ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងថា បើទោះបីជាឯកឧត្តម ហ៊ុន ម៉ាណែត ជាកូននរណាក៏ដោយ ក៏សម្តេចគាំទ្រ ឯកឧត្តមហ៊ុន ម៉ាណែត ដែរ ព្រោះលក្ខណៈសម្បត្តិគ្រប់គ្រាន់ ។
ក្នុងពិធីជួបសំណេះសំណាល ជាមួយប្រជាពលរដ្ឋស្ម័គ្រចិត្តរើសំណង់ចេញពីតំបន់រមណីយដ្ឋានអង្គរនៅព្រឹកថ្ងៃទី១៣ ខែកញ្ញា ឆ្នាំ២០២២នេះ សម្តេចតេជោ ហ៊ុន សែន បានលើកឡើងថា ខ្ញុំក៏គួរតែនិយាយ វាទាស់តែម៉ាណែត កើតមកជាកូនរបស់ខ្ញុំទេ តែខ្ញុំត្រូវតែបញ្ជាក់ថា បើទោះបីជាម៉ាណែតជាកូននរណាក៏ដោយ ក៏ខ្ញុំគាំទ្រ ហ៊ុន ម៉ាណែត ដែរ ព្រោះលក្ខណៈសម្បត្តិរបស់វាគ្រប់គ្រាន់ វាមិនមែនស្ថិតនៅត្រង់កូនខ្លួនឯងឯណា ខ្ញុំគាំទ្រអ្នកណាដែលអាចដឹកនាំគណបក្សប្រជាជនបាន ដែលអាចដឹកនាំកម្ពុជាបាន អញ្ចឹងកុំនិយាយថា អាហ្នឹងរឿងកូនហ៊ុន សែន ឥឡូវ ហ៊ុន ម៉ាណែត ត្រូវកាត់ផ្តាច់ពីខ្ញុំ ទៅជាកូនរបស់ជា សុផារ៉ា ឬកូន ចម ប្រសិទ្ធ ឬកូន ថោង ខុន ក៏ដោយចុះ ក៏ខ្ញុំនៅតែគាំទ្រ ព្រោះលក្ខណៈសម្បត្តិវាគ្រប់ៗ។
សម្តេចបានបញ្ជាក់ថា ម្ង៉ៃៗ លឺថាផ្ទេរអំណាចឱ្យកូន យី អញមិនមែនបណ្តុះបណ្តាលឱ្យទៅធ្វើមេចោរឯណា បើវាមានលទ្ធភាពធ្វើនាយករដ្ឋមន្ត្រី ឲ្យវាធ្វើទៅ ហើយខ្ញុំបានបញ្ជាក់ហើយបើសិនជា កូនខ្ញុំមិនគ្រប់លក្ខណៈសម្បត្តិ ក៏ខ្ញុំមិនគាំទ្រដែរ ហើយខ្ញុំមិនឱ្យប្រទេសនេះ បំផ្លាញដោយសារស្នាដៃកូនរបស់ខ្ញុំទេ ឪពុកប្រឹងកសាងកូនប្រឹងបំផ្លាញ មិនមែនអញ្ចឹងទេ អត់ទេ ហើយក៏មិនមែនកូនស៊ីកេររបស់ឪដែរ៕រក្សាសិទ្ធិដោយ ៖ សុទ្ធលី
