពន់ពេកក្នុងការទទួលស្វាគមន៍ឯកឧត្តម អ្នកអង្គម្ចាស់ លោកជំទាវ លោក លោកស្រី ក្នុងរាត្រីដ៏មហោឡារិក និងភាតរភាព។
ឯកអគ្គរដ្ឋទូតបារាំងប្រចាំកម្ពុជា បានឲ្យដឹងថា “ខ្ញុំសូមថ្លែងអំណរគុណអាជ្ញាធរកម្ពុជាចំពោះកិច្ចខិតខំប្រឹងប្រែង ក្នុងការប្រយុទ្ធប្រឆាំងនឹងជំងឺកូវីដ១៩ ដែលអនុញ្ញាតឱ្យយើងបានជួបជុំក្នុងរាត្រីនេះ។ ប្រទេសបារាំងក៏មានមោទនភាពផងដែរ ដែលបានចូលរួមចំណែកក្នុងកិច្ចខិតខំប្រឹងប្រែងទាំងនេះ តាមរយៈការចូលរួមចំណែកក្នុងយន្តការកូវ៉ាក់ ក៏ដូចជាតាមរយៈសកម្មភាពរបស់វិទ្យាស្ថានប៉ាស្ទ័រ ដែលខ្ញុំសូមថ្លែងអំណរគុណយ៉ាងជ្រាលជ្រៅ”។
ឯកឧត្តម លោកជំទាវ លោក លោកស្រី ជ្រាបស្រាប់ហើយថា ទំនាក់ទំនងដែលផ្សារភ្ជាប់ប្រទេសបារាំង និងកម្ពុជា ជាទំនាក់ទំនងដ៏យូរលង់ និងប្រកបដោយទំនុកចិត្ត។ ទំនាក់ទំនងនេះចាក់ឫសយ៉ាងជ្រៅទៅក្នុងប្រវត្តិសាស្រ្តដ៏យូរលង់ប្រកបដោយការចែករំលែក ភាពស៊ីជម្រៅ និងសមានចិត្តដ៏ពិតប្រាកដមួយតាមរយៈហ្វ្រង់កូហ្វូនី។ ក្នុងពេលបច្ចុប្បន្ន ទំនាក់ទំនងនេះឆ្លុះបញ្ចាំងឱ្យឃើញតាមរយៈកិច្ចសហប្រតិបត្តិការឥតងាករេ និងរស់រវើក ដែលបែឆ្ពោះទៅកាន់អនាគត និងបញ្ហាប្រឈមនានា ដោយផ្តោតលើអាទិភាពសំខាន់ៗមានដូចជា៖ ការបណ្តុះបណ្តាលធនធានមនុស្ស ការតស៊ូដើម្បីការអភិវឌ្ឍប្រកបដោយចីរភាព ដែលឆ្លើយតបទៅនឹងតម្រូវការនៃការប្រយុទ្ធប្រឆាំងបម្រែបម្រួលអាកាសធាតុ និងការការពារជីវៈចម្រុះ តួនាទីដ៏សំខាន់នៃវប្បធម៌ និងការលើកកម្ពស់បេតិកភណ្ឌកម្ពុជាដ៏សម្បូរបែប។
ទំនាក់ទំនងរវាងប្រទេសយើងទាំងពីរត្រូវបានទ្រទ្រង់ផងដែរដោយសហគមន៍បារាំងមួយ ដែលមានភាពសកម្ម និងធ្វើសមាហរណកម្មបានយ៉ាងល្អប្រសើរ ដែលខ្ញុំសូមវាយតម្លៃខ្ពស់។ នៅពេលដែលខ្ញុំបានទៅជួបសហគមន៍បារាំង ខ្ញុំសង្កេតឃើញថាជនជាតិបារាំង ទាំងបុរស និងស្ត្រី មានភាពរស់រវើក ដោយការស្រលាញ់ចូលចិត្តប្រទេសកម្ពុជា ស្រលាញ់វប្បធម៌នៃប្រទេសនេះ និងមានភាពរីករាយក្នុងការរស់នៅប្រទេសកម្ពុជា។ អ្នកខ្លះបានតាំងទីលំនៅនៅទីនេះអស់រយៈពេលជាច្រើនទសវត្សមកហើយៗជាញឹកញាប់ស្ថិតនៅចន្លោះវប្បធម៌នៃប្រទេសទាំងពីរ ហើយមានសញ្ជាតិពីរ។ សហគមន៍បារាំងចូលរួមចំណែកយ៉ាងសកម្ម និងប្រកបដោយភាពវិជ្ជមានក្នុងការអភិវឌ្ឍសេដ្ឋកិច្ចកម្ពុជា។ ខ្ញុំសូមឆ្លៀតឱកាសនេះវាយតម្លៃខ្ពស់ចំពោះភាពរស់រវើកនៃសហគមន៍ធុរកិច្ចបារាំង ដែលបានសម្របខ្លួនបានយ៉ាងល្អប្រសើរទៅនឹងវិបត្តិ និងជំនះការលំបាកនានា។ សូមអនុញ្ញាតឱ្យខ្ញុំសម្តែងនូវមោទនភាពចំពោះសហគមន៍ធុរកិច្ចបារាំង។
ទំនាក់ទំនងរវាងបារាំង និងកម្ពុជា ត្រូវបានពង្រឹងក្នុងអំឡុងប្រវត្តិសាស្រ្តថ្មីៗនេះ។ ចាប់ពីពេលដែលខ្ញុំមកដល់ប្រទេសកម្ពុជាកាលពីខែតុលាកន្លងទៅ យើងបានប្រារព្ធខួប៣០ឆ្នាំនៃកិច្ចព្រមព្រៀងសន្តិភាពទីក្រុងប៉ារីស៍។ នៅឆ្នាំ២០២២ យើងបានប្រារព្ធខួប៣០ឆ្នាំនៃអាជ្ញាធរអន្តរកាលនៃអង្គការសហប្រជាជាតិនៅកម្ពុជា (ដែលយើងហៅថាអ៊ុនតាក់) ដែលកាលនោះបារាំងគឺជាប្រទេសលំដាប់លេខ២ដែលបានបញ្ជូនកងមួកខៀវមកកម្ពុជា ហើយនៅខែធ្នូខាងមុខ យើងនឹងប្រារព្ធខួប៣០ឆ្នាំនៃការចុះតំបន់អង្គរទៅក្នុងបញ្ជីនៃបេតិកភណ្ឌពិភពលោករបស់អង្គការយូណេស្កូ។ នៅក្នុងដំណាក់កាលនីមួយខាងលើ ប្រទេសបារាំងតែងតែមានវត្តមានជានិច្ចដោយសារប្រទេសនេះចង់ឃើញកម្ពុជាចាប់យកនូវមាគ៌ាថ្មីដែលប្រទេសកម្ពុជាបានស្គាល់នាពេលបច្ចុប្បន្ន។
លោកបានបន្តទៀតថា “ចាប់តាំងពីពេលដែលខ្ញុំបានកាន់មុខតំណែង ខ្ញុំបានសង្កេតឃើញថាកម្លាំងនៃប្រទេសកម្ពុជាពឹងផ្អែកលើយុវជនដែលប្រកបដោយភាពអស្ចារ្យ រស់រវើក និងសកម្ម សង្គមស៊ីវិល និងអង្គការក្រៅរដ្ឋាភិបាលសកម្ម ដែលតំណាងមួយចំនួនកំពុងមានវត្តមានក្នុងរាត្រីនេះ ហើយដែលស្ថានទូតរក្សានូវទំនាក់ទំនងឥតងាករេ។ ពួកគេទាំងនេះខិតខំយ៉ាងខ្លាំងដើម្បីភាពរីកចម្រើន និងភាពល្អប្រសើរនៃប្រទេសកម្ពុជា។ អ្នកទាំងនោះគួរទទួលបានការគាំទ្រពីយើងខ្ញុំ។ ប្រជាធិបតេយ្យសេរីពហុបក្ស និងការធានាបាននូវការគោរពសិទ្ធិមនុស្សជាបេះដូងនៃរដ្ឋធម្មនុញ្ញនៃប្រទេសយើងទាំងពីរ។ កាតព្វកិច្ចរួមរបស់យើងគឺត្រូវលើកស្ទួយ ការពារគុណតម្លៃទាំងនេះដើម្បីភាពល្អប្រសើរនៃពលរដ្ឋប្រទេសយើងទាំងពីរ។ ទំនាក់ទំនងនៃប្រទេសយើងទាំង២ផ្តោតលើប្រធានបទទាំងអស់នេះ និងប្រធានបទដទៃទៀតដោយបើកចំហ។
ខ្ញុំមិនអាចថ្លែងទៅកាន់លោកអ្នក ដោយមិនលើកឡើងអំពីសោកនាដកម្មមនុស្សជាតិបង្កឡើងដោយការឈ្លានពានរបស់រុស្ស៊ីទៅលើប្រទេសអ៊ុយក្រែននោះទេ។ ការឈ្លានពាននេះគឺជាការដើរថយក្រោយគួរឱ្យសង្វេគក្នុងប្រវត្តិសាស្រ្ត ជាការបើកឡើងនូវទំព័រដ៏ខ្មៅងងឹតបំផុតក្នុងសតវត្សទី២១ ជាភាពអាម៉ាសមួយរបស់របបក្រុងមូស្គូ និងជាដំបៅដ៏ធំសម្រាប់ទ្វីបអឺរ៉ុប។ សង្រ្គាមនេះដាស់មនសិការរបស់យើង។ សង្រ្គាមនេះពាក់ព័ន្ធនឹងយើងគ្រប់គ្នា។ ប្រទេសកម្ពុជាបានប្រកាន់ជំហរយ៉ាងច្បាស់ប្រឆាំងនឹងការឈ្លានពានមិនសមហេតុផលនេះ និងដែលផ្ទុយនឹងគោលការណ៍ដែលគ្រប់គ្រងទំនាក់ទំនងអន្តរជាតិ។ សំឡេង និងសកម្មភាពរបស់យើង សកម្មភាពរបស់សហភាពអឺរ៉ុប សកម្មភាពរបស់អាស៊ាន ត្រូវរួមបញ្ចូលគ្នាដើម្បីធ្វើយ៉ាងណាឱ្យមានការបញ្ឈប់ភ្លាមៗនូវអារីភាព ក៏ដូចជាការដកកម្លាំងទាហានរុស្ស៊ីចេញពីអ៊ុយក្រែន”។
ក្នុងពេលដែលតុល្យការភូមិសាស្រ្តនយោបាយកំពុងមានការប្រែប្រួល ដែលក្នុងនោះភាពចាំបាច់នៃការប្រយុទ្ធប្រឆាំងនឹងបម្រែបម្រួលអាកាសធាតុកាន់តែមានភាពបន្ទាន់ខ្លាំង ក្នុងពេលដែលវិស័យសេដ្ឋកិច្ចមួយចំនូននៅមិនទាន់ដំណើរការឡើងវិញនៅឡើយ ដោយសារការរាលដាលជាថ្មីនៃជំងឺកូវីដ១៩ សូមបន្តបំពេញការងាររួមគ្នាដូចអ្វី ដែលយើងកំពុងធ្វើ ដើម្បីពហុភាគី កិច្ចសហប្រតិបត្តិការ ការអភិវឌ្ឍប្រកបដោយចីរភាព វប្បធម៌ និងសន្តិភាព។ នៅដំណាច់ឆ្នាំនេះ យើងនឹងប្រារព្ធខួប៧០ឆ្នាំនៃទំនាក់ទំនងការទូតរវាងប្រទេសយើងទាំងពីរ។ ពេលនោះគឺជាឱកាសដ៏ប្រពៃដើម្បីអបអរមិត្តភាពដ៏យូរលង់ និងអមតៈដែលផ្សារភ្ជាប់ប្រទេសយើងទាំងពីរ និងដើម្បីពង្រឹងកិច្ចសន្ទនានយោបាយដើម្បីសម្រេចបាននូវគោលដៅទាំងនេះ ដែលមានតម្លៃខ្លំាងចំពោះយើង៕ រក្សាសិទ្ធិដោយ ៖ សុទ្ធ លី
